Ma-thi-ơ 23

1Atêq nưq, Lôôk Jê-xu đnooy dii bing manih karôp ji khơl xatyauq kadraq, 2đaneq: “Khơl thơy pato ganuun ji khơl manih Pha-ri-si 'ngôôy tol ragê ku Môi-se. 3Kơq nưq, atoh oot pato dayq oh ay paq kê varơuq kajoq, dayh dưk dơơp ji tameng jư dêq hloay. Bơh te dơơp tyauq kaluh varơuq dơơp ku oot, vii oot đnooy đơu leh dơơp. 4Oot xa'măk kaluh gengq parêq ji pơl pơq, yôôch oot choch tol vara khơl drơy, bơh kadih oot be trôôch đuk lôk ti oot muut đnư. 5Oot dưk dơơp tôôy varơuq dơơp ku oot xôq jah khơl drơy 'yo hloq. Vii oot dơơp kaluh trăp xôq rahlăp ganuun ku oot dong kôt ji taat kaluh kahnier aau oot dong yơơt. 6Oot trôôch kachô aduq 'ngôôy pi adroyq dik đom waal pajêêk, ji kachô aduq kôt dik đom hnhư hơu, 7kung kaluh apok vôôch hrok aduq tabôôt xa ji jah manih karôp taayh laa ‘Ra-bi.’ 8Bơh oh ay leh duh jah taayh laa ‘Ra-bi,’ vii thơy ku oh ay vơ e muuyq, măn dêq hloay oh ay laa oh ay. 9Ji oh ay te taayh paq kê kơyq tol vari laa ‘vaq’ vii oh ay vơ e muuyq Vaq tol plêêk. 10Kung te xôq haay jah taayh laa ‘thơy,’ vii thơy ku oh ay vơ e muuyq — nưq laa Lôôk Wơơt Dêh. 11Bơh dro kôt dik đom khơl oh ay hnoq laa xapok oh ay 12Măn kơyq kadih vanê ni tok hnoq biq paklêh pôôt; ji kơyq kadih paklêh pôôt xăk hnoq jah vanê atok.

13Bơh ra ơơh ka khơl kơy, khơl thơy pato ganuun ji manih Pha-ri-si, bing xuum pa ôôh hơq! Bơyh êêp kơy kađnoch daak dêh daak plêêk hlê kangưưr khơl drơy. Vii êêp kơy yôôych leh muut 'lăp, kung be xôq ka kơyq hooy muut ik tawaak muut 'lăp. 14[Ra ơơh ka êêp kơy, khơl thơy pato ganuun ji manih Pha-ri-si, bing xuum pa ôôh hơq! Bơyh êêp kơy xa luôôt hnhư khơl mư valơu, đơu apôôy dong xiik 'ngưng đom varơuq dơơp bôô.] Vii kakơq nưq, êêp kơy hnoq nhonq xok xadrah dook parêq iaq. 15Ra ơơh ka êêp kơy, khơl thơy pato ganuun ji manih Pha-ri-si, bing xuum pa ôôh hơq! Bơyh êêp kơy dalơh hlê daak tahli hloay vari kateh xôq khienq ka muuyq dro tyauq đaauq, ji tuôôy dro nưq heq vlôh jêêk đanưq, êêp kơy ahluk khienq dro nưq vlôh dro koot ku ôôlh karuk gôp vaarq yưk êêp kơy.

16Ra ơơh ka êêp kơy, khơl dro jarooy trôôk apul, nưq laa khơl dro đnooy: ‘Dro leq paleek bơyh hnhư hơu yôôych be aleq. Bơh dro leq paleek bơyh vajang ku hnhư hơu yôôych nưq laa pang waq.’ 17Khơl dro vlô apoop ji bing apul hơq! Vii varơuq leq laa kôt iaq, vajang long hnhư hơu khienq vajang jah vah? 18Laay măn: ‘Dro leq paleek bơyh para hơu yôôych be aleq. Bơh dro leq paleek bơyh kuah lêh pi ataalh para hơu yôôych nưq laa pang waq.’ 19Khơl dro vlô apoop ji bing apul vlo hơq! Vii varơuq leq kôt iaq, kuah lêh long para hơu khienq kuah lêh jah vah? 20Kơq nưq, kơyq heq paleek bơyh para hơu yôôych paleek bơyh para hơu ji bơyh tôôy thưq pi taalh nưq. 21Kơyq heq paleek bơyh hnhư hơu yôôych paleek bơyh hnhư hơu ji bơyh Kơy măn đom nưq. 22Ji kơyq heq paleek bơyh plêêk yôôych paleek bơyh ngôôy ku Kơy Plêêk ji bơyh Kơy măn tol nưq.

23Ra ơơh ka êêp kơy, khơl thơy pato ganuun ji manih Pha-ri-si, bing xuum pa ôôh hơq! Bơyh êêp kơy noop phon kưl baak ha, thi laa ji kaxeq kâân, đơu ka'lăk tăk kaluh varơuq duh dik ku ganuun — nưq laa varơuq hyioh jăk, xuum biit angơuq ji varơuq muuyq xuum. Mot kadrơy, nưq laa varơuq kơn duh xôq dưk dơơp kaluh varơuq neq, ji leh ka'lăk kaluh varơuq hơq. 24Bing jarooy trôôk apul vlo hơq, 'ngưq laa khơl dro rơơlh vlôh muuyq poop pi kajơơu tahrưưt, bơh luôôt apoop muuyq ôô lak đa!

25Ra ơơh ka êêp kơy, khơl thơy pato ganuun ji manih Pha-ri-si, bing xuum pa ôôh hơq! Bơyh êêp kơy 'nhaau xarêh pi gôk ku dooy ji dơơt, bơh pi 'lăp yôôych oot viik ngăk varơuq varoh xok ji xa agưt. 26Khơl dro Pha-ri-si apul vlo hơq! Adroyq dik, dayh 'nhaau xarêh pi 'lăp dooy ji dơơt, xôq pi gôk ku oot kung vlôh xarêh xaraat.

27Ra ơơh ka êêp kơy, khơl thơy pato ganuun ji manih Pha-ri-si, bing xuum pa ôôh hơq! Bơyh êêp kơy dang đaji kaluh xanưng jah tôô ko, laa kaluh thưq tabơh kahnoq vlôh kaxay tamaq pi gôk, bơh pi 'lăp yôôych viik ngăk khiêk kadah manih kaxêêt ji đu thưq 'moh nhơy. 28Kung dang đaji đanưq, tabơh pi gôk êêp kơy kahnoq vlôh hyioh jăk đôôyq dii khơl drơy, bơh pi 'lăp êêp kơy yôôych viik katâk pa ôôh lar ji kadrôôp maroh.

29Ra ơơh ka êêp, khơl thơy pato ganuun ji manih Pha-ri-si, bing xuum pa ôôh hơq! Bơyh êêp kơy xơy dơơp xanưng ku khơl hnhư hlit ji ta'meq pagooh xanưng ku khơl manih hyioh jăk. 30Êêp kơy đnooy: ‘Atoh 'wot măn đom tuôôy đơơy khơl mo kơy 'wot, yôôych laa 'wot heq leh dơơp khơl dro jưq phon dii oot aduq vahaap ku khơl hnhư hlit.’ 31Lunưq, êêp kơy kadih dơơp xanưk truh êêp đaneq êêp laa koot xau ku khơl dro heq păk kaxêêt khơl hnhư hlit, 32ji êêp kơy dayh dơơp viik xaleep hlơk kadrôôp xơk ku mo kơy êêp! 33Bing volh đôk hơq, rong nooy ku volh taweek, êêp kơy hnoq xadăk klơlh varơuq xadrah dook ku ôôlh karuk bơơn trôôk leq? 34Vii kakơq neq, dayh 'yo hơq, gô patăk dăt khơl hnhư hlit, Manih khôôt xet ji thơy pato ganuun truh dii êêp kơy. Xing katul oot, êêp kơy hnoq păk kaxêêt ji đongq đing, kung xing katul oot, êêp kơy hnoq tiel dook đom kaluh hnhư tagumq êêp ji da uiq tyauq xing theng neq hlê theng kadrơy, 35dơơp aleq hnoq ik truh tol êêp kơy dêq hloay vahaap hyioh jăk heq biq ahngok vlôh tol vari, xing vahaap ku A-bên, manih hyioh jăk, dong truh vahaap Xa-cha-ri, koot kanau Ba-ra-chi, manih đơu êêp kơy heq păk kaxêêt katul hnhư hơu ji para hơu. 36Dong dik, gô đnooy dii êêp kơy, tôôy varơuq nưq hnoq xalih truh tol adrơơk neq.

37Jê-ru-sa-lem, Jê-ru-sa-lem, xăk heq păk kaxêêt khơl hnhư hlit ji tiip phơu khơl dro jah patăk truh dii xăk! 'Ngưng yưk gô trôôch anguk hlê koot xau ku êêp hlê, tyauq trôôk đơu ier pi anguk koot ni 'laarq panưr, đơu xăk leh chiuq! 38'Yo neq, hnhư ku êêp kơy hnoq biq ka'lăk hlê wăngq xateek ka êêp kơy. 39Vii gô đnooy dii êêp kơy, êêp kơy kajưk dik hnoq leh hloq gô xing neng dong truh tuôôy leq êêp kơy đnooy: ‘Ayuôôt laat Kơy truh đom yal Lôôk!’”