Mak 1

1Kapa tep Hêêl Kaxay ku Lôôk Wơơt Dêh Jê-xu, Koot Kơy Plêêk.

2Đaji heq jah valơk đom rahlăp hlit Ê-sai:

“Dayh 'yo nee, Gô patăk xapok ku Gô hooy kangưưr mot Koot,

adro hnoq deep trôôk ku Koot;

3muuyq apok taayh kôt đom wăngq we:

‘Dayh deep 'miêh trôôk ku Lôôk;

dơơp dong hyioh kaluh trôôk ku Kadraq.’”

4Jăng heq truh, dơơp bap-tem đom wăngq we ji padoh pato pheep bap-tem ku varơuq wiit xuum truh varơuq ka'lăk kadrôôp. 5Loch dêh Ju-đê ji tôôy adro aduq Jê-ru-sa-lem garuk truh kung kơy ji oot jah kơy dơơp bap-tem 'laarq daak Jô-đanh tuôôy xưng nhonq kadrôôp maroh oot. 6Jăng yôôych hlưp aau bơơn hlôôk laak đa kung hnek katêêk kađuh rawiit katêêk kơy, ji xa lêêp dii daak hluut gôk. 7Kơy padoh pato đaneq: “Kơy e taay yaak iaq gô đong truh atêq gô, laa Kơy đơu gô leh xưngq đangq kuu pôôt xôq luh talơy kaxôôp ku Kadraq. 8Gô dơơp bap-tem ka oh ay bơơn daak, bơh Kadraq hnoq dơơp bap-tem ka oh ay bơơn Kơy Phool Hiel.”

9Varơuq xalih vlôh đom kaluh hngơy nưq, nưq laa Lôôk Jê-xu heq truh xing Na-xa-ret thuôk dêh Ga-li-lê, ji Kadraq jah Jăng dơơp bap-tem 'laarq daak Jô-đanh. 10Ji hloay juneq, tuôôy tok klơlh daak, Kadraq hloq kaluh tal plêêk jah luh vlôh ji Kơy Phool Hiel kahri pôôt tol Kadraq đaji xêêp katrơu. 11Ji muuyq apok xanoh truh xing plêêk: “Koot laa Koot xung xiaq ku Gô. Gô thier ahyơơl xuum truh Koot.”

12Hloay juneq, Kơy Phool Hiel ahluk ahlul Kadraq hooy muut wăngq we. 13Kadraq măn đom wăngq we poot kưl hngơy, chiuq Sa-tan adô aluut. Kadraq măn dii ôô gôk, ji yaak plêêk hơu varơuq Kadraq.

14Atêq tuôôy Jăng biq rôp, Lôôk Jê-xu hooy truh Ga-li-lê đnooy vlôh Hêêl Kaxay ku Kơy Plêêk, 15ji đnooy đaneq: “Kawat heq xaleep, ji daak dêh ku Kơy Plêêk heq truh jeq. Dayh wiit xuum ji tuôq aduq Hêêl Kaxay.”

16Tuôôy hooy angach tyauq gah tahli Ga-li-lê, Kadraq hloq Si-môn ji Anh-rê, oh ku Si-môn, đong dăk lưyq tol tahli, vii oot laa khơl rôp ka. 17Lôôk Jê-xu đnooy dii oot: “Dayh hooy tyauq thơy yơu, yôôch thơy hnoq khienq oh ay vlôh jêêk dro hmơt lươyq manih.” 18Hloay juneq, tuôôy heq ka'lăk lươyq hlê, oot hooy tyauq Kadraq.

19Tuôôy hooy athêêp muuyq đoanq đnoyq, Kadraq hloq Ja-kơ, koot kanau Xê-bê-đê, ji Jăng, oh ku kơy, oot đong kaval lươyq tol ge. 20Hloay juneq, atêq tuôôy Kadraq taayh oot, yôôych oot dưk hooy tyauq Kadraq, xôq vaq oot laa Xê-bê-đê măn hlê tol ge kung dii toleq dro dơơp hngơy.

21Kadraq muut đom theng Ka-bê-na-um, ji hloay juneq, đom hngơy Sa-bat, tuôôy heq hooy muut hnhư tagumq, Kadraq xarôp padoh pato. 22Khơl kadrơy tưng hưng truh apok pato ku Kadraq, vii Kadraq heq pato dayq oot đaji e qwuyen da uh nưq leh đaji khơl thơy pato ganuun. 23Hloay juneq, muuyq dro biq garu xi nhôp 'miêh đong măn đom hnhư tagumq ku oot, ay nưq pariau tok, 24đaneq: “Kuh Jê-xu Na-xa-ret, 'wot e apiq kajoq truh Kadraq? Jơq be Kadraq truh xôq păk kaxêêt 'wot? Gô xet Kadraq laa kơyq — Kơy Vah ku Kơy Plêêk!” 25Lôôk Jê-xu toah ni, đaneq: “Dayh hnhep yơu ji vlôh klơlh dro neq!” 26Yôôch atêq tuôôy garu xi va gưlh ay nưq pôôt, ji alo kôt apok, yôôych ni vlôh klơlh ay nưq.

27Tôôy adro yôq varaal, pheq đnooy tajauq athêêk dii mamuuyq đaneq: “Varơuq neq laa aleq? Muuyq pato dayq đơơu tyauq qwuyen da uh! Pheq đnooy kơy nưq đnooy dăt ka garu xi ji oot tameng apok kơy nưq.” 28Yôôch hêêl nưq truh Kadraq hloay juneq pahêêr vlôh loch aduq truh dêq dêh gah gih Ga-li-lê.

29Hloay juneq, tuôôy chuh klơlh hnhư tagumq, oot muut đom hnhư Si-môn ji Anh-rê, kung dii Ja-kơ ji Jăng. 30Tuôôy nưq, miq kadrê ku Si-môn đong biq jiq tanget vik tol chanưng, ji oot vơơ đnooy dii Kadraq truh mo. 31Tuôôy truh jeq, rôp xok ti mo, Kadraq rôôk mo kah, ji jiq tanget yơh klơlh mo, yôôch mo xarôp hơu varơuq oot.

32Anưq yôôch, truh rayôôp klôôy, atêq tuôôy mot hngơy heq lôp, khơl kadrơy xagook truh ka Kadraq dêq hloay dro leq tavơh bingq ji khơl adro biq kamuuych nhôp. 33Kaah theng heq anguk hlê măn ka 'mok. 34Kadraq payơh 'ngưng dro biq jiq jiêh dii đu thưq bingq tâk, ji druyh 'ngưng kamuuych, đơu Kadraq leh ăm pheep kaluh kamuuych tok apok vii oot xet Kadraq.

35Muut ka xaroq meel, tuôôy dêh măn thier kamơng, atêq tuôôy kadrăch kah, Kadraq vlôh pi gôk, hooy truh muuyq aduq wăngq vleng, ji ka aduq nưq, Kadraq apôôy. 36Si-môn ji khơl adro măn dii Kadraq hooy axek Kadraq, 37ji oot axek hloq Kadraq, yôôych tơơl dii Kadraq đaneq; “Tôôy adro đong akhiim thơy.”

38Kadraq dăt oot: “Haay dayh hooy aduq kadrơy, đom kaluh theng gah gih, xôq thơy kung padoh pato kađnư đnoyq, vii thơy heq truh laa bơyh varơuq neq.” 39Kadraq hooy truh loch dêq hloay dêh Ga-li-lê, padoh pato đom kaluh hnhư tagumq ku manih karôp ji druyh kamuuych. 40Tuôôy nưq, muuyq dro biq jiq paruh truh kung Kadraq, apôôy vôôch Kadraq ji kul pôôt, đnooy dii Kadraq, đaneq: “Atoh thơy trôôch, thơy e qwuyen khienq gô jah xarêh.”

41Ji vii arơơk xuum biit angơuq, tuôôy tơơk ti kadraq vlôh, Kadraq vêq muut ay, ji đnooy dii ay: “Gô trôôch. Dayh xarêh yơu.” 42Hloay juneq jiq paruh hlơơp klơlh ay ji ay jah xarêh.

43Atêq tuôôy găk xarooy đnooy adroyq ka ay, Kadraq hloay juneq ăm ay nưq hooy. 44Kadraq dăt ay nưq: “Dayh rơơt rol, ay te liq đnooy kajoq dii paq kê dro leq, bơh dayh hooy, kahnoq xăk dii thơy tơơk tưp ji dayh tưp kaluh kuah lêh vii varơuq jah xarêh ku ay, laa varơuq đơu Môi-se heq pato dayq, đaji muuyq apok xanưk ka oot.” 45Lunư, atêq tuôôy hooy klơlh, ay nưq xarôp đnooy vlôh ka 'ngưng dro ji đnooy hêêl neq loch aduq, pheq dơơp Kadraq leh ik muut đom muuyq theng leq trôôk kahnoq xăk ik đnoyq, đơu Kadraq măn pi gôk aduq kaluh aduq wăngq vleng, ji manih karôp xing tôôy aduq măn đong truh dii Kadraq.