Ma-thi-ơ 28

1Tuôôy nưq, atêq hngơy Sa-bat, tuôôy xaroq meel hngơy droyq dik đom twuân đong truh, Ma-ri Ma-đơ-len ji muuyq Ma-ri kadrơy truh hlơq xanưng. 2'Yo hơq, muuyq đơơt ahrưng vari kôt heq xalih vlôh, vii muuyq yaak plêêk ku Lôôk, atêq tuôôy xing plêêk kahri pôôt ji truh jeq, heq palanh kuk phơu yôôch 'ngôôy tol nưq. 3Tuôôy nưq, long lơuq ku kơy nưq yôôych dang đaji kablek, măn aau ku kơy yôôych ko đaji raak parier. 4Anưq yôôch, kơq padrau vadrih vii kơy nưq, bing kuun jư 'yo biq phoch ji vlôh jêêk đaji dro kaxêêt. 5Bơh tuôôy lơh apok, yaak plêêk đnooy dii khơl dro khơl drê: “Êêp ay te yôq, vii gô xet đaneq êêp ay axek Lôôk Jê-xu, Kơy heq biq đongq đing. 6Kadraq leh măn đnen 'leq, vii Kadraq jah khienq riirh hlê yôôch, jơq dang đaji Kadraq heq xanoh. Truh đnen yơu, dayh 'yo aduq đơu Kadraq heq vik. 7Yôôch atêq tuôôy dayh dayh dưk hooy, dayh taboon ka khơl xatyauq Kadraq đaneq: ‘Kadraq heq jah khienq riirh hlê xing aduq kaxêêt. Ji 'yo hơq, Kadraq đong hooy adroyq oh ay truh Ga-li-lê, Aduq nưq, oh ay hnoq tavơh Kadraq.’ 'Yo nee, gô heq đnooy ka êêp mư xet yôôch nưq.” 8Ji tuôôy dayh dayh chuh klơlh xanưng dii varơuq varaal yôq hloay hlah hlaak paq ik, oot heq charơơk hooy xôq taboon hêêl ka khơl xatyauq ku Kadraq. 9'Yo nee, Lôôk Jê-xu tavơh oot, đnooy: “Wơơy khơl mư!” Yôôch atêq tuôôy truh jeq, oot kabiin jôôk Kadraq ji kuh ayuôôt Kadraq. 10Atêq nưq, Lôôk Jê-xu đnooy dii oot: “Te yôq. Dayh hooy, taboon hêêl ka khơl oh ay ku thơy xôq oot hnoq ik dưk hooy truh Ga-li-lê, ji aduq nưq, oot hnoq tavơh thơy.”

11Tuôôy nưq, đong tuôôy oot hooy trôôk, 'yo nee, taleq dro đom sôôq bing kuun jư 'yo, atêq tuôôy muut đom theng, heq taboon hlê ka khơl thơy tơơk tưp kôt tôôy varơuq heq xalih vlôh. 12Ji tuôôy heq jah anguk hlê kung dii khơl draq, vơ hloay tajauq athêêk yôôch, oot heq ăm bing kuun muuyq sôôq jêêt dong taxưngq, 13dăt đaneq: “Dayh đnooy: ‘Atêq tuôôy truh muut ka klôôy, khơl xatyauq ku ni heq atôk xaak ni đom tuôôy 'wot đong vik.’ 14Ji atoh hêêl neq jah đnooy ka padrok xanok dêh, 'wot hnoq đnooy xok xuum kơy nưq ji dơơp ka êêp ay klơlh pơơl hwơơl.” 15Anưq yôôch, atêq tuôôy xok jêêt, bing nưq dơơp đaji heq jah patăk dăt. Hêêl neq jah đnooy vlôh ranưh ranơơy đom tamooy Jo Thaiq, pheq đnooy dong truh hngơy neng.

16Tuôôy nưq, kưl muuyq khơl xatyauq heq hooy truh Ga-li-lê, truh ngok đoot đơu Lôôk Jê-xu heq pato đnooy ka oot. 17Ji tuôôy heq tavơh Kadraq, oot kuh ayuôôt Kadraq, bơh taleq dro biit ravơq. 18Atêq tuôôy tawaak truh jeq, Lôôk Jê-xu athêêk dii oot, đaneq: “Tôôy qwuyen da uh tol plêêk ji 'laarq vari heq jah pahnăp ka thơy. 19Vii anưq, tuôôy hooy, oh ay dayh pato khienq dêq hloay kaluh tamooy, dơơp bap-tem ka oot đom yal Vaq, Koot ji Kơy Phool Hiel; 20pato dayq oot xôq tameng jư tôôy varơuq đơu thơy heq pato ka oh ay. Ji 'yo nee, thơy măn kung dii oh ay tôôy hngơy dong truh hngơy hlơơp dêh.”