Ma-thi-ơ 8

1Tuôôy nưq, atêq tuôôy Kadraq xing tol đoot hooy pôôt, kaluh bing manih karôp hooy tyauq Kadraq. 2'Yo hơq, muuyq dro biq bingq paruh atêq tuôôy tawaak truh, heq kul kangưưr Kadraq, tơơl: “Kuh Lôôk, atoh Kadraq trôôch, Kadraq e taay yaak xôq khienq gô ik xarơyh.” 3Yôôch tuôôy heq tơơk ti vlôh, Kadraq vêq muut ay, đnooy: “Gô trôôch. Dayh xarơyh yơu.” Vơ hloay, ay nưq jah xarơyh paruh ku ay. 4Lôôk Jê-xu đnooy dii ay: “Dayh rơơt rol, ay te duh đnooy dii kơyq, bơh dayh hooy, kahnoq vlôh xăk dii thơy tơơk tưp ji tưp kuah lêh đơu Môi-se heq pato dayq, đaji muuyq apok xanưk ka oot.”

5Tuôôy nưq, atêq tuôôy Kadraq hooy muut đom theng Ka-bê-na-um, muuyq padrok dưk xakaq kuun heq truh kung kadraq, apôôy vôôch Kadraq 6đaneq: “kuh Lôôk, xapok ku gô vik alêêt măn hnhư, chiuq jiq jiêh heq paq ik.” 7Kadraq đnooy dii kơy: “Tuôôy truh yôôch, gô hnoq payơh hlah ka ay nưq.” 8Tuôôy tơơl hlê, padrok dưk xakaq kuun tơơl: “Kuh Lôôk, gô yôôych be xưngq kajoq xôq Kadraq hnoq ik hooy muut 'laarq apo hnhư gô, lunư apôôy Kadraq vơ xanoh muuyq apok, yôôych xapok ku gô hnoq jah payơh hlah. 9Vii gô kung laa muuyq dro jah xôq 'laarq qwuyen, e kaluh bing kuun măn 'laarq gô. Gô đnooy dii dro neq: ‘Hooy yơu,’ yôôych ay nưq hooy, dii dro kadrơy: ‘Dayh truh,’ yôôych ay nưq truh, ji dii xapok gô: ‘Dayh dơơp varơuq neq,’ yôôych ni dơơp.” 10Bơh atêq tuôôy tameng anưq, Lôôk Jê-xu tưng hưng ji đnooy dii khơl adro đong hooy tyauq Kadraq: “Dong dik, thơy đnooy dii oh ay, thơy leh hloq xuum tuôq kôt đanưq xing muuyq dro leq đom I-sơ-ra-ên. 11Wih hlê, thơy đnooy ka oh ay đaneq 'ngưng dro hnoq truh xing hngơy vlok ji hngơy lôp, yôôch oot hnoq jah 'ngôôy xa kung dii Ap-ra-ham, I-sak ji Ja-kôp đom daak dêh daak plêêk. 12Bơh khơl koot ku daak dêh hnoq biq qweek muut aduq kamơng jaluk pi gôk, laa aduq hnoq e varơuq nhim alo ji takik kaneeng.” 13Yôôch Lôôk Jê-xu đnooy dii padrok dưk xakaq kuun: “Dayh hooy yơu! Đaji kơy heq tuôq, varơuq nưq pheq jah dơơp jêêk ka kơy.” Ji adro xapok nưq heq jah payơh hlah đom wat nưq.

14Atêq tuôôy Lôôk Jê-xu muut đom hnhư ku Phi-e-rơ, Kadraq hloq miq kadrê ku kơy vik tol chanưng ji đong biq jiq tanget. 15Kadraq vêq muut ti ku mo, ji jiq tanget vlôh klơlh mo, yôôch mo 'ngôôy kah ji xarôp hơu varơuq Kadraq. 16Tuôôy nưq, tuôôy heq truh rayôôp klôôy, khơl drơy taway truh ka Kadraq 'ngưng dro biq kamuuych nhôp, Kadraq druyh kaluh garu xi nưq bơơn muuyq apok xanoh ji payơh ka dêq hloay khơl leq tavơh bingq, 17dơơp aleq ka varơuq nưq jah jêêk apok heq jah đnooy gamưh hnhư hlit Ê-sai, đaneq: “Kadih Kadraq heq pơq xok kaluh jiq jiêh ku haay ji heq gengq chiuq kaluh bingq tâk ku haay.”

18Tuôôy nưq, tuôôy 'yo hloq manih karôp rawiit gah kadraq, Lôôk Jê-xu patăk dưk hooy hlê gah pi hơq. 19Yôôch muuyq thơy pato ganuun, atêq tuôôy truh jeq, heq đnooy dii Kadraq: “Kuh thơy, gô hnoq tyauq thơy long thơy hooy ka'leq.” 20Lôôk Jê-xu đnooy kung kơy: “Ôô xaar e troop, ji xêêp plêêk e tapu, bơh Koot Manih leh e aduq đơu Kadraq hnoq ik angôôlh akoq.” 21Anưq yôôch, muuyq dro kadrơy đom khơl xatyauq tơơl dii Kadraq: “Kuh Lôôk, apôôy ăm pheep gô droyq dik laa wiit xuq ji up vaq gô.” 22Bơh Lôôk Jê-xu đnooy dii ay: “Dayh tyauq thơy, ji dayh xôq dro kaxêêt up dro kaxêêt ku oot.”

23Tuôôy Lôôk Jê-xu heq tok đom ge, khơl xatyauq ku Kadraq hooy tyauq Kadraq. 24'Yo hơq, muuyq đơơt khiel thier kôt xalih vlôh tol tahli, pheq đnooy ge biq daak ranaq kapuh. Bơh Kadraq đong vik. 25Yôôch tuôôy hlê jeq, oot nhơk kah Kadraq, tơơl: “Kuh Lôôk, apôôy Kadraq wơơt rơy; haay jeq kaxêêt yôôch!” 26Ji Kadraq đnooy dii oot: “Taleq dro axit xuum tuôq hơq, aleq oh ay yôq varaal?” Atêq nưq, tuôôy heq 'ngôôy kah, Kadraq toah khiel ji tahli, yôôych varơuq langưm hnhep xateek xalih vlôh. 27Măn khơl adro nưq akêh, đnooy: “Manih neq laa đaleq, vii pheq đnooy khiel ji tahli raay tameng apok kadraq?”

28Yôôch tuôôy Kadraq heq hooy hlê pi gah hơq, truh dêh Ga-đa-ra, vaarq dro biq kamuuych nhôp heq truh tavơh Kadraq, atêq tuôôy hooy vlôh xing aduq kalo xanưng, oot thier raa ramêq paq ik pheq dơơp leh kơyq hôôk xôq hooy dalơh hlê tyauq trôôk nưq. 29'Yo hơq, oot alo tok, đaneq: “Kuh Koot Kơy Plêêk, 'wot dii Kadraq e varơuq kajoq? Kadraq truh đnen xôq dơơp ra ơơh 'wot adroyq tuôôy paja xôq be?” 30Tuôôy nưq, e muuyq bơy xuur karôp 'ngưng đong xa kaplaalh xing oot leh xangưưy. 31Anưq yôôch, bing kamuuych apôôy vôôch Kadraq, đaneq: “Atoh Kadraq druyh 'wot, apôôy ăm 'wot nhôp muut bơy xuur nưq.” 32Kadraq patăk oot: “Hooy vlôh!” Anưq laa atêq tuôôy vlôh klơlh, bing oot nhôp muut bơy xuur; ji dayh 'yo hơq, dêq bơy charuyh paxưk pôôt tyauq trôôk ahmaat panưk jarooy vlôh tahli, yôôch oot kaxêêt 'laarq daak. 33Tuôôy nưq, khơl adro xakaq xuur ka'lăk xadăk, ji atêq tuôôy xuq truh theng, oot taboon hlê tôôy varơuq, hloay ka varơuq tajinq truh taleq adro biq kamuuych nhôp. 34Ji dayh 'yo hơq, dêq hloay theng garuk vlôh xôq tavơh Lôôk Jê-xu. Tuôôy heq hloq Kadraq, oot apôôy vôôch dơơp aleq ka Kadraq chuh hooy aduq kadrơy klơlh vari dêh ku oot.