Khaih-hwuyên 2

1Dayh valơk ka yaak plêêk ku tayuup vah aduq Ê-phê-sô đaneq:

‘Kơy adrơk pơh poop xalok đom ti akoh Kadraq, laa Kơy tawaak hooy măn katul pơh jôôk đeen bơơn vajang, xanoh luneq: 2“Gô xet kaluh varơuq dơơp ku koot, varơuq pơơl kung varơuq atuq xuum chiuq uunq ku koot, Gô kung xet đaneq koot leh ik chiuq xôq adro xơk, koot heq thư khơl adro kadih xưng laa khơl jah rơơlh đơu oot be aalq laa đanưq, ji koot heq 'yo xet oot laa pa ôôh lar; 3koot kung e varơuq wêêt xuum, ji heq chiuq pơơl vii kơq yal Gô đơu leh galeh galal. 4Lunư, Gô e varơuq toah koot, nưq laa koot heq ka'lăk hlơơp xuum xung xiaq kapa tep ku koot. 5Vii anưq, dayh văch hlê koot heq gưlh talaalh xing leq, dayh wiit xuum ji dơơp kaluh varơuq kapa tep. Măn atoh lưp, Gô hnoq truh dii koot ji Gô hnoq deep ka'lăk jôôk đeen ku koot klơlh aduq ni — atoh koot leh wiit xuum. 6Bơh koot e varơuq neq, nưq laa koot 'yarơ kaluh varơuq dơơp ku tayuup Ni-kô-la, laa kaluh varơuq đơu Gô kung 'yarơ. 7Kơyq e tôôr, dayh tameng apok Kơy Phool Hiel xanoh kung kaluh tayuup vah. Đôôyq dii manih jah jay, Gô hnoq ăm ka manih nưq xa play vlôh xing ưk varơuq riirh măn đom Ba-ra-đi ku Kơy Plêêk.”’

8Dayh valơk ka yaak plêêk ku tayuup vah aduq Si-miêk-nơ đaneq:

‘Kơy adroyq dik ji lôôch dik, Kơy heq chiuq kaxêêt ji heq riirh hlê, Kadraq xanoh luneq: 9“Gô xet kaluh pơơl hwơơl ku koot ji varơuq adrah aduq koot (đơu wih hlê, koot đong karoh e), kung apok đnooy pahnhiq truh xing khơl adro xưng kadih oot laa manih Jo Thaiq đơu oot be aalq, bơh laa hnhư tayuup ku Sa-tan. 10Te yôq kajoq dêq đôôyq dii kaluh varơuq đơu koot jeq pheq chiuq. 'Yo hơq, kamuuych jeq taweek taleq dro đom khơl koot muut tu xôq ka êêp koot biq thư, ji khơl koot hnoq chiuq pơơl dal đom kưl hngơy. Dayh muuyq xuum dong truh kaxêêt, yôôch Gô hnoq kahniq ka koot đoat tađnah ku varơuq riirh. 11Kơyq e tôôr, dayh tameng apok Kơy Phool Hiel xanoh kung kaluh tayuup vah. Manih jah jay hnoq leh e 'leq biq haiq bơyh varơuq kaxêêt yưk vaarq.”’

12Dayh valơk ka yaak plêêk ku tayuup vah aduq Bet-găm đaneq:

‘Kơy e poop xieh vaarq pla mưr charik xanoh luneq: 13“Gô xet aduq koot riirh, aduq nưq laa ngaai ku Sa-tan, đơu koot heq jư kajưk xok yal Gô, ji leh chôôyq ka'lăk xuum tuôq aduq Gô, hloay kah đom kaluh hngơy ku An-ti-ba, manih xanưk ku Gô, manih muuyq xuum dii Gô, laa manih biq păk kaxêêt kangưưr êêp koot, aduq đơu Sa-tan măn. 14Lunư, Gô e taleq varơuq toah koot, nưq laa kađnư, koot e taleq adro jư xok trôôk pato ku Ba-la-am, laa adro heq pato Ba-lak xôq kuk phơu dơơp xatôôlh jôôk kangưưr koot xau I-sơ-ra-ên xôq xa tuôông đơơp ka vangưl ji dơơp varơuq apuq atrăp. 15Tyauq trôôk dang đanưq, koot kung e taleq adro jư xok apok pato ku tayuup Ni-kô-la. 16Vii anưq, dayh wiit xuum yơu! Măn atoh lưp, Gô hnoq talăng dayh truh dii koot, ji hnoq hmơt tagoa tachơơl dii oot bơơn xieh ku huuy Gô. 17Kơyq e tôôr, dayh tameng apok Kơy Phool Hiel xanoh dii kaluh tayuup vah. Đôôyq dii manih jah jay, Gô hnoq kahniq ka ni ma-na kadook padu, ji Gô hnoq kahniq ka ni muuyq kuk phơu ko đơu tol kuk phơu nưq, muuyq yal đơơu heq jah valơk. Laa yal đơu be kơyq xet đêh vlôh manih nhonq jah ni.”’

18Dayh valơk ka yaak plêêk ku tayuup vah aduq Thi-a-ti-rơ đaneq:

‘Koot Kơy Plêêk, Kơy e mot đaji gooy ôôlh ji jôôk đaji đông tađnah ah, xanoh luneq: 19“Gô xet kaluh varơuq dơơp ku koot, xung xiaq, xuum tuôq, varơuq hơu varơuq, kung xuum atuq kajưk ku koot, ji kaluh varơuq dơơp ku koot atêq neq măn galơh iaq kaluh varơuq tuôôy adroyq. 20Bơh Gô e varơuq neq toah koot, nưq laa koot đong chiuq xôq mo Jê-sa-bên, adro kadih 'yo ni laa mo hlit, ji ni pato dayq kung adô aluut khơl xapok ku Gô lôp kadrôôp apuq atrăp ji xa tuôông đơơp vangưl. 21Gô heq ăm ka ni kawat xôq ni hnoq ik wiit xuum, đơu ni leh trôôch wiit xuum truh varơuq apuq atrăp ku ni. 22Dayh 'yo nee! Gô hnoq taweek ni moq lêêt tol chanưng, ji khơl adro lôp kadrôôp apuq atrăp kung ni muut varơuq pơơl dal kôt, atoh oot leh wiit xuum truh kaluh varơuq dơơp ku ni. 23Gô hnoq hmơt khơl koot xau ni bơơn varơuq kaxêêt, yôôch dêq hloay kaluh tayuup vah hnoq xet đaneq Gô laa Kơy 'yo hloq xuum klaak, ji Gô hnoq kahniq ka tôôy dro đom êêp koot tyauq tưng kaluh varơuq dơơp ku êêp koot. 24Bơh Gô xanoh dii khơl koot, laa sôôq măn hlê đom khơl manih aduq Thi-a-ti-rơ, long kơyq leh jư tyauq apok pato nưq, 'ngưq laa khơl dro leh xet kaluh varơuq jaruq ku Sa-tan, đaji muuyq sôôq adro taayh nưq, đaneq: "Gô leh xôq pơq parêq leq đnoyq tol êêp koot. 25Lunư, pheq jư kajưk xok kaluh kajoq khơl koot e dong truh tuôôy leq Gô truh."

26Đôôyq dii manih jah jay ji kưq jư xok kaluh varơuq dơơp ku Gô dong truh lôôch dik, yôôych Gô hnoq kahniq ka dro nưq qwuyen da uh tol kaluh daak dêh.

27"Dro nưq hnoq dưk xakaq oot bơơn muuyq gay katôôlh maam,

dang đaji kaluh wo vari dik biq pôh padah padek,"

28kung đaji Gô heq nhonq jah qwuyen xing Vaq Gô, yôôych Gô hnoq kahniq ka dro nưq xalok maai. 29Kơyq e tôôr, dayh tameng apok Kơy Phool Hiel xanoh kung kaluh tayuup vah.”’