Skip to content
BibleKenya

Cua Bible Literal Text

Ma-thi-ơ 24

Atêq tuôôy vlôh klơlh hnhư hơu, Lôôk Jê-xu hooy đnoyq. Yôôch khơl xatyauq Kadraq truh jeq xôq pato ka Kadraq 'yo kaluh kông trinh ku hnhư hơu. Bơh tuôôy tơơl hlê, Kadraq đnooy dii oot: “Oh ay leh 'yo hloq tôôy thưq nưq ih? Dong dik, thơy đnooy dii oh ay, aduq neq kajưk dik hnoq leh măn hlê kuk phơu neq tol kuk phơu hơq đơu be biq pahrưp hrưp.”

Tuôôy nưq, tuôôy Kadraq đong 'ngôôy tol đoot Ô-liu, khơl xatyauq truh đêh jeq Kadraq, tơơl: “Xiin ăm 'wot xet dong leq kaluh varơuq nưq hnoq xalih vlôh, ji dơuq hlêêl varơuq truh ku thơy ji ku hngơy hlơơp dêh laa kajoq?” Tuôôy tơơl apok, Lôôk Jê-xu đnooy dii oot: “Dayh rơơt rol xôq leh kơyq hnoq ik dơơp ka oh ay hyaak hyul. Vii 'ngưng dro hnoq truh đom yal thơy, xưng: ‘Gô laa Lôôk Wơơt Dêh,’ ji hnoq dơơp ka 'ngưng dro hyaak hyul. Mot kadrơy, oh ay hnoq tameng tek truh tahmơt jăk ji kaluh hêêl đnooy truh tahmơt jăk. Oh ay dayh rơơt rol, te biq xôôl dôôl, vii varơuq nưq duh pheq xalih vlôh, bơh koq lưp aalq laa hngơy hlơơp dêh. Vii tamooy neq hnoq dưk tok tachơơl hlê tamooy kadrơy, daak neq tachơơl hlê daak hơq. Yôôch hnoq e pangoot hrah ji ahrưng vari măn 'ngưng aduq. Bơh dêq hloay kaluh varơuq neq vơ laa xarôp ku kaluh đơơt pơơl dal hngơy hlơơp dêh. Tuôôy nưq, khơl drơy hnoq ahnen oh ay muut đom pơơl dal ji păk kaxêêt oh ay, ji oh ay hnoq biq tôôy tamooy 'yarơ jaraq vii kơq yal thơy. Yôôch 'ngưng dro hnoq biq gưlh lôp, xalih xuum mamuuyq ji thu 'yarơ mamuuyq. 'Ngưng khơl hlit pa ôôh hnoq jah dưk tok ji dơơp ka 'ngưng dro hyaak hyul. Vii varơuq lôp kadrôôp hnoq athêêp 'ngưng, xuum xiaq ku 'ngưng dro hnoq biq ngưưt jaleek. Bơh kơyq kajưk xuum dong truh lôôch dik, dro nưq hnoq jah wơơt. Hêêl Kaxay neq truh daak plêêk hnoq jah padoh taboon vlôh loch tol vari dêh xôq dơơp muuyq apok xanưk ka tôôy tamooy, ji yôôch varơuq lôôch dik hnoq truh.

Kơq nưq, tuôôy oh ay 'yo hloq varơuq ramêq dik ku varơuq ralưp ralaak, laa varơuq heq jah hnhư hlit Đa-ni-ên đnooy truh, xôq đom aduq vah” (dro đok pheq hlolh), “Tuôôy nưq, kơyq đom dêh Ju-đê dayh xadăk du truh dêh đoot, kơyq măn tol apo hnhư, te hooy pôôt xok vlong kajoq klơlh hnhư êêp, ji kơyq măn manay gôk te wiit xuq xôq xok aau khwoak êêp. Bơh ra ơơh dik ka khơl kadrê măn bonq ji khơl leq đong ăm koot uq đom kaluh hngơy nưq! Bơh dayh apôôy vôôch xôq varơuq xadăk naanq ku oh ay leh huq klêh muut xiêk jaleek, long klip hngơy Sa-bat. Vii tuôôy nưq hnoq e varơuq pơơl dal kôt, koq hmưq xalih vlôh dang đanưq xing tuôôy xarôp panưk pajêêk dêh araak dong truh juneq, ji kajưk dik kung hnoq leh e. Atoh kaluh hngơy nưq leh jah ruut lêq, yôôych laa tôôy xăk xamơk heq be jah wơơt. Bơh vii kơq khơl dro jah rơơlh, kaluh hngơy nưq hnoq jah ka'lăk đơh. Tuôôy nưq, atoh muuyq dro leq nưq đnooy dii oh ay: ‘'Yo hơq, Lôôk Wơơt Dêh măn đnen!’ long ‘Măn hơ!’ yôôych oh ay te tuôq. Vii khơl wơơt lôôk pa ôôh kung khơl hnhư hlit pa ôôh hnoq jah dưk tok ji kahnoq vlôh kaluh dơuq akêh kung kaluh pheep akêh kôt lơyq pheq đnooy dơơp ăm hyaak hyul, atoh hnoq ik, yôôych hloay ka khơl dro jah rơơlh. 'Yo nee, thơy đnooy droyq ka oh ay yôôch nưq. Anưq, atoh khơl drơy đnooy dii oh ay: ‘'Yo hơq, Kadraq đong đom wăngq we,’ yôôych oh ay be duh hooy vlôh đnư. Dayh ‘'Yo nee, aduq kaluh phong kinq,’ yôôych oh ay te duh tuôq. Vii kablek tađnah vlôh xing hngơy vlok yôôch pareek tađnah truh pi hngơy lôp luleq, yôôych varơuq rama truh ku Koot Manih hnoq laa đanưq. Long xaak kaxêêt măn aduq leq, xêêp aak hnoq anguk hlê aduq nưq.

Bơh atêq ka đơơt pơơl dal ku kaluh hngơy nưq, mot hngơy hnoq biq dơơp ăm kamơng jaluk, xiêk hnoq paq xaraar tađnah ku ni, kaluh xalok hnoq xing plêêk kađnih pôôt, ji kaluh qwuyen lưk ku kaluh tol plêêk hnoq biq ahrưng anhưh. Tuôôy nưq, dơuq hlêêl truh Koot Manih hnoq jah kahnoq vlôh tol plêêk, ji yôôch dêq hloay kaluh tamooy tol vari hnoq nhim ook. Oot hnoq hloq Koot Manih truh tol kaluh kuk kluk plêêk dii qwuyen pheep ji tađnah tađnaak kôt. Kadraq hnoq patăk yaak plêêk ku Kadraq kung dii ahlôôk keng kôt, ji oot hnoq anguk hlê khơl manih jah rơơlh ku Kadraq xing poot panưk vari, xing lôôch plêêk neq truh lôôch panưh plêêk hơq.

Mot kadrơy, dayh hok xet apok atoh neq xing ưk pok puut. Tuôôy đook ni vlôh gooy kaxeq ji vlôh hla yôôch, yôôych oh ay xet đaneq xiêk tôq jeq truh. Kung tyauq kach nưq, tuôôy oh ay hloq tôôy varơuq neq, yôôych oh ay xet đaneq Kadraq đong măn jeq, kangưưr 'mok. Dong dik, thơy đnooy dii oh ay, đaneq adrơơk neq kajưk dik hnoq leh dalơh hlê dong truh tuôôy leq dêq hloay kaluh varơuq nưq heq xalih vlôh. Plêêk ji vari hnoq dalơh hlơơp, bơh kaluh apok ku thơy kajưk dik hnoq leq dalơh hlơơp. Măn tajinq truh hngơy ji wat nưq yôôych leh kơyq xet, hloay ka yaak plêêk tol daak plêêk long Koot, đêh vlôh Vaq đơu heq. Bơyh kađơơy Nô-ê đaji luleq, yôôych varơuq truh ku Koot Manih hnoq laa đaji lunưq. Vii đaji đom kaluh hngơy adroyq daak ngôp dêh, khơl drơy 'miêh xa hôôch, pajêêk gah dong truh hngơy Nô-ê muut đom tau, ji oot leh 'yo vlôh dong truh tuôôy daak ngôp truh ji akhwua oot hooy — varơuq truh ku Koot Manih kung hnoq laa đanưq. Tuôôy nưq, vaarq dro khơl kanau đong măn manay apôh — muuyq dro hnoq jah xagook hooy, muuyq dro hnoq biq xôq hlê. Vaarq dro khơl drê đong apeh va — muuyq dro hnoq jah xagook hooy, muuyq dro hnoq biq xôq hlê. Vii anưq, dayh văch 'yo vii oh ay leh xet muut ka hngơy leq Lôôk haay hnoq truh. Bơh oh ay dayh 'yo xet varơuq neq, đaneq atoh kôôch hnhư heq xet dro atôk truh muut kawat leq ka klôôy, yôôych heq laa kơy nưq heq kôô parol ji heq leh xôq ka hnhư ni biq muut atôk. Vii kakơq neq, oh ay kung pheq ralauq xôq 'miêh, vii Koot Manih hnoq truh đom wat oh ay leh biit truh.

Lunưq, kơyq laa xapok muuyq xuum ji khôôt xet đơu kôôch pahnăp jư 'yo tol manih hnhư ku kôôch xôq ăm tuôông xa ka oot muut klip kawat? Vanong hloay laa dro xapok nưq, laa dro đơu kôôch ku ay, atêq tuôôy truh, hnoq hloq ay đong dưk dơơp đanưq. Dong dik thơy đnooy dii oh ay đaneq kôôch hnoq pahnăp xôq ay nưq jư 'yo tol tôôy thưq kôôch đong e. Bơh atoh adro xapok xơk tauq nưq đnooy đom xuum ni: ‘Kôôch gô đong truh ahnuy,’ yôôch xarôp tiel tu khơl dro kung laa xapok dii ni, đơu xa hôôch dii bing vuul lok, yôôych dro kôôch ku adro xapok nưq hnoq truh muut hngơy đơu ni leh xanih ji đom wat đơu ni leh xet. Kơy nưq hnoq hmơt chieh ni kach taxưngq ji hnoq pahnăp aduq ku ni muuyq aduq dii bing xuum pa ôôh; aduq nưq hnoq e varơuq nhim alo ji takik kaneeng.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.