Skip to content
BibleKenya

Cua Bible Literal Text

Ma-thi-ơ 26

Varơuq xalih vlôh tuôôy Lôôk Jê-xu heq đnooy payôôch dêq hloay kaluh apok nưq, Kadraq dăt khơl xatyauq kadraq: “Oh ay xet đaneq vaarq hngơy tra hnoq truh Lêh Dalơh hlê, ji Koot Manih hnoq biq rôp xôq chiuq đongq đing tol gay charăk.” Tuôôy nưq, khơl Thơy tơơk tưp kôt ji khơl draq đom manih karôp heq jah anguk hlê đom hnhư ku Thơy tơơk tưp kôt, anơng laa Kai-phe. Oot kung mamuuyq tajauq athêêk xôq oot hnoq ik bơơn xôq vih rôp jư Lôôk Jê-xu ji păk kaxêêt dơyh. Bơh oot đnooy: “Leh aalq đom tuôôy lêh, xôq paloanq leh xalih vlôh đom khơl manih karôp.”

Tuôôy nưq, tuôôy Lôôk Jê-xu heq măn aduq Bê-tha-ni, đom hnhư Si-môn, dro biq jiq paruh, muuyq khơl drê adrơk kave ngok tađnưk daak jơu thơơm thier mach jêêt truh jeq Kadraq, ji mư uk tol akoq Kadraq, đong tuôôy 'ngôôy xa. Bơh atêq tuôôy hloq anưq, khơl xatyauq tôq jaraq, đnooy: “Dơơp alay đanưq xôq dơơp kajoq? Vii jơu neq hnoq ik tek jah 'ngưng jêêt ji ăm hloh ka khơl adrah.” Bơh xet varơuq neq, Lôôk Jê-xu dăt oot: “Aleq oh ay dơơp khoq dro khơl drê neq? Vii mư heq dơơp muuyq varơuq kaxay ka thơy. Bơyh oh ay hloay e manih adrah măn dii oh ay, bơh leh aalq oh ay hloay e thơy. Vii tuôôy mư uk jơu neq tol xăk thơy, mư heq dơơp thay ka varơuq up xôq thơy. Dong dik, thơy đnooy dii oh ay, long aduq leq Hêêl Kaxay neq jah padoh vlôh loch tol dêh araak, yôôych varơuq mư neq heq dơơp kung hnoq jah đnooy truh đom varơuq văch hlê truh mư.”

Tuôôy nưq, muuyq đom kưl vaarq dro jah rơơlh, anơng laa Ju-đa Ich-ka-ri-ôt, atêq tuôôy hooy truh kung khơl thơy tơơk tưp kôt, heq đnooy: “Êêp kơy chiuq bla gô taleq, yôôch gô hnoq pahnăp dro nưq ka êêp kơy?” Anưq laa, oot duh ăm ka ni pe kưl xiêk-lơ baak. Ji xing kawat nưq, ni xarôp axek kawah xôq hnoq ik rôp noop Kadraq.

Tuôôy nưq, muut hngơy adroyq dik ku lêh Tôôp Leh Tape, khơl xatyauq truh jeq Lôôk Jê-xu, tơơl: “Thơy trôôch 'wot ralauq xôq ka thơy xa lêh Dalơh Hlê ka'leq?” Yôôch Kadraq tơơl: “Dayh hooy muut theng, truh dii muuyq dro hơq ji đnooy dii ay nưq: ‘Thơy đnooy: “Kawah ku thơy yôôych đong jeq yôôch; thơy dưk dơơp lêh Dalơh Hlê aduq hnhư ay kung dii khơl xatyauq thơy.”’” Khơl Xatyauq dơơp đaji Lôôk Jê-xu đnooy pato oot, ji oot ralauq xôq lêh Dalơh Hlê.

Tuôôy nưq, tuôôy truh klôôy, Kadraq 'ngôôy xa kung dii kưl vaarq dro jah rơơlh. Tuôôy oot đong xa, Kadraq đnooy: “Dong dik, thơy đnooy dii oh ay đaneq muuyq dro đom oh ay hnoq tachơơl hlê thơy.” Vii hlu rơu paq ik, tôôy dro muuyq xarôp tơơl kung Kadraq: “Lôôk lơơy, leh aalq laa gô iq?” Bơh xôq tơơl apok, Kadraq đnooy: “Dro heq vêq ti ni muut đom dơơt achung dii thơy, dro nưq hnoq tachơơl thơy. Tabơh Koot Manih hnoq vlôh hooy, tyauq đaji apok heq jah valơk truh Kadraq, bơh ra ơơh ka dro nưq, bơyh ni đơu Koot Manih biq tachơơl hlê! Atoh dro nưq 'miêh heq leh jah pa iir vlôh yôôych tolh iaq ka ni.” Bơh tuôôy tơơl hlê, Ju-đa, dro tachơơl Kadraq, đnooy: “Ra-bi, dang aleq laa gô?” Kadraq đnooy dii kơy: “Ay heq kadih đnooy yôôch.”

Tuôôy nưq, tuôôy oot đong xa, tuôôy xok tôôp ji kuh qwaay yôôch, Lôôk Jê-xu heq pleelh ni vlôh. Ji atêq tuôôy palo ka khơl xatyauq, Kadraq đnooy: “Dayh nhonq xok, xa yơu. Neq laa xăk xamơk ku thơy.” Ji tuôôy xok dooy ji kuh qwaay yôôch, Kadraq heq palo ka oot, đnooy: “Dêq hloay dayh hôôch aduq dooy neq. Vii neq laa vahaap tavek ku thơy jah ahngok vlôh đôôyq dii 'ngưng dro deng ka varơuq tha ka'lăk kadrôôp maroh. Bơh Thơy đnooy dii oh ay 'yo xing kawah neq, thơy kajưk dik hnoq leh hôôch aduq daak nho neq dong truh hngơy nưq, laa tuôôy đơu thơy hôôch daak nho đơơu achung dii oh ay đom daak dêh ku Vaq thơy.”

Atêq tuôôy haat kacheeu vah, oot vlôh hooy tok đoot Ô-liu. Tuôôy nưq, Lôôk Jê-xu đnooy dii oot: “Đom ka klôôy neng, dêq hloay oh ay hnoq biq xatôôlh gưlh aduq thơy, vii apok heq jah valơk:

‘Gô hnoq hmơt dro xakaq

yôôch trưưu ku bơy hnoq biq hyaak hyul.’

Yôôch atêq tuôôy thơy jah khienq riirh hlê, thơy hnoq hooy adroyq oh ay truh Ga-li-lê.” Bơh tơơl hlê, Phi-e-rơ tơơl dii Kadraq: “Long dêq hloay hnoq biq xatôôlh gưlh aduq thơy, bơh gô hnoq leh 'leq biq xatôôlh gưlh.” Lôôk Jê-xu đnooy dii kơy: “Dong dik, thơy đnooy dii ay, đaneq đom ka klôôy neq, adroyq tuôôy ier rok, ay hnoq chôôyq thơy pe yưk.” Phi-e-rơ tơơl dii Kadraq: “Pheq đnooy atoh băt gô pheq kaxêêt dii thơy, gô kajưk dik hnoq leh chôôyq thơy.” Ji dêq hloay khơl xatyauq kung đnooy dang đanưq.

Atêq nưq, Lôôk Jê-xu hooy kung dii oot truh muuyq aduq jah taayh laa Gêt-sê-ma-nê, ji Kadraq dăt khơl xatyauq: “Dayh 'ngôôy đnen tuôôt katuôôy thơy truh pi hơq apôôy.” Atêq tuôôy jarooy tyauq Phi-e-rơ ji vaarq koot kanau ku Xê-bê-đê, Kadraq xarôp jiq hlu ji xôôl dôôl akoq. Tuôôy nưq, Kadraq đnooy dii oot: “Phool hiel thơy đong hlu rơu paq ik dong truh kaxêêt. Dayh măn hlê đnen ji parol 'yo achung dii thơy.” Tuôôy heq hooy xangưưy athêêp muut xit, Kadraq kul mot kadraq pôôt, apôôy ji tơơl: “Vaq ku koot lơơy, atoh varơuq neq laa hnoq ik, apôôy ăm dooy neq dalơh klơlh koot. Long anưq, leh đaji koot trôôch, đơu laa đaji Vaq.” Yôôch Kadraq truh dii khơl xatyauq ji hloq oot đong vik, yôôych Kadraq đnooy dii Phi-e-rơ: “Anưq laa, oh ay be ik parol 'yo dii thơy ik muuyq wat ih? Dayh parol 'yo ji apôôy xôq oh ay be huq gưlh muut adô aluut. Tabơh phool hiel yôôych trôôch, đơu xăk xamơk yôôych ravoch.” Muuyq yưk tra, tuôôy hooy klơlh muut yưk vaarq, Kadraq apôôy, đaneq: “Vaq ku koot lơơy, atoh varơuq neq be hnoq ik dalơh hooy, đơu koot hôôch dooy nưq, yôôych apôôy iq Vaq jah yuôôr.” Atêq tuôôy truh yưk tra, Kadraq hloq oot đong vik, vii mot oot heq biq kaliêu lakôôp. Ji muuyq yưk tra, atêq tuôôy xôq oot hlê yôôch hooy, Kadraq apôôy muut yưk thưq pe, tơơl kung kaluh apok đanưq đnoyq. Atêq nưq, Kadraq truh dii khơl xatyauq ji đnooy dii oot: “Oh ay măn đong vik ji padơy vado ih? 'Yo hơq, wat truh jeq yôôch, ji Koot Manih đong biq noop muut ti khơl dro e kadrôôp. Dayh dưk kah, haay duh hooy yơu. 'Yo nee, dro xalih xuum thơy hooy truh yôôch.”

Tuôôy Kadraq măn đong đnooy, yôôych 'yo hơq, Ju-đa, muuyq đom kưl vaarq dro jah rơơlh, truh, ji kung dii ni laa muuyq bing manih thier karôp kung xieh ji gay, xing aduq khơl thơy tơơk tưp kôt ji khơl draq đom manih karôp. Tuôôy nưq, dro xalih xuum Kadraq heq ăm oot muut hlêêl dơuq, đaneq: “Dro leq đơu gô hiip yôôych laa dro nưq. Dayh rôp kơy nưq.” Vơ hloay, atêq tuôôy truh jeq Lôôk Jê-xu, ni đnooy: “Kuh Ra-bi!” yôôch ni hiip Kadraq. Bơh Lôôk Jê-xu đnooy dii ni: “Nee 'wơyq, vii varơuq neq đơu ay truh đnen.” Atêq nưq, atêq tuôôy truh jeq, oot tơơk ti tol Lôôk Jê-xu ji rôp jư Kadraq. Ji 'yo hơq, muuyq đom khơl dro hooy dii Lôôk Jê-xu, tuôôy tơơk ti vlôh, heq hruut xieh ni ji dool dro xapok ku thơy tơơk tưp kôt, goch kloh tôôr ku ay nưq. Tuôôy nưq, Lôôk Jê-xu dăt dro nưq: “Dayh viet hlê xieh ku ay xuq aduq ku ni, vii dêq hloay khơl leq adrơk xieh hnoq kaxêêt bơyh xieh. Long ay biit đaneq thơy leh e qwuyen taayh apôôy Vaq thơy, yôôch Kadraq hnoq patăk truh hloay ka thơy 'ngưng iaq kưl vaarq đaauq kuun yaak plêêk long aleq? Anưq yôôych, dơơp aleq kaluh apok Rahlăp Vah jah jêêk, đaneq varơuq neq pheq xalih vlôh đanưq?” Muut wat nưq, Lôôk Jê-xu đnooy dii bing karôp: “Êêp kơy hooy vlôh kung dii xieh ji gay gôk xôq rôp gô đaji tachơơl hlê muuyq dro atôk ih? Tôôy hngơy, gô 'ngôôy pato dayq đom hnhư hơu đơu êêp kơy heq be rôp gô. Bơh kaluh varơuq neq xalih vlôh xôq kaluh valơk xôq ku khơl hnhư hlit hnoq ik jah jêêk.” Tuôôy nưq, tuôôy ka'lăk Kadraq hlê yôôch, dêq hloay khơl xatyauq heq xadăk klôônq.

Tuôôy nưq, khơl dro rôp Lôôk Jê-xu heq jarooy Kadraq truh ka khơl thơy tơơk tưp kôt Kai-phe, laa aduq đơu khơl thơy pato ganuun ji khơl draq jah anguk hlê kung mamuuyq. Măn Phi-e-rơ hooy tyauq Kadraq xing kơn xangưưy dong truh chaal ku thơy tơơk tưp kôt. Tuôôy muut pi 'lăp yôôch, kơy 'ngôôy pôôt muuyq aduq dii bing kuun jư 'yo xôq 'yo varơuq nưq hnoq đaleq. Tuôôy nưq, khơl thơy tơơk tưp kôt ji dêq hloay khơl Hnhư Anguk đong axek xanưk lar tachơơl hlê Lôôk Jê-xu, dơơp aleq ka oot hnoq ik rôp xadrah păk kaxêêt Kadraq. Ji oot leh axek jah kajoq, long 'ngưng dro dơơp xanưk lar heq dưk vlôh. Bơh atêq nưq vaarq dro hơq tawaak truh, heq đnooy: “Dro neq heq đnooy: ‘Gô hnoq ik pahyaak ka'lăk hnhư hơu ku Kơy Plêêk ji xơy panưk hlê đom pe hngơy.’” Atêq tuôôy dưk tok, thơy tơơk tưp kôt dăt Kadraq: “Ay leh tơơl apok ih? Khơl dro neq đong dơơp xanưk tachơơl hlê ay varơuq kajoq đahơq?” Bơh Lôôk Jê-xu leh tơơl. Thơy tơơk tưp kôt đnooy dii Kadraq: “Bơyh Kơy Plêêk hloay riirh, gô băt ay xôq ay đnooy ka 'wot xet jơq ay e aalq laa Lôôk Wơơt Dêh, Koot Kơy Plêêk, long leh?” Lôôk Jê-xu đnooy kung kơy nưq: “Kadih kơy heq đnooy đanưq. Long anưq, gô đnooy ka êêp kơy xet, xing neng kơn atêq, êêp kơy hnoq hloq Koot Manih 'ngôôy măn pi akoh ku Kơy Taay Yaak, ji ra-ma truh tol kaluh đum kluk plêêk.” Tuôôy nưq, thơy tơơk tưp kôt heq chieh aau yơơt ni, đnooy: “Ni katơơk galơh! Aleq haay măn duh manih xanưk đnoyq? 'Yo hơq, juneq êêp kơy heq tameng apok katơơk galơh nưq yôôch. Êêp kơy biit đaleq?” Yôôch tuôôy tơơl apok, oot đnooy: “Ni dik laa xưng Kaxêêt.” Atêq nưq, oot kaxôh muut mot Kadraq, tiel tu Kadraq, yôôch pađa Kadraq, đaneq: “Nee Lôôk Wơơt Dêh, đnooy hlit ka 'wot yơu. Kơyq laa dro heq hmơt kơy?”

Tuôôy nưq, Phi-e-rơ đong 'ngôôy đom chaal pi gôk, ji muuyq xapok kadrê truh jeq kơy, đnooy: “Kơy kung măn muuyq aduq dii Jê-xu, manih Ga-li-lê.” Bơh kơy chôôyq kangưưr tôôy dro, đaneq: “Gô be xet mư đong đnooy kajoq.” Yôôch atêq tuôôy hooy vlôh truh 'mok kôt, muuyq xapok kadrê kadrơy heq 'yo hloq kơy ji đnooy dii khơl dro măn đnư: “Dro neq măn muuyq aduq dii Jê-xu, manih Na-xa-ret.” Ji kơy laay chôôyq kung dii muuyq apok paleek, đaneq: “Gô be xet dro nưq!” Bơh muuyq xit tra, khơl dro hmưq dưk đnư, atêq tuôôy truh jeq, heq đnooy dii Phi-e-rơ: “Kajưk dik kơy kung măn đom sôôq bing oot, vii hloay ka trôôk đnooy ku kơy dơơp ka kơy tauq vlôh.” Tuôôy nưq, kơy xarôp axaap, ji paleek đaneq: “Gô be xet dro nưq,” yôôch vơ hloay, ier rok. Ji Phi-e-rơ văch hlê kaluh apok ku Lôôk Jê-xu heq đnooy, đaneq: “Adroyq tuôôy ier rok, ay hnoq chôôyq thơy pe yưk.” Yôôch tuôôy heq hooy vlôh pi gôk, kơy nhim ook kach areh xuum.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.