Cua Bible Literal Text
Ma-thi-ơ 27
Tuôôy nưq, muut tuôôy xaroq meel, dêq hloay khơl thơy tơơk tưp kôt ji khơl draq đom manih karôp heq tajauq xôq vih dơơp đaleq tachơơl hlê Lôôk Jê-xu xôq păk kaxêêt Kadraq dơyh. Tuôôy heq vek Kadraq hlê, oot jarooy Kadraq hooy ji noop ăm ka padrok dêh Phi-lat.
Tuôôy nưq, atêq tuôôy Ju-đa, dro xalih xuum Kadraq, hloq đaneq Kadraq heq biq rôp xadrah, yôôych vii wiit xuum, ni heq bla hlê pe kưl xiêk-lơ baak ka khơl thơy tơơk tưp kôt ji khơl draq, đnooy đaneq: “Gô heq lôp kadrôôp vii noop vahaap be e kadrôôp.” Bơh oot đnooy: “Tajinq kajoq truh 'wot? Ay kadih chiuq.” Ji atêq tuôôy qweek taleq xiêk-lơ baak muut đom hnhư hơu, ni wih xuq, ji tuôôy hooy xangưưy yôôch, ni hnek ranong kaxêêt kadih. Tuôôy nưq, atêq tuôôy tôôch sôôq xiêk-lơ baak tok, khơl thơy tơơk tưp kôt đnooy: “Xôq sôôq baak neq muut kho ku hnhư hơu laa leh xaay vii nưq laa kajaq ku vahaap.” Bơh tuôôy heq athêêk tajauq yôôch, oot heq root manay hluôôt ku dro thơq hu vari bơơn sôôq baak nưq deng ka varơuq up xôq khơl xing kadrơy. Vii anưq, manay hluôôt nưq jah taayh laa “Ruôngq Vahaap” dong truh hngơy neng. Anưq laa, raay jah đnooy adroyq bơyh hnhư hlit Jê-rê-mi heq jah jêêk, đaneq: “Oot xok pe kưl xiêk-lơ baak, laa kajaq ku dro jah đinq, laa dro đơu heq jah jauq jaq xing aduq koot xau I-sơ-ra-ên, ji oot heq ăm sôôq baak nưq xôq xok manay hluôôt ku thơq hu vari, dang đaji Lôôk heq đnooy pato gô.”
Tuôôy nưq, Lôôk Jê-xu dưk kangưưr padrok dêh, ji kơy padrok nưq vôôch 'yo Kadraq, đaneq: “Jơq be ay laa vuua manih Jo Thaiq?” Yôôch Lôôk Jê-xu đnooy dii kơy nưq: “Kơy đong đnooy nưq.” Ji đom tuôôy Kadraq biq rôp kadrôôp xing khơl thơy tơơk tưp kôt ji khơl draq, yôôych Kadraq be tơơl hlê varơuq kajoq. Atêq nưq, Phi-lat đnooy kung Kadraq: “Ay leh tameng xet dong leq varơuq oot đong dơơp xanưk tachơơl hlê ay ih?” Ji Kadraq heq leh tơơl apok kơy nưq, pheq đnooy bơơn muuyq apok kung leh, pheq dơơp padrok dêh hloq akêh dik. Tuôôy nưq, muut katuôôy lêh, padrok dêh 'miêh e ganuun luh vlôh ka manih karôp muuyq dro lôp kadrôôp đơu oot rơơlh xok. Mot kadrơy, đom kawat nưq, khơl drơy đong karuk muuyq dro tu kơyq kung xet jah taayh laa Ba-ra-ba. Anưq, atêq tuôôy oot jah anguk hlê, Phi-lat đnooy dii oot: “Êêp kơy trôôch gô luh kơyq ka êêp kơy? Ba-ra-ba, long Jê-xu, dro jah taayh laa Lôôk Wơơt Dêh?” Vii kơy 'miêh xet đaneq oot heq noop Kadraq ka kơy xing xuum 'yo 'yarơ. Tuôôy nưq, đom tuôôy kơy đong 'ngôôy tol ragê xưh xadrah, kadrê ku kơy heq patăk atăq apok đnooy truh kơy, đaneq: “Apôôy be varơuq kajoq xalih truh ka ay ji ka manih hyioh jăk nưq. Vii hngơy neng, oh jiq areh paq ik bơyh muuyq vik apau truh dro neq.” Măn khơl thơy tơơk tưp kôt ji khơl draq ahluk manih karôp xôq oot đnooy dăt luh Ba-ra-ba đơu păk kaxêêt Lôôk Jê-xu. Bơh xôq tơơl hlê, padrok dêh đnooy dii oot: “Êêp kơy trôôch gô luh kơyq đom vaarq dro neq ka êêp kơy?” Yôôch oot đnooy: “Ba-ra-ba.” Phi-lat đnooy dii oot: “Anưq, gô kơn dơơp kajoq dii Jê-xu, manih jah taayh laa Lôôk Wơơt Dêh?” Dêq hloay bing oot tơơl: “Ni pheq biq đongq đing tol gay charăk.” Bơh kơy đnooy: “Vii varơuq xơk leq đơu ay nưq heq lôp?” Lunư, oot kơn tarok kôt iaq, đaneq: “Ni pheq biq đongq đing tol gay charăk.” Tuôôy nưq, Phi-lat, atêq tuôôy hloq đaneq ni leh waak ik kajoq, bơh tađôôy muut đnư, muuyq đơơt paloanq đong xung vlôh, yôôych tuôôy ăm xok daak yôôch, kơy heq 'nhaau ti kơy kangưưr manih karôp, đnooy: “Gô leh e kadrôôp aduq vahaap ku dro neq. Êêp kơy kadih chiuq.” Ji tuôôy tơơl hlê, dêq hloay manih karôp đnooy: “Vahaap ku ni măn tol 'wot ji tol koot xau 'wot.” Atêq nưq, kơy nưq luh Ba-ra-ba ka oot, yôôch tuôôy heq ăm tiel Lôôk Jê-xu, Kơy ăm jarooy Kadraq hooy xôq chiuq đongq đing tol gay charăk.
Tuôôy nưq, atêq tuôôy jarooy Lôôk Jê-xu muut đom hnhư padrok dêh, khơl bing kuun ku padrok dêh heq anguk hlê kangưưr Kadraq dêq hloay bing kuun. Atêq tuôôy leh aau Kadraq, oot pahlưp muuyq poop aau aklum phôôm dôôp rưk tol Kadraq. Tuôôy dơơp muuyq poop đoat bơơn jaliê yôôch, oot xôq tol akoq Kadraq, kung gay muut ti akoh Kadraq, ji atêq tuôôy kul pôôt kangưưr Kadraq, oot đnooy ra ơơh Kadraq, đaneq: “Kuh qwaay Vuua tamooy Jo Thaiq!” Yôôch atêq tuôôy kaxôh muut Kadraq, oot xok gay ji kưq tiel tol akoq Kadraq. Tuôôy oot đnooy ra ơơh Kadraq yôôch, oot leh aau aklum vlôh ji pahlưp muut ka Kadraq aau ku Kadraq, yôôch ahwoa Kadraq hooy xôq đongq đing tol gay charăk.
Tuôôy nưq, đong tuôôy hooy vlôh, oot hloq muuyq dro xing Si-ren, anơng Si-môn, đơu oot băt dăt xôq kơy hlôôy gay charăk ku Kadraq. Atêq tuôôy hooy truh muuyq aduq jah taayh laa Gô-gô-tha, đơu aduq nưq iq laa “Aduq Kadah,” Oot ăm Kadraq hôôch lok jah aluq dii kamit pahlăk. Tuôôy heq nhemq yôôch, yôôych Kadraq leh chiuq hôôch. Tuôôy nưq, tuôôy đongq đing Kadraq tol gay charăk yôôch, oot ahlook mamuuyq aau ku Kadraq bơơn varơuq bôk thăm, ji oot 'yo jư Kadraq, tuôôy 'ngôôy aduq nưq. Pi ataalh akoq Kadraq, oot xôq athêêp apok rôp kadrôôp ku Kadraq, jah valơk luneq: “Neq laa Jê-xu, Vuua manih Jo Thaiq.” Tuôôy nưq, e vaarq dro varoh biq đongq đing dii Kadraq, muuyq dro măn pi akoh ji muuyq dro măn pi akeng. Khơl dro hooy dalơh đnooy ra ơơh Kadraq, ngol ngelh akoq oot ji đnooy: “Nee dro pahyaak ka'lăk hnhư hơu ji panưk hlê đom pe hngơy hơq, dayh kadih wơơt xăk yơu! Atoh may laa Koot Kơy Plêêk, yôôych dayh pôôt klơlh gay charăk!” Kung muuyq đanưq, khơl thơy tơơk tưp kôt, kung dii khơl thơy pato ganuun ji khơl draq, tuôôy đnooy ra ơơh Kadraq, heq đnooy: “Ni heq wơơt khơl dro kadrơy; ni yôôych be e paraat kadih wơơt ni. Ni laa Vuua ku I-sơ-ra-ên. Juneq, ni pheq pôôt klơlh gay charăk, yôôych haay hnoq tuôq aduq ni. Ni tuôq gamưh aduq Kơy Plêêk; Juneq yôôych dayh xôq Kadraq wơơt ni atoh Kadraq trôôch ni. Vii ni heq đnooy đaneq: ‘Gô laa Koot Kơy Plêêk.’” Mot kadrơy, kadih taleq dro atôk, laa khơl dro biq đongq đing dii Kadraq, bing oot kung đnooy ra ơơh Kadraq.
Tuôôy nưq, xing wat thưq drơu, kamơng jaluk vlôh e tol loch dêq dêh dong truh wat thưq xit. Yôôch kawah wat thưq xit, Lôôk Jê-xu taayh muuyq apok kôt, đaneq: “Ê-li, Ê-li, la-ma sa-bach-tha-ni?” iq laa “Kơy Plêêk gô lơơy, Kơy Plêêk gô lơơy, aleq Kadraq chuh ka'lăk gô?” Bơh atêq tuôôy tameng anưq, taleq dro 'miêh dưk đnư đnooy đaneq: “Ni taayh Ê-li.” Vơ hloay, muuyq dro đom sôôq oot, atêq tuôôy charơơk hooy ji xok kuk kamuh tahli, vơ hnhuuk viik daak voh đơu ta'măk tol gay kadeer, heq palo ka Kadraq hôôch. Bơh khơl dro măn laay đnooy: “Dayh kê ka ni. Haay 'yo lưp e Ê-li e truh wơơt ni be.” Anưq yôôch, atêq tuôôy laay taayh atok muuyq apok kôt, Lôôk Jê-xu truut phool hiel. Ji 'yo hơq, tômq vaayh ku hnhư hơu biq chieh dơơp vaarq xing taalh pôôt 'laarq, măn vari biq ahrưng, ji phơu kôt biq padah vlôh. 'Ngưng xanưng biq luh hwong ji 'ngưng xaak ku khơl manih vah heq vik jah khienq riirh hlê. Ji tuôôy vlôh klơlh xanưng atêq varơuq riirh hlê ku Kadraq, oot heq muut đom theng vah ji rama vlôh ka 'ngưng dro. Tuôôy nưq, atêq tuôôy hloq ahrưng vari ji kaluh varơuq xalih vlôh, padrok xanok kuun kung khơl dro đong jư 'yo Lôôk Jê-xu kung dii kơy heq biq varaal yôq paq ik, đnooy đaneq: “Dong dik, dro neq laa Koot Kơy Plêêk.” Măn e 'ngưng khơl drê aduq nưq, 'yo tavooy xing xangưưy, laa khơl dro heq hooy tyauq Lôôk Jê-xu, hơu varơuq Kadraq xing dêh Ga-li-lê. Đom sôôq oot e Ma-ri Ma-đơ-len, Ma-ri miq Ja-kơ ji Jô-sep, kung miq ku khơl koot kanau Xê-bê-đê.
Tuôôy nưq, tuôôy heq truh rayôôp klôôy, muuyq dro karoh heq truh xing A-ri-ma-thê, anơng laa Jô-sep, đơu kadih xăk kơy kung chiuq dơơp khơl xatyauq tyauq Lôôk Jê-xu. Atêq tuôôy truh tavơh Phi-lat, kơy vôôch xaak Lôôk Jê-xu. Tuôôy nưq, Phi-lat patăk ăm xôq xaak jah pahnăp ka kơy. Tuôôy heq xok xaak, Jô-sep ahnom xaak nưq hlê đom vaayh lanh xarêh, yôôch xôq xaak muut xanưng đơơu ku kadih kơy đơu kơy heq đuk đom troop phơu. Tuôôy palanh muuyq kuk phơu kôt kateep 'mok xanưng yôôch, kơy chuh hooy. Tuôôy nưq, Ma-ri Ma-đơ-len ji muuyq Ma-ri kadrơy măn đnư, 'ngôôy tahyioh dii troop xanưng.
Yôôch hngơy atêq, nưq laa atêq hngơy Ralauq Xôq, khơl thơy tơơk tưp kôt ji khơl manih Pha-ri-si heq jah anguk tagumq hlê kangưưr Phi-lat, tơơl đaneq: “Kuh padrok, 'wot văch đaneq tuôôy măn riirh, adro pa ôôh lar hơq heq đnooy: ‘Atêq pe hngơy, yôôych gô jah khienq riirh hlê.’ Kơq nưq, xiin ăm apok xôq xanưng jah jư kajưk dong kajưk dong truh hngơy thưq pe. Atoh leh, khơl xatyauq ku ni truh yôôch, hnoq ik atôk xaak ni, ji đnooy dii manih karôp: ‘Kadraq heq jah khienq riirh hlê xing aduq kaxêêt,’ yôôych varơuq pa ôôh aluut atêq neq hnoq măn ra ơơh iaq tuôôy droyq.” Anưq yôôch Phi-lat đnooy dii oot: “Êêp kơy e kuun jư 'yo. Hooy yơu, pheq jư kajưk dong kajưk đaji êêp kơy xet.” Yôôch atêq tuôôy hooy, dơơp dơuq tol phơu 'mok kung dii kuun jư 'yo, oot hôôk kajưk xanưng jah jư kajưk.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.