Khaih-hwuyên 14

1Yôôch gô 'yo hloq, ji hơq, Trưưu Koot dưk tol đoot Si-ôn, ji kung dii Kadraq laa muuyq hreek poot kưl poot ravơu dro e yal Kadraq ji yal Vaq Kadraq jah valơk tol ngưưl ku oot. 2Ji gô tameng apok đnooy xing tol plêêk đaji hnưm garung garung ku 'ngưng alook daak, đaji hnưm kơy kata kalh, ji hnưm gô heq tameng yôôych dang đaji khơl manih parayh varo haak oot. 3Oot kacheeu muuyq baai kacheeu đơơu kangưưr ngaai ji kangưưr poot poop ôô kung khơl draq, đơu be kơyq hnoq ik hok xet baai kacheeu nưq đêh vlôh muuyq hreek poot kưl poot ravơu dro heq jah wơơt root xing tol vari. 4Neq laa khơl manih koq biq klơơr 'yêq dii khơl drê, vii oot laa khơl manih măn tadăp. Neq laa khơl manih hooy tyauq Trưưu Koot aduq leq đơu Kadraq hooy. Khơl dro neq heq jah root xing katul koot manih đaji play adroyq dik ka Kơy Plêêk ji ka Trưưu Koot, 5be e apok pa ôôh lar leq jah axek hloq aduq huuy oot, vii oot leh e hlêêl tachoot. 1

6Yôôch gô hloq muuyq yaak plêêk kadrơy tapol aduq katul plêêk, e Hêêl Kaxay đơơy đơơy xôq đnooy avlôh ka koot manih tol vari — hloay kaah ka tôôy daak dêh, adrơơk, apok thêêk ji kaluh tamooy — 7taayh kôt apok: “Dayh kul yôq Kơy Plêêk ji tơơk tưp tađnah tađnaak ka Kadraq, vii wat xưh xadrah ku Kadraq heq truh. Dayh kuh ayuôôt Kơy panưk jêêk plêêk, vari, tahli ji kaluh alook daak.”

8Muuyq kơy kadrơy, yaak plêêk thưq vaarq, tyauq atêq, đnooy đaneq: “Ni gưlh hrưp yôôch, Ba-bi-lôn kôt heq gưlh hrưp, 'ngưq laa adro ahluk ahlul dêq hloay kaluh daak dêh hôôch xing aduq lok tôq dayh truh varơuq apuq atrăp ku ni.”

9Muuyq yaak plêêk kadrơy, kơy thưq pe, tyauq atêq oot, đnooy kôt apok, đaneq: “Atoh adro leq kuh ayuôôt ôô kung vangưl ni, ji nhonq hlêêl dơuq tol ngưưl long tol ti adro nưq, 10yôôych adro nưq kung hnoq hôôch lok tôq dayh ku Kơy Plêêk, laa thưq lok leh wa cheet muut dooy tôq jaraq ku Kadraq, ji adro nưq hnoq biq dơơp jiq jiêh bơơn ôôlh ji lưưu hwinh kangưưr khơl yaak plêêk vah ji kangưưr Trưưu Koot. 11'Nhuuy xing aduq jiq jiêh ku oot tapol tok dong truh đơơy đơơy, miet miet, ji oot be e varơuq padơy pado ka hngơy hloay ka klôôy, 'ngưq laa khơl adro kuh ayuôôt ôô kung vangưl ni, ji dro leq nhonq xok hlêêl dơuq anơng ku ni. 12Neq laa varơuq atuq xuum chiuq uunq ku khơl vah, khơl manih tameng jư kaluh ganeen ku Kơy Plêêk ji xuum tuôq aduq Lôôk Jê-xu.”

13Gô tameng muuyq apok đnooy xing plêêk, đaneq: “Dayh valơk: Xing neng kơn atêq, vanong ka adro kaxêêt laa adro kaxêêt đom Lôôk.” Kơy Phool Hiel xanoh: “Jơq, xôq oot hnoq padơy pado klơlh kaluh galeh galal ku oot, vii kaluh varơuq dơơp ku oot tyauq atêq kung dii oot.”

14Yôôch gô 'yo hloq, ji hơq, muuyq đum kluk ko, ji măn tol kluk laa kơyq nưq dang Koot Manih, e đoat tađnah bơơn vajang tol akoq Kadraq, ji muuyq poop lahaay mưr đom ti Kadraq. 15Yôôch muuyq yaak plêêk kadrơy hooy vlôh xing hnhư hơu, kôt apok taayh Kơy đong 'ngôôy tol kluk: “Xiin palo lahaay Kadraq vlôh ji goch, vii kawat xôq goch heq truh vii muua goch tol vari heq dôôp.” 16Nưq laa Kơy 'ngôôy tol kluk raheeng lahaay Kadraq tol vari, ji vari biq goch.

17Yôôch muuyq yaak plêêk kadrơy hooy vlôh xing hnhư hơu tol plêêk, kơy neq kung e muuyq poop lahaay mưr. 18Muuyq yaak plêêk kadrơy đnoyq, laa kơy e qwuyen da uh tol ôôlh, vlôh xing para hơu, ji kơy kalh apok taayh kơy e poop lahaay mưr, đaneq: “Dayh palo lahaay mưr kơy vlôh, ji goch xok kaluh 'môôk nho xing kaluh ưk nho 'laarq vari, vii kaluh 'môôk nho ku oot heq dôôp.” 19Anưq laa kơy yaak plêêk raheeng lahaay kơy pôôt vari ji goch xok hluôôt nho 'laarq vari, yôôch taweek muut thung raniaq nho kôt ku đơơt tôq dayh ku Kơy Plêêk. 20Thung raniaq nho jah joaq pi gôk theng ji vahaap đom thung raniaq nưq ahngok vlôh yơơt tok truh moon ôô ahleh, yơơt xangưưy muuyq ravơu drơu hreek êt-ta-đơ.