Cua Bible Literal Text
Ma-thi-ơ 9
Tuôôy heq muut đom ge, Kadraq dalơh hlê tahli ji xuq truh theng ku kadraq. 'Yo hơq, khơl drơy xagook truh ka Kadraq muuyq dro biq taqwauq talêêt đong vik tol xadôôk. Tuôôy Lôôk Jê-xu hloq xuum tuôq ku oot, Kadraq patăk dro biq taqwauq talêêt: “Nee koot, dayh kalh paraat tok. Kaluh kadrôôp maroh koot jah tha.” Ji 'yo hơq, muuyq sôôq đom kaluh thơy pato ganuun đnooy dii mamuuyq: “Adro neq đnooy katơơk galơh.” Bơh heq xet kaluh xuum biit ku oot, Lôôk Jê-xu đnooy: “Êêp kơy măn biit leh kaxay đom xuum êêp xôq dơơp kajoq? Vii varơuq leq laa klêq iaq xôq đnooy: ‘Kaluh kadrôôp maroh koot jah tha,’ long đnooy: ‘Dayh dưk tok ji tawaak hooy?’ Bơh xôq êêp kơy hnoq ik xet đaneq Koot Manih e qwuyen măn tol vari xôq tha kadrôôp …” yôôych muut tuôôy nưq, Kadraq dăt adro biq talêêt: “Dayh dưk tok, galơuq xadôôk tok, ji hooy xuq hnhư ay.” Ji atêq tuôôy dưk tok, dro nưq hooy xuq hnhư ni. Anưq laa, tuôôy hloq anưq, manih karôp yôq varaal ji ayuôôt laat Kơy Plêêk vii heq kahniq ka koot manih qwuyen da uh lunưq. Tuôôy heq xing aduq nưq chuh hooy, Lôôk Jê-xu 'yo hloq muuyq dro anơng Ma-thi-ơ đong 'ngôôy aduq xok xơu, yôôch Kadraq dăt kơy: “Dayh tyauq thơy.” Ji atêq tuôôy dưk tok, kơy hooy tyauq Kadraq.
Varơuq xalih vlôh tuôôy Kadraq 'ngôôy xa đom hnhư, yôôych 'yo hơq, 'ngưng manih xơk xơu ji adro e kadrôôp hooy truh, heq 'ngôôy muut para xa kung Lôôk Jê-xu ji khơl xatyauq Kadraq. Tuôôy tameng hloq anưq, khơl manih Pha-ri-si đnooy dii khơl xatyauq Kadraq: “Vii kơq kajoq đơu thơy ku êêp ay xa achung dii bing xok xơu ji adro e kadrôôp?” Bơh atêq tuôôy tameng hloq, Kadraq đnooy: “Manih kalh paraat leh e duh truh thơy jarơơu, đơu laa adro jiq bingq. Măn atêq tuôôy hooy klơlh, dayh hok hlolh apok neq laa aleq: ‘Gô trôôch xuum biit angơuq, leh aalq kuah tưp.’ Vii be aalq gô truh xôq taayh manih hyioh jăk, bơh laa dro e kadrôôp.”
Tuôôy nưq, khơl xatyauq ku Jăng truh tavơh Kadraq, tơơl: “Vii kơq kajoq đơu 'wot ji khơl manih Pha-ri-si 'ngưng deek xa, măn khơl xatyauq ku thơy yôôych leh deek xa?” Lôôk Jê-xu đnooy dii oot: “Dang aleq khơl 'wơyq truh jưq waal pajêêk hnoq ik hlu rơu đom kawah chưng nưq đơu ok măn kung dii oot? Bơh hnoq truh hngơy tuôôy đơu ok biq taway hooy klơlh oot, yôôych tuôôy nưq oot hnoq deek xa. Đêh vlôh, leh kơyq kaval muuyq apek vaayh đơơu koq biq ta hnhoot muut apek aau duut, vii apek kaval hnoq dơơp tahyaak klơlh apek aau nưq, ji muuyq hlêêl tahyaak măn têq iaq tuôôy ni e. Kung leh kơyq kliik lok đơơu muut bơu kađuh duut. Bơh atoh be aalq anưq, yôôych e đaneq bơu kađuh biq mich vadah, lok biq ahngok vlôh ji bơu biq hư. Tađôôy muut đnư, khơl drơy kliik lok đơơu muut bơu kađuh đơơu, ji dêq tavaarq jah jư hlê.”
Đom tuôôy Kadraq đong đnooy kaluh apok nưq dii oot, yôôych 'yo hơq, muuyq dro dưk xakaq hnhư tagumq atêq tuôôy truh jeq, heq kul pôôt kangưưr Kadraq, tơơl đaneq: “Koot kadrê gô vơ đơơu kaxêêt, anưq bơh tuôôy truh đnư, apôôy dayh xôq ti thơy tol koot kadrê, yôôych koot kadrê hnoq riirh.” Atêq tuôôy dưk kah, Lôôk Jê-xu ji khơl xatyauq Kadraq hooy tyauq kơy nưq. Ji 'yo hơq, muuyq dro khơl drê heq raanq chiuq jiq bingq be drơy tuôôt kưl vaarq xanưm, tuôôy tawaak truh pi atêq Kadraq yôôch, yôôych heq vêq muut thơơl aau ku Kadraq, Vii mư kadih biit: “Atoh gô vơ vêq muut aau Kadraq heq, yôôych gô hnoq jah yơh bingq.” Bơh atêq tuôôy wih hlê ji hloq mư, Lôôk Jê-xu đnooy: “Koot kadrê lơơy, dayh kalh paraat; xuum tuôq koot heq payơh koot.” Ji dro khơl drê nưq jah yơh bingq xing wat nưq. Yôôch Lôôk Jê-xu, atêq tuôôy hooy truh hnhư adro dưk xanok hnhư tagumq nưq ji hloq taleq dro klôôp taliaq kung manih karôp tarok 'nhih, heq patăk: “Dayh chuh vlôh, vii koot kadrê heq leh kaxêêt, bơh laa đong vik.” Yôôch oot xagiel ra ơơh Kadraq. Anưq laa, tuôôy manih karôp biq đuôôy vlôh pi gôk yôôch, yôôych atêq tuôôy muut 'lăp, Kadraq adrơk ti koot kadrê, ji koot kadrê nưq kadih 'ngôôy kah. Hêêl neq jah đnooy vlôh loch dêq dêh nưq.
Đong tuôôy Lôôk Jê-xu xing aduq nưq chuh hooy, yôôych vaarq dro apul heq hooy tyauq Kadraq, taayh kôt ji tơơl: “Kuh Koot vuua Đa-vik, apôôy biit angơuq ka 'wot!” Tuôôy nưq, tuôôy muut đom hnhư yôôch, vaarq dro apul truh jeq Kadraq ji Lôôk Jê-xu đnooy dii oot: “E jơq êêp ay tuôq đaneq gô hnoq ik dưk dơơp varơuq nưq?” Oot đnooy dii Kadraq: “Jơq, kuh Lôôk.” Atêq nưq, Kadraq vêq muut mot oot, đnooy: “Varơuq nưq pheq jah xalih vlôh ka êêp ay tyauq đaji xuum tuôq ku êêp ay.” Mot oot jah luh vlôh, ji Lôôk Jê-xu đnooy dăt oot, đaneq: “Dayh rơơt rol, êêp ay te ăm kơyq xet.” Bơh atêq tuôôy vlôh pi gôk, oot taboon hlê varơuq nưq loch dêq dêh nưq.
Tuôôy nưq, đong tuôôy oot hooy vlôh, yôôych 'yo hơq, khơl drơy jarooy truh ka Kadraq muuyq dro hôp biq kamuuych nhôp. Tuôôy kamuuych biq druyh yôôch, yôôych dro hôp đnooy ik, ji manih karôp tưng hưng, đnooy: “Muuyq varơuq lunưq koq hmưq dong leq jah kahnoq vlôh đom I-sơ-ra-ên!” Bơh khơl manih Pha-ri-si 'miêh đnooy: “Kơy nưq druyh kamuuych gamưh muut lôôk kamuuych.”
Lôôk Jê-xu hooy hlê kađneng kahơ dêq hloay kaluh theng ji palơy pla, pato dayq đom kaluh hnhư tagumq ku manih dêh, pato dayq Hêêl Kaxay ku daak plêêk, ji payơh tưng bingq tâk kung tôôy jiq jiêh. Tuôôy nưq, tuôôy 'yo hloq bing manih karôp, Kadraq biit angơuq ka oot, bơyh oot đong biq pơơl dal ji chiuq hyaak hlơơp, đaji trưưu leh e manih xakaq. Atêq nưq, Kadraq đnooy dii khơl xatyauq kadraq: “Tabơh xiêk goch yôôych trungq, bơh manih goch yôôych axit. Kơq nưq, dayh apôôy vôôch Kôôch ku xiêk goch, dơơp aleq ka Kadraq patăk dăt khơl manih goch muut đom xiêk goch ku kadraq.”
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.