Cua Bible Literal Text
Khaih-hwuyên 13
Atêq nưq, gô hloq muuyq poop ôô hooy tok klơlh tahli, e kưl akê ji pơh akoq, ji tol kaluh akê ku ni laa kưl đoat tađnah, đơu tol kaluh akoq ku ni laa muuyq yal katơơk galơh. Poop ôô đơu gô hloq yôôych dang đaji ôô beeo, pla jôôk ku ni dang đaji ku ôô xagơu, măn huuy ni yôôych dang huuy ôô vomq, ji ôô vayaa pahnăp paraat kalh vayaa ka ni, kung dii ngaai ni ji qwuyen da uh thier kôt. Muuyq đom kaluh akoq ku ni dang đaji heq hmưq biq hmơt tiel truh kaxêêt, đơu hlêêl xưr xôôh jeq kaxêêt ku ni heq jah payơh. Dêq ka vari raay dơơp akêh đơu hooy tyauq ôô nưq, ji oot kuh ayuôôt ôô vayaa vii ni heq kahniq qwuyen da uh ka ôô, oot kung kuh ayuôôt ôô, đaneq: “Kơyq dang đaji ôô, ji kơyq hnoq ik tahmơt tachơơl hlê ni ik?” Muuyq poop huuy đnooy apok xơk lar ji đnooy katơơk galơh jah kahniq ka ôô, qwuyen da uh kung jah kahniq ka ni xôq dưk dơơp đom poot kưl vaarq xiêk. Nưq laa ôô luh huuy ni đnooy kaluh apok katơơk galơh tachơơl hlê Kơy Plêêk, đnooy ra ơơh yal Kadraq ji raap đơ ku Kadraq — khơl manih măn tol plêêk. Ôô ik pheep tagay tahmơt dii khơl vah ji jay iaq oot, qwuyen da uh kung jah kahniq ka ni tol tôôy adrơơk, kaluh tamooy, apok athêêk ji daak dêh. Tôôy manih araak tol vari hnoq kuh ayuôôt ni, laa dêq hloay kơyq đơu anơng ku adro nưq heq leh jah valơk đom Rahlăp Varơuq Riirh ku Trưưu Koot, Kơy heq biq păk kaxêêt, xing tuôôy panưk jêêk dêh araak. Atoh kơyq e tôôr, yôôych dayh tameng.
Atoh kơyq deng ka varơuq rôp dơơp xapok,
dro nưq dik pheq hooy trôôk neq,
atoh kơyq hnoq biq păk kaxêêt bơyh xieh jaauq,
dro nưq pheq biq păk kaxêêt bơyh xieh jaauq.
Neq laa varơuq atuq xuum chiuq uunq ji xuum tuôq ku khơl vah.
Yôôch gô hloq muuyq poop ôô kadrơy hooy tok klơlh vari, ji ni e vaarq akê dang đaji ôô trưưu koot, đơu ni xathêêk đaji ôô vayaa. Ni xok dơơp tôôy qwuyen da uh ku ôô thưq nhưk kangưưr ôô nưq, ji ni dưk dơơp qwuyen neq dơơp aleq ka vari kung manih araak tol vari hnoq kuh ayuôôt ôô thưq nhưk, 'ngưq laa ôô e hlêêl xưr jeq kaxêêt heq jah payơh. Ni dưk dơơp kaluh dơuq akêh kôt galơh, truh nôôy ni pheq đnooy hnoq ik khienq ka ôôlh klêh xing tol plêêk pôôt vari hloay kangưưr koot manih. Bơơn kaluh dơuq akêh đơu ni jah pheep dơơp kangưưr ôô, ni pa ôôh aluut koot manih tol vari, tuôôy dăt koot manih tol vari dơơp muuyq vangưl ôô e hlêêl xưr xôôh bơyh xieh đơu măn riirh. Ni ik pheep kahniq hơơy hoot heet ka vangưl nưq ku ôô, xôq vangưl ôô pheq đnooy đnooy ik, ji khienq dro leq leh kuh ayuôôt vangưl ôô pheq biq păk kaxêêt. Ni kung khienq tôôy dro, de kung đaji kôt, karoh kung đaji adrah, rayơh rayơơy hloay xapok, dơơp aleq hnoq ik ăm ka oot muuyq dơuq hlêêl tol pla ti akoh ku oot long tol ngưưl oot, xôq be e paq kê kơyq hnoq ik root long tek ik atoh dro nưq leh e dơuq hlêêl nưq, laa anơng ku ôô, long sôôq ku anơng ni. Varơuq khôôt xet laa neq: Kơyq e varơuq hlolh xet, dro nưq dayh jauq sôôq ku ôô. Vii ni laa sôôq ku muuyq dro, ji sôôq ku ni laa drơu hreek drơu kưl drơu.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.