Cua Bible Literal Text
Ma-thi-ơ 20
Vii daak dêh daak plêêk yôôych dang đaji muuyq dro kôôch vari, laa dro hooy vlôh muut ka xaroq meel xôq xapo manih dơơp hngơy ka hluôôt nho kơy. Tuôôy nưq, atêq tuôôy heq athêêk kung khơl dơơp hngơy dii muuyq đơ-ni-ê ka muuyq hngơy, kơy patăk oot muut hluôôt nho ku kơy. Ji tuôôy hooy vlôh muut kawah wat thưq pe, kơy hloq sôôq kadrơy đong dưk măn hloh đom aduq tabôôt xa. Kơy đnooy dii oot: ‘Khơl ay kung dayh muut đom hluôôt nho, ji jêêt hngơy taleq laa taxưngq, yôôych gô hnoq bla ka êêp ay.’ Yôôch oot hooy tyauq. Atêq tuôôy laay hooy vlôh muut kawah wat thưq drơu ji thưq xit, kơy kung dơơp đanưq. Anưq yôôch, tuôôy hooy vlôh đom kawat thưq kưl muuyq, kơy 'yo hloq sôôq kadrơy đong dưk, ji kơy đnooy dii oot: ‘Aleq êêp ay dưk măn hloh dêq hngơy ka đnen?’ Oot tơơl dii kơy: ‘Vii be kơyq xapo 'wot.’ Kơy đnooy dii oot: ‘Êêp ay kung dayh hooy muut đom hluôôt nho.’ Yôôch truh rayôôp klôôy, kôôch hluôôt nho dăt dro jư 'yo ku kơy: ‘Dayh taayh khơl dơơp hngơy truh ji bla jêêt hngơy dơơp ka oot, xarôp xing khơl lôôch dik dong truh khơl adroyq dik.’ Atêq tuôôy tawaak truh, khơl dro jah xapo muut kawah wat thưq kưl muuyq, tôôy dro nhonq jah muuyq đơ-ni-ê. Măn khơl dơơp hngơy adroyq dik, tuôôy tawaak truh, heq biit đaneq oot hnoq nhonq 'ngưng iaq, đơu oot kung nhonq muuyq đơ-ni-ê ka tôôy dro. Bơh atêq tuôôy nhonq yôôch, oot ramooy truh manih kôôch vari, đaneq: ‘Khơl dơơp hngơy atêq lôôch nưq heq dơơp varơuq muuyq wat, đơu kôôch xôq oot muuyq ja dii 'wot, laa khơl dro heq chiuq galeh galal ratuôôt ka hngơy kung dêh tôq jaq kađuh.’ Bơh tơơl hlê, dro kôôch đnooy dii muuyq dro đom bing oot: ‘Nee ay hơq, gô leh e xa dơơp têq dii êêp ay. Be aalq êêp ay heq chiuq dii gô muuyq đơ-ni-ê be aalq? Dayh xok phon ku ay ji hooy yơu. Măn gô yôôych trôôch ăm ka khơl dro lôôch neq kung dang đaji ka ay. Be aalq e pheep ka gô xôq dơơp varơuq gô trôôch dii kaluh kajoq ku gô? Long mot ay yôôych be chiuq vii gô e xuum kaxay?’ Dang anưq, dro lôôch dik hnoq vlôh droyq dik ji dro droyq dik hnoq vlôh lôôch dik.”
Đong tuôôy hooy tok theng Jê-ru-sa-lem, Lôôk Jê-xu jarooy tyauq kưl vaarq khơl xatyauq đêh dii kadraq, ji tol trôôk hooy, Kadraq đnooy dii oot: “'Yo nee, haay đong hooy tok truh Jê-ru-sa-lem, ji Koot Manih hnoq biq rôp atăq ka khơl thơy tơơk tưp kôt ji khơl thơy pato ganuun, yôôch oot hnoq rôp xadrah păk kaxêêt Kadraq ji hnoq pahnăp Kadraq ka kaluh tamooy kadrơy xôq oot 'yo xagiel, hmơt tiel, ji đongq đing Kadraq tol gay charăk. Yôôch muut hngơy thưq pe, Kadraq hnoq riirh hlê.”
Tuôôy nưq, miq ku vaarq koot kanau Xê-bê-đê kung dii khơl koot mo truh jeq Kadraq, kul kuh ji apôôy vôôch muuyq varơuq xing Kadraq. Yôôch Kadraq đnooy dii mo: “Mư trôôch varơuq kajoq?” Mo tơơl dii Kadraq: “Apôôy patăk ăm ka vaarq dro koot kanau neq ku gô, muuyq dro hnoq ik 'ngôôy măn pi akoh, ji muuyq dro măn pi akeng thơy đom daak dêh ku thơy.” Bơh tuôôy tơơl hlê, Lôôk Jê-xu đnooy: “Pe dro be xet êêp đong apôôy vôôch varơuq kajoq 'leq. Baarq oh ay hnoq ik hôôch dooy đơu thơy xung hôôch be?” Oot tơơl dii Kadraq: “'Wot hnoq ik.” Kadraq đnooy dii oot: “Tabơh oh ay hnoq hôôch dooy ku thơy, bơh xôq 'ngôôy măn pi akoh ji măn pi akeng ku thơy leh aalq laa varơuq ku thơy đinq, bơh laa deng ka khơl dro heq jah ralauq xôq xing Vaq thơy.” Atêq tuôôy tameng varơuq neq, kưl khơl xatyauq hơq tôq jaraq dii vaarq dro oh ay. Bơh tuôôy heq taayh oot truh dii kadraq, Lôôk Jê-xu đnooy: “Oh ay xet đaneq khơl vuua lôôk ku kaluh tamooy daak kadrơy yôôych ahnanh ahnek manih dêh, ji khơl dro dơơp kôt yôôych xok qwuyen lưk tol khơl drơy. Đom oh ay yôôych leh đanưq. Tađôôy muut đnư, atoh kơyq trôôch vlôh kôt đom khơl oh ay, yôôych dro nưq hnoq dơơp dro hơu varơuq ku oh ay, ji dro leq trôôch dơơp akoq đom oh ay yôôych hnoq dơơp xapok ku oh ay, pheq đnooy đaji Koot Manih heq leh truh xôq jah hơu varơuq, bơh laa xôq hơu varơuq, ji xôq tưp xăk riirh kadraq đaji jaq bla xaloah ka 'ngưng manih.”
Yôôch tuôôy oot xing theng Jê-ri-kô hooy vlôh, muuyq bing manih karôp hooy tyauq Kadraq. Ji 'yo hơq, vaarq dro apul đong 'ngôôy măn pi gah trôôk. Atêq tuôôy tameng đaneq Lôôk Jê-xu đong hooy dalơh hlê, oot taayh tok, đaneq: “Kuh Lôôk, koot vuua Đa-vik, apôôy biit angơuq rơy 'wot.” Bơh manih karôp toah ka baarq, xôq oot hnhep yơu, anưq đơu oot laay taayh kôt iaq đnoyq, đaneq: “Kuh Lôôk, Koot vuua Đa-vik, biit angơuq rơy 'wot.” Tuôôy dưk hlê yôôch, Lôôk Jê-xu taayh oot truh ji đnooy: “Êêp ay trôôch gô dơơp kajoq ka êêp ay?” Oot tơơl dii Kadraq: “Kuh Lôôk, nưq laa apôôy ăm mot 'wot jah tađnah.” Tuôôy nưq, bơyh xuum biit angơuq, Lôôk Jê-xu vêq muut mot oot. Vơ hloay, oot jah tađnah mot hlê ji hooy tyauq Kadraq.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.