Cua Bible Literal Text
Khaih-hwuyên 12
Yôôch muuyq dơuq akêh kôt jah nhonq hloq măn tol plêêk: muuyq khơl kadrê hlưp tok xăk mot hngơy, ji xiêk măn 'laarq jôôk mư, dii muuyq đoat tađnah kưl vaarq poop xalok tol akoq mư, ji vii đong măn bonq, mư alo ook đom đơơt jiq pa iir, ji đong jiq takoot klaak xôq pa iir. Ji muuyq dơuq akêh kadrơy jah nhonq hloq tol plêêk: 'Yo hơq, muuyq ôô vayaa kôt phôôm dôôp e pơh akoq, kưl akê, dii pơh đoat tađnah tol kaluh akoq ku ni. Hlooy ku ni ahwoa muuyq phon pe kaluh xalok tol plêêk yôôch taweek kaluh xalok pôôt vari. Yôôch ôô vayaa dưk kangưưr khơl kadrê jeq pa iir, xôq tuôôy mư pa iir yôôych ni hnoq luôôt xok koot ku mư. Mư pa iir muuyq koot kanau, oh de laa dro hnoq dưk xakaq tôôy daak dêh bơơn gay katôôlh maam. Yôôch koot ku mư jah varoh xok ka Kơy Plêêk ji truh aduq ngaai Kadraq, măn khơl kadrê yôôych xadăk klôônq muut wăngq we, aduq đơu mư e muuyq kachô jah Kơy Plêêk ralauq 'miêh aduq nưq, xôq e khơl manih văch xiap mư măn aduq nưq đom muuyq ravơu vaarq hreek drơu kưl hngơy.
Yôôch e muuyq đơơt tahmơt tol plêêk. Mi-ka-ên ji khơl yaak plêêk ku kơy tahmơt dii ôô vayaa; ji ôô vayaa kung kaluh kamuuych xơk ni tahmơt hlê. Anưq yôôch ni leh đu paraat tachơơl hlê, aduq ka oot kung leh măn jah hloq tol plêêk đnoyq. Anưq laa ôô vayaa kôt biq taweek pôôt — volh hnu, jah taayh laa kamuuych long Sa-tan, adro pa ôôh aluut dêq dêh araak — ni biq taweek pôôt vari, kaluh kamuuych xơk ku ni kung biq taweek pôôt kung dii ni. Yôôch gô tek muuyq apok đnooy kôt tol plêêk, đaneq:
“Juneq, varơuq wơơt xok, taay yaak,
ji daak dêh ku Kơy Plêêk haay heq truh,
kung dii qwuyen da uh ku Kơy Chiuq Para Jơu ku Kadraq,
bơyh vii adro kienq xadrah oh ay ku haay,
laa adro klôôy hngơy kienq xadrah oot kangưưr Kơy Plêêk haay, heq biq taweek pôôt.
Oot heq jay iaq ni gamưh vahaap Trưưu Koot ji gamưh apok dơơp xanưk ku oot,
oot be alay xăk riirh oot dong truh kaxêêt.
Vii kơq nưq, dayh hlah hlaak tok, nee kaluh tưng plêêk
kung khơl adro măn đom nưq!
Ra ơơh hloay ka vari ji tahli,
vii kamuuych heq pôôt aduq êêp,
tuôôy đong e đơơt jaraq paq ik,
vii ni xet ni măn thier axit kawat!”
Tuôôy ôô vayaa nhonq vlôh đaneq ni heq biq taweek pôôt vari, yôôych ni chawiq tyauq khơl kadrê, laa manih heq pa iir koot kanau hơq. Yôôch vaarq panưr ku xêêp kalaak kôt jah kahniq ka khơl kadrê nưq xôq mư tapol truh aduq wăngq we, truh aduq ku mư, aduq đơu mư jah văch xiap kađnư đom muuyq kawah, kaluh kawah, ji panoot kawah — kach xangưưy mot volh. Nưq laa volh phuun daak vlôh xing đom huuy ni đaji daak tavook tyauq atêq khơl kadrê, xôq ni hnoq ik khienq mư biq daak kôt đôôk hooy. Yôôch vari wơơt waak khơl kadrê, vari hah huuy ji luôôt apoop daak tavook đơu ôô vayaa heq phuun vlôh xing huuy ni. Anưq laa ôô vayaa tôq jaraq dii khơl kadrê yôôch ni vlôh hooy tagay tahmơt dii phon măn hlê đom koot xau ku mư, laa khơl dro tameng jư ganeen ku Kơy Plêêk ji e apok xanưk ku Lôôk Jê-xu. Yôôch ni dưk tol choah aduq gah tahli. 1
Source notes (1)
- Footnote Muuyq sôôq rahlăp xôq apok neq măn adroyq 13:1, bơh kaluh rahlăp đangq tuôq dik xôq ni măn đnen dơơp 12:18.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.