Skip to content
BibleKenya

Cua Bible Literal Text

Khaih-hwuyên 16

Yôôch gô tameng muuyq apok kôt xing hnhư hơu đnooy dii pơh yaak plêêk: “Dayh hooy ji uk pơh dooy tôq dayh ku Kơy Plêêk pôôt vari.”

Nưq laa kơy thưq nhưk hooy ji uk dooy kơy pôôt vari, yôôych ple talook ramêq ji dơơp jiq jiêh xalih vlôh tol oot, khơl adro e dơuq hlêêl ku ôô, kung khơl adro kuh ayuôôt vangưl ni.

Yôôch kơy thưq vaarq uk dooy kơy pôôt tahli, yôôych tahli jêêk vlôh vahaap, đaji ku manih kaxêêt, ji tôôy paroh riirh đom tahli raay kaxêêt.

Atêq nưq, kơy thưq pe uk dooy kơy pôôt kaluh daak tavook ji alook daak, yôôych daak jêêk vlôh vahaap. Gô tameng yaak plêêk ku daak đnooy:

“Kuh Kơy đong e ji heq e, laa Kơy Vah,

Kadraq laa hyioh jăk vii Kadraq heq xưh xadrah kaluh varơuq neq. 1

Vii oot heq dơơp kahrôq vahaap ku khơl vah ji khơl hlit,

lunưq Kadraq heq ăm oot hôôch vahaap;

oot dik đangq đanưq.”

Yôôch gô tameng para hơu đnooy: “Jơq, kuh Lôôk laa Kơy Plêêk, Kơy Taay Yaak,

kaluh varơuq xưh xadrah ku Kadraq raay dong dik ji hyioh jăk.”

Yôôch kơy thưq poot uk dooy kơy tol mot hngơy, yôôych ni ik pheep vuh khơl drơy bơơn ôôlh. Anưq laa oot biq vuh jaq vii xal tôq paq ik, ji oot đnooy katơơk galơh yal ku Kơy Plêêk, Kơy e qwuyen tol kaluh pơơl dal neq, đơu oot be chiuq wiit xuum xôq tưp tađnah tađnaak ka Kadraq.

Yôôch kơy thưq dăp uk dooy kơy tol ngaai ku ôô, yôôych daak dêh ni jêêk vlôh kamơng jaluk, ji oot kek kapiet oot vii jiq jiêh. Oot đnooy katơơk galơh Kơy Plêêk tol plêêk vii varơuq jiq jiêh oot ji vii kaluh hlêêl buk katôôch ku oot, anưq đơu oot leh wiit xuum truh kaluh varơuq dơơp ku oot.

Yôôch kơy thưq drơu uk dooy kơy pôôt daak tavook kôt Ơ-phơ-rat, yôôych daak tavook biq kateh hriet xôq trôôk hooy ku khơl vuua xing pi mot hngơy vlok jah 'meq 'miêh. Gô hloq vlôh xing huuy ôô vayaa, xing huuy ôô, ji xing huuy hlit pa ôôh, e pe kamuuych klơl 'yêq dang đaji aji, Vii oot laa garu xi ku kaluh kamuuych dưk dơơp 'ngưng dơuq akêh, đơu oot truh dii khơl vuua tol dêq dêh araak xôq anguk hlê oot ka varơuq tahmơt muut hngơy kôt ku Kơy Plêêk, Kơy Taay Yaak. (“'Yo hơq! Gô truh đaji adro atôk! Vanong ka dro parol takôô ji jư 'yo aau yơơt ni, xôq ni leh tawaak hooy lalôk đơu khơl drơy 'yo hloq varơuq kamưưl ku ni.”) Oot anguk tagumq oot hlê măn aduq jah taayh laa Ha-ma-gê-đôn đom apok Hi-baq-lai.

Yôôch kơy thưq pơh uk dooy kơy muut không khiq, yôôych muuyq apok đnooy kôt xing ngaai đom hnhư hơu ahna vlôh, đaneq: “Varơuq heq payôôch!” Nưq laa e ka'mek tađnah, hnưm garung garung kung hnưm kơy kata, ji muuyq đơơt ahrưng vari kôt xalih vlôh, đơơt ahrưng vari nưq thier kalh ji kôt truh mưk muuyq đơơt đanưq koq hmưq xalih vlôh xing tuôôy koot manih e tol vari. Theng kôt biq aklah vlôh dơơp pe phon, ji kaluh theng kôt ku kaluh daak dêh hrưp pôôt, ji Ba-bi-lôn kôt biq văch hlê kangưưr Kơy Plêêk xôq ăm ka ni dooy lok tôq dayh rahưk rahưk ku Kadraq. Yôôch kaluh ngok tahli raay xadăk klôônq, ji kaluh ngok đoot be jah axek hloq. Kaluh kuk jit parier kôt kơh muuyq ta-lâng xing plêêk klêh pôôt tol koot manih, yôôch oot đnooy katơơk galơh Kơy Plêêk bơyh pơơl dal jit parier, vii pơơl dal nưq thier laa parêq parơh dik.

Source notes (1)
  1. Footnote Muuyq sôôq rahlăp đok: Wơơy Lôôk, Kơy đong e, heq e, ji măn e, Kadraq dik hyioh jăk vii Kadraq heq xưh xadrah kaluh varơuq nưq.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.