Cua Bible Literal Text
Ma-thi-ơ 7
Te xadrah đnooy, xôq oh ay leh biq xưh xadrah đnooy. Vii đom varơuq rôp xadrah đơu oh ay xadrah đnooy, oh ay hnoq chiuq xadrah đnooy, ji bơyh hlưk wolh đơu oh ay heq hlưk wolh, hlưk wolh nưq hnoq jah hlưk wolh đôôyq dii oh ay. Đơu aleq oh ay 'yo hloq kapleh ka'nhah đom mot adro oh ay haay, bơh oh ay leh 'yo hloq talok gay đom mot oh ay? Long bơơn kach leq đơu oh ay hnoq dăt adro oh ay haay: ‘Dayh xôq gô xok kapleh ka'nhah vlôh klơlh mot ay,’ đơu 'yo hơq, talok gay đong măn đom mot oh ay? Adro xuum pa ôôh hơq! Droyq dik, dayh xok talok gay vlôh klơlh mot xăk, yôôych atêq nưq, oh ay hnoq hloq ro xôq xok kapleh ka'nhah vlôh klơlh mot adro oh ay haay. Oh ay te ăm bơy xo tuôông vah, kung te qweek kalook ngok ku oh ay kangưưr bơy xuur. Leh kheoq oot hnoq joaq jek kaluh ưng nưq 'laarq jôôk oot, ji atêq tuôôy wiit hlê yôôych oot kek chieh oh ay vlôh dong apek.
Dayh vôôch, ji varơuq nưq hnoq jah kahniq ka oh ay. Dayh axek, ji oh ay hnoq tavơh. Dayh pah, ji 'mok hnoq jah luh ka oh ay. Vii paq kê kơyq vôôch yôôych jah; kơyq axek yôôych tavơh; ji, 'mok hnoq jah luh ka kơyq pah. Long e kơyq đom khơl oh ay, laa adro đơu koot haay vôôch tôôp — dang aleq dro nưq hnoq ăm adro koot kuk phơu? Long adro koot kung vôôch ka — dang aleq adro nưq hnoq ăm ni volh? Anưq, atoh oh ay, laa xơuq, xet ăm koot xau haay kaluh kadrool tolh kaxay, yôôych Vaq ku oh ay tol daak plêêk hnoq kahniq ka adro leq vôôch Kadraq 'ngưng varơuq tolh kaxay iaq xet dong leq? Kơq nưq, đom tôôy varơuq, atoh oh ay trôôch paq kê varơuq kajoq xôq khơl drơy dơơp ka oh ay, yôôych oh ay kung dayh dơơp đanưq ka oot, vii nưq laa ganuun ji kaluh apok hlit.
Dayh hooy muut hlê 'mok de. Vii 'mok ranưh ji trôôk ranưh ranơơy jarooy truh varơuq kaxêêt hlơơp, ji e 'ngưng adro hooy muut aduq ni. Nưq laa kơq 'mok de ji trôôk jah dơơp ăm de jarooy truh varơuq riirh, đơu e axit adro axek hloq ni.
Dayh rơơt rol truh khơl hlit pa ôôh, laa khơl adro ayil kanôôp trưưu truh dii oh ay, bơh pi 'lăp, oot laa paroh xo vari hrah xa. Oh ay hnoq 'yo xet oot xing aduq play ku oot. Khơl drơy dang aleq e weelh nho xing pôôp jaliê, long play pok puut xing rek jaliê? Dang anưq, tôôy ưk kaxay yôôych raak play kaxay, măn ưk xơuq yôôych raak play xơuq. Ưk kaxay leh ik vlôh play xơuq, ưk xơuq kung leh ik vlôh play kaxay. Tôôy ưk leh vlôh play kaxay hnoq biq kơl ji qwel muut ôôlh. Lunưq, axit dik yôôych oh ay hnoq 'yo vlôh oot xing aduq play ku oot. Leh aalq tôôy dro đnooy dii thơy: ‘Kuh Lôôk, kuh Lôôk’, hnoq muut đom daak dêh daak plêêk, bơh laa adro dưk dơơp iq trôôch ku Vaq thơy tol daak plêêk. Đom hngơy nưq, 'ngưng dro hnoq tơơl kung thơy: ‘Kuh Lôôk, kuh Lôôk, be aalq 'wot koot heq taayh yal Kadraq đnooy hlit, heq taayh yal Kadraq druyh kamuuych ji heq taayh yal Kadraq dơơp 'ngưng varơuq taay yaak ih?’ Ji tuôôy nưq, thơy hnoq đnooy hlolh dii oot đaneq: ‘Gô be hmưq xet êêp dong leq! Bing dơơp xơk hơq, dayh chuh hooy klơlh Gô!’
Kơq nưq, tôôy dro, nưq laa paq kê kơyq tameng kaluh apok neq ku thơy ji dưk dơơp tyauq apok yôôych hnoq jah 'yo đaji muuyq dro khôôt xet, laa adro xơy hnhư ni tol talaat phơu. Jit răk pôôt, daak xako xuq, khiel klôôp ji kapuh kaxuh muut hnhư nưq, đơu ni leh hrưp vii ni heq jah xơy tol talaat phơu. Ji tôôy dro tameng kaluh apok neq ku thơy đơu leh dưk dơơp tyauq apok yôôych hnoq jah 'yo đaji muuyq dro vlô apoop, laa dro xơy hnhư ni tol choah. Jit răk pôôt, daak xako xuq, khiel klôôp ji kapuh muut hnhư nưq, yôôych ni hrưp pôôt ji varơuq hrưp hrek ku ni laa thier kôt.”
Varơuq xalih vlôh nưq laa tuôôy Lôôk Jê-xu pato dayq yôôch kaluh apok nưq, manih karôp biq akêh xing varơuq pato dayq ku Kadraq, vii Kadraq pato dayq oot đaji e qwuyen da uh, đơu leh dang đaji khơl thơy pato ganuun ku oot.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.