Ma-thi-ơ 18

1Muut wat nưq, khơl xatyauq truh jeq Lôôk Jê-xu, tơơl: “Atêq dik yôôych kơyq laa kôt iaq dêq đom daak dêh daak plêêk?” 2Yôôch atêq tuôôy taayh muuyq oh de truh dii kadraq, Kadraq xôq ôn măn katul oot 3ji đnooy: “Dong dik, thơy đnooy dii oh ay, atoh oh ay leh jah tađôôy đơơu ji vlôh jêêk đaji khơl oh de, yôôych kajưk dik oh ay hnoq leh hooy muut đom daak dêh daak plêêk. 4Anưq, paq kê kơyq apôôt xăk pôôt dang đaji oh de neq, yôôych dro nưq laa kôt iaq dêq đom daak dêh daak plêêk. 5Atoh kơyq taayh yal thơy tiip muuyq oh de đaji luneq, yôôych dro nưq tiip rươk thơy. 6Bơh dro leq dơơp lôp kadrôôp ka muuyq đom khơl dro de dik neq, nưq laa khơl dro tuôq aduq thơy, yôôych varơuq tơơl iaq ka dro nưq 'ngưq laa muuyq apal xay deng ka lưưa jah vek rawiit ranong ni, yôôch ni biq panheet karăp pôôt tahli jaruq.

7Ra ơơh ka dêh araak vii kơq kaluh kajoq dơơp gưlh lôp! Bơyh vii ưng kajoq dơơp gưlh lôp pheq truh laa varơuq pheq xalih truh, tabơh anưq, ra ơơh hloay ka dro đơu kơq dơơp gưlh lôp truh xing ado nưq! 8Mot kadrơy, atoh ti long jôôk oh ay dơơp ka oh ay lôp kadrôôp, dayh dool ka'lăk ni ji qweek xangưưy klơlh oh ay. Nưq laa varơuq kaxay ka oh ay xôq biq atul ti long atul jôôk yôôch muut đom varơuq riirh iaq laa tuôôy e vaarq ti long vaarq jôôk xôq yôôch biq qweek muut đom ôôlh đơơy đơơy. 9Atoh mot oh ay dơơp ka oh ay gưlh lôp, dayh galek ni vlôh ji avih xangưưy klơlh oh ay. Nưq laa varơuq tolh ka oh ay xôq vơ măn muuyq mot yôôch muut đom varơuq riirh, iaq laa tuôôy e vaarq mot xôq yôôch biq qweek muut ôôlh karuk. 10Dayh văch 'yo, oh ay be duh 'yo leh ra kajoq muuyq đom khơl dro de dik neq. Vii thơy đnooy dii oh ay đaneq yaak plêêk ku oot tol plêêk hloay hloay 'yo hloq mot Vaq thơy tol daak plêêk. 11[Vii Koot Manih heq truh xôq wơơt dro biq hyaak hlơơp.] 12Oh ay biit aleq? Atoh muuyq dro hơq e muuyq hreek poop trưưu, đơu muuyq đom sôôq oot biq hyaak, yôôych be aalq atêq tuôôy xôq hlê xit kưl xit poop tol adroay đoot ji hooy axek, dro nưq akhiim axek poop trưưu biq hyaak be aalq? 13Atoh dro nưq hnoq ik axek hloq ni, yôôych dong dik, thơy đnooy dii oh ay đaneq dro nưq hnoq hlah hlaak truh ni iaq laa truh xit kưl xit poop trưưu leh biq hyaak. 14Dang anưq, iq trôôch kangưưr Vaq tol daak plêêk ku oh ay leh aalq laa xôq muuyq đom khơl dro de dik neq biq hư hlơơp.

15Mot kadrơy, atoh muuyq dro oh ay ku oh ay lôp kadrôôp dii oh ay, dayh hooy, dayh hooy đnooy vlôh ka dro dii oh ay dii dro nưq đơu heq. Atoh dro nưq tameng tyauq oh ay, yôôych oh ay jah hlê dro oh ay haay. 16Bơh atoh dro nưq leh tameng tyauq dayh jarooy tyauq haay muuyq long vaarq dro đnoyq xôq ka gamưh huuy ku vaarq long pe dro dơơp xanưk yôôych tôôy apok hnoq ik 'yo nhonq. 17Măn atoh dro nưq leh chiuq tameng tyauq oot, dayh đnooy vlôh ka tayuup vah. Đơu atoh dro nưq kung leh chiuq tameng tyauq tayuup vah, yôôych đôôyq dii oh ay, dro nưq pheq đnooy pheq đaji laa tamooy kadrơy ji dro xok xơu. 18Dong dik, thơy đnooy dii oh ay, atoh oh ay vek paq kê varơuq kajoq 'laarq vari, yôôych varơuq nưq hnoq biq vek tol plêêk; ji atoh oh ay luh paq kê varơuq kajoq măn 'laarq vari, yôôych varơuq nưq hnoq jah luh tol plêêk. 19Muuyq yưk tra, dong dik, thơy đnooy dii oh ay đaneq atoh vaarq dro đom oh ay muuyq xuum dii mamuuyq 'laarq vari truh tôôy varơuq kajoq đơu long oot apôôy vôôch, yôôych varơuq nưq hnoq jah dơơp jêêk ka oot xing Vaq thơy tol daak plêêk. 20Vii aduq leq e vaarq long pe dro jah anguk hlê đom yal thơy, yôôych thơy măn aduq nưq katul oot.”

21Atêq nưq, atêq tuôôy truh jeq, Phi-e-rơ tơơl dii Kadraq: “Kuh Lôôk, muuyq dro oh ay gô hnoq lôp kadrôôp tachơơl dii gô ji gô hnoq tha ka ay nưq taleq yưk? E jơq truh pơh yưk be?” 22Lôôk Jê-xu đnooy dii kơy: “Thơy leh đnooy dii ay truh pơh yưk, bơh laa truh pơh kưl yưk pơh. 23Vii kakơq neq, daak dêh daak plêêk hnoq ik ta 'yo đaji muuyq dro dơơp vuua, đơu dro nưq xung 'yo jauq rahlăp jơyq dii khơl xapok kơy. 24Tuôôy nưq, tuôôy vuua xarôp jauq sôôh, muuyq dro elôôkq kưl ravơu ta-lâng jah jarooy truh ka vuua. 25Bơh dro nưq leh e kajoq bla, lunưq vuua heq patăk ka ay nưq pheq biq tek, kung kadrê, koot ji dêq hloay tôôy kajoq ni e, yôôch bla lôôkq. 26Anưq laa atêq tuôôy gưlh riêp pôôt, dro xapok nưq kul kangưưr vuua, tơơl: ‘Kôôch lơơy, apôôy xôq axit hngơy ka gô, yôôch gô hnoq bla hlê kadraq dêq hloay.’ 27Tuôôy nưq, bơyh xuum biit angơuq, kôôch ku adro xapok nưq heq luh tha ji ka'lăk lôôkq ka ay nưq. 28Bơh tuôôy vlôh pi gôk yôôch, adro xapok nưq tavơh muuyq đom khơl dro kung xapok dii ni, laa dro elôôkq ni muuyq hreek đơ-ni-ê, ji atêq tuôôy rôp jư dro nưq, ni boop ranong, dăt: ‘May elôôkq kajoq yôôych bla yơu.’ 29Anưq laa, atêq tuôôy kul pôôt, dro kung xapok dii ni apôôy ratuôôt ni, đaneq: ‘Apôôy xôq axit hngơy ka gô, yôôch gô hnoq bla hlê ay.’ 30Bơh ay nưq leh chiuq. Tađôôy muut đnư, tuôôy dưk hooy, ni dăt rôp dro hơq muut tu dong truh tuôôy ay nưq bla dêq sôôq jêêt elôôkq. 31Anưq, atêq tuôôy hloq varơuq heq xalih vlôh, khơl dro kung xapok ku ni thier jiq xuum. Tuôôy hooy truh yôôch, oot tơơl hlê tôôy varơuq dii kôôch oot tôôy varơuq heq xalih vlôh. 32Atêq nưq, atêq tuôôy patăk ka adro xapok nưq truh, kôôch ku ni đnooy dii ni: ‘Adro xapok xơk tauq hơq, gô heq tha dêq lôôkq nưq ka ay vii ay heq apôôy vôôch gô. 33Varơuq kung duh dơơp deng ka ay leh aalq laa biit angơuq dro kung xapok dii ay, kung đaji gô heq biit angơuq ay, be aalq?’ 34Bơyh biq dơơp jaraq đanưq, kôôch ku ni heq pahnăp ni ka bing tiel dook dong truh tuôôy ni bla dêq tôôy kajoq elôôkq. 35Vaq tol plêêk ku thơy kung hnoq dơơp hlê dii oh ay tyauq trôôk đanưq, atoh tôôy dro đom oh ay leh tha kadrôôp ka dro oh ay ku haay dik xing xuum klaak haay.”