Khaih-hwuyên 15

1Yôôch gô hloq muuyq dơuq kôt ji akêh kadrơy tol plêêk: pơh yaak plêêk đong jư pơh pơơl dal, kaluh varơuq lôôch dik, vii đơơt tôq dayh ku Kơy Plêêk jah xaleep aduq oot.

2Gô kung hloq kajoq nưq dang đaji tahli bơơn ramil jah aluq dii ôôlh. Khơl adro jay iaq ôô, iaq vangưl ni, ji iaq sôôq ku anơng ni, đong dưk tol tahli ramil, adrơk varo haak ku Kơy Plêêk. 3Oot kacheeu baai kacheeu ku Môi-se, xapok ku Kơy Plêêk, ji baai kacheeu ku Trưưu Koot, đaneq:

“Kuh Lôôk laa Kơy Plêêk, Kơy Taay Yaak,

kaluh varơuq dơơp Kadraq kôt galơh ji akêh.

Kuh Vuua ku kaluh đơơy xanưm,

trôôk daak Kadraq laa hyioh jăk ji dong dik. 1

4Kuh Lôôk, kơyq be biq varaal yôq,

ji hnoq leh ayuôôt laat yal Kadraq?

Vii vơ muuyq Kadraq laa vah.

Bơyh dêq hloay kaluh daak dêh hnoq truh

ji ayuôôt laat kangưưr Kadraq,

vii kaluh varơuq hyioh jăk ku Kadraq heq jah kahnoq vlôh.”

5Atêq kaluh varơuq nưq, gô 'yo hloq, hnhư hơu ku raap xanưk tavek tol plêêk jah luh vlôh. 6Pơh yaak plêêk adrơk pơh pơơl dal hooy vlôh xing hnhư hơu, đom qwuân aau bơơn vaayh lanh xarêh xaraat, tađnah ploat, ji jah hnek talơy bơơn vajang rawiit tada. 7Yôôch muuyq đom poot poop ôô ăm ka pơh yaak plêêk pơh dooy bơơn vajang tađnưk viik varơuq tôq dayh ku Kơy Plêêk, Kơy riirh dong truh đơơy đơơy, miet miet. 8Hnhư hơu khul galik 'nhuuy jo tađnah tađnaak ku Kơy Plêêk ji jo taay yaak Kadraq, be kơyq hnoq ik muut đom hnhư hơu dong truh tuôôy pơh pơơl dal ku pơh kơy yaak plêêk jah payôôch.