Ma-thi-ơ 25

1Anưq, daak dêh daak plêêk hnoq jah atoh đaji kưl khơl drê blaay, laa khơl dro adrơk đeen oot hooy vlôh truh aduq đoonq tiip ok. 2Bơh dăp mư đom sôôq oot laa vlô, ji dăp mư yôôych khôôt. 3Vii dăp mư vlô, atêq tuôôy adrơk đeen ku oot hooy, heq leh taway dơu tyauq dii oot. 4Măn khơl mư khôôt yôôych heq taway dơu tyauq đom kave kung dii đeen oot. 5Tuôôy nưq, vii ok truh ahnuy, dêq hloay oot heq kung lakôôp vik yôôch vik tawol. 6Bơh muut katul mưng, e apok taayh: ‘Koot ok hơq! Dayh hooy vlôh truh aduq đoonq tiip.’ 7Tuôôy nưq, dêq hloay khơl drê blaay nưq jah nhơk kah ji ralauq 'meq đeen oot. 8Tuôôy nưq, khơl mư vlô đnooy dii khơl mư khôôt: ‘Xiin ăm ka 'wot muuyq phon dơu ku êêp mư, vii đeen ku 'wot jeq poch.’ 9Bơh tuôôy tơơl hlê, khơl mư khôôt đnooy: ‘Leh ik hnoq leh ik 'leq e đu ka 'wot ji êêp ay. Tơơl iaq, dayh hooy truh khơl dro tabôôt tek đơu root ka êêp.’ 10Lunư, đom tuôôy oot hooy root, ok heq truh, ji khơl leq ralauq 'miêh kung dii ok yôôych muut đom waal pajêêk, yôôch 'mok jah kađnoch hlê. 11Yôôch atêq nưq, khơl drê blaay hơq kung truh, tơơl: ‘Kôôch lơơy, kôôch lơơy, luh rơy 'mok ka 'wot.’ 12Bơh tuôôy tơơl hlê, kôôch đnooy: ‘Dong dik, gô đnooy dii êêp mư, gô be xet êêp mư.’ 13Anưq, dayh parol 'yo, bơyh oh ay leh xet hngơy long wat.

14Vii dang đaji muuyq dro jeq hooy dêh xangưưy, kơy heq taayh khơl xapok ku ni hlê ji pahnăp ka oot garuh anôôp ku kơy. 15Kơy ăm dro neq dăp ta-lâng, dro hơq vaarq ta-lâng, dro kadrơy đnoyq muuyq ta-lâng — đôôyq dii tôôy dro 'yo tyauq paraat đêh ra. Yôôch kơy vơ hloay dưk vlôh hooy dêh xangưưy. 16Tuôôy kơy hooy yôôch, dro nhonq dăp ta-lâng heq hooy tabôôt xa sôôq jêêt nưq ji axek jah dăp ta-lâng kadrơy. 17Dang anưq, dro e vaarq ta-lâng kung axek jah vaarq ta-lâng kadrơy. 18Bơh dro heq nhonq muuyq ta-lâng, atêq tuôôy hooy vlôh, heq pok vari ji kadook jêêt ku kôôch ni. 19Tuôôy nưq, atêq muuyq kawah xiik, kôôch ku khơl dro xapok nưq truh ji 'yo jauq varơuq dii oot. 20Atêq tuôôy truh jeq, dro nhonq dăp ta-lâng heq adrơk dăp ta-lâng kadrơy, đnooy đaneq: ‘Kôôch lơơy, kơy heq pahnăp ka gô dăp ta-lâng. Bơh xiin 'yo neq, gô heq dơơp e athêêp dăp ta-lâng.’ 21Kôôch ku ay đnooy dii ay: ‘Ik yôôch, ay xapok hyioh jăk ji muuyq xuum! Ay heq muuyq xuum đom varơuq de. Gô hnoq pahnăp xôq ay jư 'yo tol 'ngưng varơuq. Dayh muut đom hlah hlaak ku kôôch ay.’ 22Dro e vaarq ta-lâng, atêq tuôôy truh jeq, kung heq đnooy: ‘Kôôch lơơy, kơy heq pahnăp ka gô vaarq ta-lâng, bơh xiin 'yo neq, gô heq dơơp vlôh athêêp vaarq ta-lâng.’ 23Kôôch ku ay đnooy dii ay: ‘Ik yôôch, ay xapok hyioh jăk ji muuyq xuum! Ay heq muuyq xuum đom varơuq de. Gô hnoq pahnăp xôq ka ay jư 'yo tol 'ngưng varơuq. Dayh muut đom hlah hlaak ku kôôch ay.’ 24Măn dro nhonq muuyq ta-lâng, kung tawaak truh, heq đnooy: ‘Kôôch lơơy, gô xet kơy, đaneq kơy laa muuyq dro thier khoq, goch ka aduq kôôch leh pêêt ji goch xok ka aduq kôôch leh paraay vlôh. 25Vii yôq varaal, lunưq atêq tuôôy hooy vlôh, gô heq kadook ta-lâng ku kơy 'laarq vari. Dayh 'yo neq, kơy xok hlê phon ku kơy.’ 26Bơh tuôôy tơơl hlê, dro kôôch ku dro nưq đnooy dii ni: ‘Adro xapok xơk tauq ji alah kamo hơq! Ay 'miêh heq xet đaneq gô goch ka aduq gô leh pêêt ji goch xok ka aduq gô leh paraay vlôh. 27Anưq yôôych, yơu iaq ay kơn duh adrơk xôq jêêt ku gô măn aduq hnhư tabôôt jêêt, yôôch atêq tuôôy truh, yôôych laa gô heq nhonq hlê jôônq ku gô kung jêêt palơơy. 28Anưq, dayh xok ta-lâng khơl adro neq ji ăm jêêt nưq ka dro đong e kưl ta-lâng. 29Vii dii dro đong e, yôôych tôôy thưq hnoq jah kahniq ăm — pheq đnooy hnoq jah raah 'ngưng. Bơh đôôyq dii dro be e, yôôych hloay ka varơuq ni e hnoq biq xok hlơơp klơlh ni. 30Ji dayh qweek adro xapok be ra kajoq nưq muut aduq kamơng jaluk pi gôk, laa aduq hnoq e varơuq nhim alo ji takik kaneeng.’

31Măn tuôôy Koot Manih truh đom tađnah tađnaak Kadraq ji dêq hloay yaak plêêk kung dii Kadraq, yôôych tuôôy nưq, Kadraq hnoq 'ngôôy tol ngôôy tađnah tađnaak kadraq. 32Dêq hloay kaluh tamooy hnoq jah anguk hlê kangưưr Kadraq, ji Kadraq hnoq aklah vlôh oot dii mamuuyq, đaji laa dro xakaq aklah trưưu vlôh klơlh vove. 33Kadraq hnoq xôq trưưu măn pi akoh kadraq, măn vove măn pi akeng. 34Atêq nưq, Vuua hnoq dăt khơl leq măn pi akoh kadraq: ‘Khơl dro heq jah Vaq Gô kahniq vanong, truh đnen yơu, dayh nhonq xok daak plêêk heq jah ralauq 'miêh ka êêp xing tuôôy panưk pajêêk plêêk vari. 35Vii Gô pangoot, yôôych êêp koot ăm Gô xa; Gô thaal, yôôych êêp koot ăm Gô hôôch; Gô laa manih be xet, yôôych êêp koot tiip đoonq Gô; 36Gô lalôk, yôôych êêp koot pahlưp ka Gô; Gô jiq jiêh, yôôych êêp koot 'yo xiap Gô; Gô măn đom tu, yôôych êêp koot truh dii Gô.’ 37Tuôôy nưq, khơl dro hyioh jăk hnoq tơơl hlê Kadraq, đaneq: ‘Kuh Lôôk, 'wot koot heq hloq Kadraq pangoot đơu ăm xa, long laa thaal đơu ăm hôôch muut tuôôy leq? 38Yôôch 'wot koot heq hloq Kadraq đaji manih be xet đơu tiip đoonq? Long lalôk đơu pahlưp ăm muut tuôôy leq? 39Ji 'wot koot heq hloq Kadraq jiq jiêh long măn đom tu tuôôy leq đơu truh dii Kadraq?’ 40Tuôôy tơơl apok, Vuua hnoq đnooy dii oot: ‘Dong dik, Gô đnooy dii êêp koot, gamưh muut tôôy varơuq êêp koot heq dơơp ka muuyq đom khơl dro de dik aduq khơl oh ay neq ku Gô, yôôych êêp koot heq dơơp ka Gô.’ 41Atêq nưq, Vuua kung hnoq dăt khơl dro măn pi akeng: ‘Dayh hooy xangưưy klơlh Gô, khơl dro biq karoay axaap hơq, hooy muut ôôlh đơơy đơơy heq xôq 'miêh ka kamuuych ji kaluh garu xi xơk ku ni. 42Vii Gô pangoot đơu êêp leh ăm Gô xa; Gô thaal đơu êêp leh ăm Gô hôôch; 43Gô laa manih xadaay be xet, đơu êêp leh tiip đoonq Gô; lalôk yôôych êêp be pahlưp ka Gô; jiq jiêh ji măn đom tu, yôôych êêp be 'yo xiap Gô.’ 44Tuôôy nưq, oot kung hnoq tơơl, đaneq: ‘Kuh Lôôk, 'wot koot heq hloq Kadraq pangoot, long thaal, long đaji manih xadaay be xet, long lalôk, long jiq jiêh, long măn đom tu tuôôy leq đơu be hơu varơuq Kadraq?’ 45Anưq yôôch, Vuua hnoq tơơl apok oot, đaneq: ‘Dong dik, Gô đnooy dii êêp, gamưh muut tôôy varơuq êêp heq leh dơơp ka muuyq đom khơl dro de dik aduq khơl dro neq, yôôych êêp heq leh dơơp ka Gô.’ 46Khơl dro nưq hnoq hooy muut varơuq hmơt dook miet miet, măn khơl dro hyioh jăk yôôych muut varơuq riirh đơơy đơơy.”