Khaih-hwuyên 17

1Yôôch muuyq đom pơh yaak plêêk adrơk pơh poop dooy, hooy truh ji đnooy dii gô, đaneq: “Truh đnen nee, gô hnoq ăm ay hloq varơuq xưh xadrah mư xakwoah kôt đong 'ngôôy tol 'ngưng alook daak, 2đơu kung dii ni, khơl vuua tol vari heq lôp kadrôôp apuq atrăp, măn manih araak tol vari yôôych vuul weel bơyh lok apuq atrăp ku ni.” 3Kơy nưq taway gô hooy đom Kơy Phool Hiel truh muuyq wăngq we, yôôch gô hloq muuyq khơl kadrê 'ngôôy tol ôô phôôm dôôp rưk, e viik kaluh yal taayh katơơk galơh, e pơh akoq ji kưl akê. 4Dro khơl drê nưq yôôych hlưp qwuân aau phôôm tôô ji dôôp rưk, jah pagooh dii vajang, phơu quiq, ji kalook châu, tol ti ni đong adrơk muuyq dooy bơơn vajang viik kaluh thưq ramêq ji kaluh varơuq klơơr 'yêq bơyh varơuq apuq atrăp ku ni, 5măn tol ngưưl ni jah valơk muuyq yal xưng: “Ba-bi-lôn kadook padu kôt galơh, miq ku bing apuq atrăp ji kaluh thưq ramêq ku vari.” 6Yôôch gô hloq adro khơl kadrê nưq đong vuul weel dii vahaap ku khơl vah ji dii vahaap khơl manih dơơp xanưk ku Lôôk Jê-xu, đơu atêq tuôôy 'yo hloq mư nưq, gô thier akêh dii varơuq tưng hưng paq ik. 7Kơy yaak plêêk đnooy dii gô: “Vii aleq ay laay akêh? Gô hnoq đnooy ka ay truh kadook padu ku khơl kadrê ji ku ôô đong acho mư nưq, 'ngưq laa ôô e pơh akoq ji kưl akê. 8Ôô đơu ay hloq adroyq heq e, juneq leh e, đơu laay jeq hooy tok xing huuk leh e kalek, yôôych ni hnoq hooy truh aduq kaxêêt hlơơp, măn koot manih tol vari, đơu anơng oot leh jah valơk đom Rahlăp Varơuq Riirh xing tuôôy panưk jêêk plêêk vari, hnoq akêh tuôôy 'yo hloq ôô vii adroyq heq e, juneq leh e, yôôch hnoq truh. 9Tuôôy xuum biit e varơuq khôôt xet đom varơuq neq: Pơh akoq laa pơh ngok đoot, aduq khơl kadrê hơq 'ngôôy tol oot, ji oot laa pơh kơy vuua; 10dăp vuua heq hrưp, muuyq vuua đong măn hlê, muuyq vuua kadrơy măn koq truh. Ji tuôôy ni truh, ni vơ măn hlê đom muuyq kawat lêq. 11Ôô adroyq heq e đơu juneq leh e, yôôych jơq ni laa kơy vuua thưq thơơm; đơu ni thuôk xuq pơh vuua hơq, ji đong hooy truh aduq kaxêêt hlơơp. 12Kưl poop akê đơu ay hloq laa kưl vuua, khơl adro koq nhonq jah daak dêh, bơh oot hnoq nhonq jah qwuyen dơơp vuua đom muuyq wat kung dii ôô. 13Khơl vuua neq e kung muuyq xuum biit, ji oot ăm paraat kalh kung qwuyen da uh ku oot ka ôô. 14Oot hnoq tagay tahmơt dii Trưưu koot, yôôch Trưưu Koot hnoq jah jay oot vii Kadraq laa Lôôk ku khơl lôôk, Vuua ku khơl vuua — ji kung dii Kadraq laa khơl dro jah tawooyh taayh, jah rơơlh xok, ji muuyq xuum.” 15Kơy yaak plêêk đnooy dii gô: “Kaluh alook daak đơu ay hloq, aduq đơu mư xakwoah đong 'ngôôy, laa kaluh tamooy, bing manih karôp, kaluh daak dêh ji kaluh apok athêêk. 16Kưl poop akê đơu ay hloq, kung ôô — oot hnoq 'yarơ geet mư xakwoah nưq, yôôch oot hnoq dơơp ni biq varoh xok ji lalôk, oot hnoq xa luôôt hlek ni, ji hnoq vuh ka'lăk ni bơơn ôôlh, 17vii Kơy Plêêk heq ăm xôq muut xuum oot xôq dơơp iq đinq ku Kadraq, xôq dưk dơơp muuyq iq đinq, ji xôq ăm daak dêh oot ka ôô dong truh tuôôy kaluh apok ku Kơy Plêêk hnoq jah jêêk yuôôr dêq hloay. 18Khơl kadrê đơu ay hloq laa theng kôt e qwuyen xakaq tol khơl vuua ku vari.”