Skip to content
BibleKenya

Cua Bible Literal Text

Ma-thi-ơ 19

Varơuq xalih vlôh laa tuôôy Lôôk Jê-xu heq đnooy yôôch kaluh apok nưq, Kadraq chuh klơlh Ga-li-lê ji hooy truh dêh Ju-đê măn pi hơq tavook daak Jô-đanh. Bing manih karôp tyauq Kadraq ji Kadraq payơh bingq ka oot aduq nưq.

Taleq dro Pha-ri-si hlê jeq Kadraq, thưh Kadraq ji tơơl: “E long leh ăm pheep muuyq dro khơl kanau ka'lăk kadrê ni vii paq kê kakơq leq?” Tuôôy tơơl apok, Kadraq đnooy: “Êêp kơy koq lưp đok đaneq Kơy panưk pajêêk xing tuôôy kapa tep heq panưk vlôh oot, muuyq khơl kanau ji muuyq khơl drê, ji xanoh: ‘Bơyh kơq nưq, khơl kanau hnoq vlôh klơlh vaq ji miq đơu xamăn dii kadrê ni, ji dêq baarq hnoq laa muuyq hlek’ be aal? Pheq đnooy, oot leh măn laa vaarq, bơh laa muuyq hlek. Kơq nưq, varơuq đơu Kơy Plêêk heq takhiit hlê, yôôych koot manih leh ik aklah vlôh.” Oot tơơl dii Kadraq: “Anưq, vii aleq Môi-se heq đnooy pato dăt pheq ăm hla jơyq ka'lăk kadrê yôôych ka'lăk kadrê?” Kadraq tơơl oot đaneq: “Vii varơuq găk xuum ku êêp kơy đơu Môi-se heq ăm pheep êêp kơy ka'lăk kadrê êêp, bơh xing kapa tep, varơuq nưq leh aalq laa đanưq. Bơh gô đnooy dii êêp kơy đaneq đêh vlôh vii kadrôôp apuq atrăp, dro leq ka'lăk kadrê ni yôôch xok dro kadrơy yôôych lôp kadrôôp tuut taak; dro xok manih heq biq ka'lăk kung lôp kadrôôp tuut taak.” Khơl xatyauq tơơl dii Kadraq: “Atoh ka varơuq ku adro khơl kanau kung dii kadrê ni laa đanưq, yôôych yơu iaq leh xok kadrê kanau.” Bơh Kadraq đnooy dii oot: “Leh aalq dêq hloay hnoq ik đoonq nhonq apok neq, bơh laa deng ka khơl leq đơu varơuq nưq jah kahniq ăm. Vii e khơl dro thoon, laa khơl dro jah pa iir vlôh xing đom klaak miq heq anưq; e khơl dro thoon đơu biq khơl drơy dơơp ăm thoon; ji e khơl dro thoon laa khơl dro kadih dơơp thoon kadih ni vii kơq daak dêh daak plêêk. Kơyq hnoq ik đoonq nhonq apok neq, dro nưq dayh đoonq nhonq.”

Atêq nưq, khơl on oh de jah jarooy truh ka Kadraq xôq Kadraq xôq ti tol oot ji apôôy, bơh khơl xatyauq toah oot. Lunư, Lôôk Jê-xu dăt: “Dayh xôq ka khơl on oh truh dii thơy, ji te klơl jư oot, vii daak dêh daak plêêk laa ku khơl dro đanưq.” Atêq tuôôy xôq ti tol oot, Kadraq xing nưq dưk hooy.

Ji 'yo hơq, muuyq dro hơq tuôôy truh jeq Kadraq, heq đnooy: “Thơy lơơy, gô pheq dơơp varơuq kaxay kajoq xôq gô e jah varơuq riirh đơơy đơơy?” Yôôch Kadraq đnooy dii ay: “Aleq ay vôôch gô truh varơuq kaxay? Vơ muuyq Kơy laa tamaq kaxay, măn atoh ay trôôch muut đom varơuq riirh, yôôych dayh jư kaluh ganeen.” Dro nưq tơơl dii Kadraq: “Kaluh ganeen leq?” Yôôch Lôôk Jê-xu dăt: “Te păk kaxêêt manih, te lôp kadrôôp apuq atrăp, te atôk, te dơơp xanưk pa ôôh, dayh e xuum xung miq ji vaq, ji xung xiaq manih gah gih ku ay đaji xăk xamơk ay.” Ay blaay nưq tơơl dii Kadraq: “Gô heq tameng jư dêq hloay kaluh varơuq nưq. Gô măn thiuq varơuq kajoq đnoyq?” Lôôk Jê-xu đnooy dii ay: “Atoh ay trôôch jah xaleep, dayh hooy, dayh tek kaluh kajoq ay e yôôch ăm hloh ka dro adrah, yôôych ay hnoq e kho bauq tol daak plêêk; ji dayh tyauq gô nee!” Bơh tuôôy tameng apok nưq yôôch, ay tadăp blaay heq ka'lăk hooy vii hlu rơu, bơyh ay nưq 'miêh đong e thier 'ngưng garuh anôôp.

Tuôôy nưq, Lôôk Jê-xu đnooy dii khơl xatyauq kadraq: “Dong dik, thơy đnooy dii oh ay đaneq: manih karoh hnoq muut đom daak dêh daak plêêk muuyq trôôk thier pơl. Đơu thơy laay đnooy kung oh ay, xôq ôô laak đa chun hlê troop jarưp laa varơuq măn klêq iaq taso dii manih karoh muut đom daak dêh ku Kơy Plêêk.” Tuôôy nưq, atêq tuôôy tameng anưq, khơl xatyauq thier akêh, tơơl: “Anưq yôôych kơyq hnoq ik jah wơơt?” Damưnq 'yo oot, Lôôk Jê-xu đnooy kung oot: “Dii koot manih, varơuq neq laa leh ik, bơh dii Kơy Plêêk, tôôy varơuq yôôych hnoq ik.” Tuôôy nưq, xôq tơơl hlê, Phi-e-rơ đnooy dii Kadraq: “Thơy 'yo hơq, 'wot heq ka'lăk dêq hloay ji tyauq thơy. Anưq yôôych hnoq e varơuq kajoq deng ka 'wot?” Yôôch Lôôk Jê-xu đnooy dii oot: “Dong dik, thơy đnooy dii oh ay, đaneq oh ay, 'ngưq laa khơl dro heq tyauq thơy, đom xanưm tađôôy đơơu, tuôôy Koot Manih 'ngôôy tol ngôôy tađnah tađnaak kadraq, yôôych oh ay kung hnoq 'ngôôy tol kưl vaarq ngaai, xưh xadrah kưl vaarq adrơơk tamooy I-sơ-ra-ên. Tôôy dro, 'ngưq laa long kơyq heq ka'lăk hnhư wah, oh ay, ay oh, vaq, miq, kadrê, koot long vari ruôngq vii kơq yal ku thơy, hnoq nhonq gôp muuyq hreek yưk ji jah nhonq varơuq riirh đơơy đơơy. Bơh 'ngưng dro adroyq dik hnoq vlôh atêq lôôch, ji khơl dro atêq lôôch hnoq vlôh adroyq dik.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.