Ma-thi-ơ 22

1Ji tơơl hlê, Lôôk Jê-xu muuyq yưk tra đnooy dii oot bơơn apok atoh, đaneq: 2“Daak dêh daak plêêk jah 'yo đaji muuyq dro laa vuua, đơu vuua nưq ralauq xôq waal pajêêk ka koot kanau kơy. 3Vuua patăk khơl xapok ku kơy hooy xôq taayh khơl dro heq jah mơơy truh waal pajêêk, đơu oot leh trôôch truh. 4Vuua laay dăt khơl xapok kadrơy, đaneq: ‘Dayh đnooy dii khơl dro heq jah mơơy: “'Yo hơq, gô heq adoot waal ku gô. Kaluh ôô bo ji ôô pôôq ku gô heq jah dơơp ôq, ji tôôy thưq heq xong dêq yôôch. Dayh truh dii waal xa.”’ 5Bơh oot ka'lăk hooy vii be tabông, dro neq vlôh ruôngq ni, dro hơq tabông truh varơuq tabôôt xa ku ni. 6Đơu sôôq măn hlê, atêq tuôôy rôp jư khơl xapok ku vuua, yôôych heq đnooy ra ơơh ji păk kaxêêt. 7Anưq yôôch, hnhư vuua biq dơơp tôq jaraq, lunưq atêq tuôôy patăk kuun kadraq hooy, kơy heq ăm păk kaxêêt bing păk kaxêêt manih nưq ji vuh theng ku oot. 8Atêq nưq, vuua dăt khơl xapok ku kơy: ‘Tabơh waal pajêêk heq xong dêq, bơh khơl dro hmưq jah mơơy nưq yôôych leh taxưngq. 9Anưq, dayh hooy truh kaluh trôôk kôt, yôôch atoh khơl ay tavơh paq kê taleq dro, yôôych dayh mơơy truh waal pajêêk.’ 10Ji khơl xapok nưq, atêq tuôôy hooy vlôh aduq kaluh trôôk kôt, heq anguk dêq hloay khơl leq đơu oot tavơh, kaah khơl xơuq hloay khơl kaxay, yôôch aduq waal heq viik hach khơl dro jah taayh truh. 11Bơh tuôôy muut xôq 'yo khơl manih 'ngôôy xa, vuua hloq muuyq dro hơq leh hlưp qwuân aau waal pajêêk. 12Vuua đnooy dro nưq: ‘Nee 'wơyq, dơơp đaleq ay muut đnen tuôôy leh e qwuân aau waal pajêêk?’ Bơh dro nưq tangư hnhep. 13Atêq nưq, vuua dăt khơl xapok: ‘Dayh vek jôôk ti ku dro neq hlê yôôch qweek ni muut aduq kamơng jaluk pi gôk hơq, aduq hnoq e varơuq nhim ook ji takik kaneeng.’ 14Vii 'ngưng dro jah taayh, bơh axit dro jah rơơlh.”

15Tuôôy nưq, atêq tuôôy ka'lăk hooy, khơl manih Pha-ri-si athêêk xôq vih 'yo đaleq ka oot hnoq ik anơk xađook Kadraq đom apok đnooy. 16Oot dăt khơl Xatyauq oot, kung khơl dro thuôk bing ja Hê-rôt, truh dii Kadraq, đnooy: “Kuh thơy, 'wot xet đaneq thơy laa manih dong dik ji pato dayq trôôk daak ku Kơy Plêêk bơơn varơuq dik, ji leh e varơuq 'yo nêêh măn aduq thơy truh paq kê dro leq, vii thơy leh 'yo aduq pi gôk ku khơl drơy. 17Vii anưq, dayh ăm 'wot xet thơy biit đaleq? E ik noop xơu ka Sê-sa long leh?” 18Bơh vii heq xet xuum klaak xơuq xơk ku oot, Lôôk Jê-xu đnooy: “Khơl dro xuum pa ôôh hơq, aleq êêp kơy 'yo thưh gô? 19Dayh ăm gô 'yo jêêt noop xơu.” Oot ahlê ka Kadraq jêêt muuyq đơ-ni-ê. 20Kadraq đnooy dii oot: “Long lơuq ji hlêêl dơuq neq laa ku kơyq?” 21Oot tơơl: “Ku Sê-sa.” Tuôôy nưq, Kadraq đnooy dii oot: “Anưq, dayh bla ka Sê-sa kaluh kajoq ku Sê-sa, ji ka Kơy Plêêk kaluh kajoq ku Kơy Plêêk.” 22Atêq tuôôy tameng apok nưq, oot thier akêh, yôôch oot chuh hooy, ka'lăk Kadraq hlê.

23Đom hngơy nưq, taleq dro Sa-đu-sê truh jeq Kadraq, vii 'ngưng đnooy laa leh e varơuq riirh hlê, lunưq oot heq 'yo vôôch Kadraq, 24Đaneq: “Thơy lơơy, Môi-se đnooy: ‘Atoh muuyq dro leq nưq kaxêêt tuôôy leh e koot, yôôych ma oh kanau dro nưq hnoq pajêêk kadrê ku ay ji pa iir koot ka dro ay ku ni.’ 25Bơh katul 'wot e pơh oh ay kanau, dro droyq dik, atêq tuôôy xok kadrê, yôôych heq kaxêêt. Ji ay xôq hlê kadrê ku ay ka dro ma oh ni, tuôôy leh e koot. 26Dro thưq vaarq yôôch dro thưq pe, dong truh dro thưq pơh, kung đanưq. 27Yôôch atêq dêq hloay, dro khơl drê kaxêêt hlơơp. 28Anưq, đom varơuq riirh hlê, mư hnoq laa kadrê ku kơyq đom pơh dro oh ay? Vii dêq hloay oot heq xok mư.” 29Bơh tuôôy tơơl apok, Lôôk Jê-xu đnooy dii oot: “Êêp kơy biq hyaak bơyq yôôch, vii leh xet Rahlăp Vah hloay taay yaak ku Kơy Plêêk. 30Vii đom varơuq riirh hlê, khơl drơy leh pajêêk kung leh jah gah hooy, bơh oot yôôych dang đaji yaak plêêk tol plêêk. 31Măn truh varơuq riirh hlê ku dro kaxêêt, êêp kơy koq đok apok heq jah Kơy Plêêk xanoh dii êêp, đaneq: 32‘Gô laa Kơy Plêêk ku Ap-ra-ham, Kơy Plêêk ku I-sak ji Kơy Plêêk ku Ja-kôp’? Kơy Plêêk leh aalq laa ku dro kaxêêt, bơh laa ku manih riirh.” 33Tuôôy tameng đanưq, manih karôp biq akêh truh apok pato ku Kadraq.

34Măn khơl manih Pha-ri-si, atêq tuôôy tameng đaneq Kadraq heq khienq taleq dro Sa-đu-sê paq ik hah huuy, yôôych heq anguk hlê dii mamuuyq. 35Muuyq dro đom sôôq oot, laa thơy pato ganuun, heq vôôch 'yo xôq thưh Kadraq — 36“Thơy lơơy, ganeen leq kôt dik đom ganuun?” 37Yôôch Kadraq đnooy kung ay nưq: “‘Dayh xung xiaq Lôôk, laa Kơy Plêêk ku koot, bơơn dêq ka xuum klaak koot, kung dêq ka phool hiel koot ji dêq ka akoq biit koot.’ 38Nưq laa ganeen kôt ji 'yo duh dik. 39Măn ganeen thưq vaarq dang đaji varơuq nưq — ‘Dayh xung xiaq manih gah gih ku koot đaji xăk xamơk koot.’ 40Dêq hloay ganuun ji khơl hnhư hlit jah gamưh tol vaarq ganeen neq.”

41Tuôôy nưq, atêq tuôôy taleq dro Pha-ri-si jah anguk hlê kung mamuuyq, Lôôk Jê-xu vôôch oot, 42đaneq: “Khơl kơy biit luleq truh Lôôk Wơơt Dêh? Kadraq laa koot ku kơyq?” Oot tơơl apok Kadraq: “Ku vuua Đa-vik.” 43Kadraq đnooy dii oot: “Anưq dơơp đaleq đơu Đa-vik, đom Kơy Phool Hiel, taayh Kadraq laa Lôôk, tuôôy đnooy:

44‘Lôôk xanoh dii Lôôk gô:

“Dayh 'ngôôy măn pi akoh Gô,

dong truh tuôôy leq Gô xôq khơl dro tachơơl ku koot 'laarq jôôk koot”’?

45Anưq atoh Đa-vik taayh Kadraq laa ‘Lôôk,’ yôôych dơơp aleq Kadraq laa koot vuua nưq?” 46Paq e kơyq hnoq ik tơơl hlê Kadraq muuyq apok, kung be muuyq dro leq hôôk 'yo vôôch Kadraq đnoyq xing tuôôy hngơy nưq.