Skip to content
BibleKenya

Cua Bible Literal Text

Ma-thi-ơ 14

Muut kawah wat nưq, vuua dưk xanok Hê-rôt tek hêêl truh Lôôk Jê-xu. Vuua đnooy dii khơl xapok kơy: “Nưq laa Jăng Bap-tit. Kơy nưq heq khienq riirh hlê xing aduq kaxêêt, lunưq kơq nưq, kaluh varơuq taay yaak đong e đom dro neq.” Jo Hê-rôt, atêq tuôôy rôp Jăng, heq ăm kal vek kơy ji rôp karuk tu, vii kơq Hê-rô-đia, kadrê ku Phi-lip, ma oh kanau vuua. Vii Jăng heq đnooy dii vuua: “Truh phon vuua, leh ik pheep xok mo nưq.” Ji long xung păk kaxêêt kơy nưq dơyh, bơh vuua yôq manih karôp, vii oot 'yo Jăng đaji muuyq hnhư hlit. Bơh tuôôy truh waal adoot xa hngơy pa iir ku Hê-rôt, koot kadrê ku Hê-rô-đia ayuch ayauq ka katul waal ji dơơp hlah xuum Hê-rôt, Vii anưq, vuua heq tavek kung dii muuyq apok paleek xôq kahniq ka mư long varơuq kajoq đơu mư vôôch. Tuôôy nưq, tuôôy heq biq patuut adroyq nưq xing miq ni, mư tơơl: “Apôôy ăm ka koot hloay aduq neq, akoq ku Jăng Bap-tit măn tol môôm.” Ji long thier hlu rơu, bơh vii kơq apok paleek ku kơy ji khơl manih mơơy kung 'ngôôy xa, vuua heq patăk dăt xôq mư jah kahniq ăm. Atêq tuôôy patăk manih hooy, vuua ăm dool akoq Jăng đom tu. Akoq ku kơy jah adrơk truh măn tol môôm yôôch jah palo ka mư kadrê, ji mư adrơk ăm ka miq mư. Tuôôy truh jeq ik yôôch, khơl xatyauq ku kơy xok xaak ji up xôq ni. Ji tuôôy heq hooy truh, oot taboon hlê ka Lôôk Jê-xu.

Tuôôy nưq, tuôôy tameng yôôch, Lôôk Jê-xu hooy klơlh đnư đom muuyq poop ge hooy truh aduq wăngq we măn đêh muuyq dro. Vii tameng xet đanưq, kaluh manih karôp xing kaluh theng hooy jôôk tyauq Kadraq. Ji atêq tuôôy hooy vlôh, Kadraq hloq muuyq bing manih karôp 'ngưng, yôôych arơơk xuum biit angơuq dii khơl manih karôp ji Kadraq payơh hlah khơl dro jiq jiêh ku oot. Tuôôy nưq, tuôôy truh rayôôp klôôy, khơl xatyauq truh dii Kadraq, tơơl: “Aduq neq yôôych wăngq vleng, ji wat neq yôôych ahnuy yôôch. Apôôy thơy ăm padơy bing manih xôq tuôôy hooy truh kaluh palơy yôôch, oot hnoq ik root tuôông xa ka oot.” Bơh Lôôk Jê-xu đnooy dii oot: “Oot leh e duh xôq chuh hooy. Oh ay dayh ăm oot xa.” Tuôôy nưq, oot tơơl dii Kadraq: “Kađneng 'wot be e kajoq đêh vlôh dăp poop tôôp ji vaarq poop koot ka.” Yôôch Kadraq đnooy: “Dayh adrơk oot truh đnen ka thơy.” Ji tuôôy patăk ka manih karôp 'ngôôy pôôt tol rek yôôch, tuôôy adrơk dăp poop tôôp ji vaarq poop ka, 'ngơơk mot tok plêêk, Kadraq kuh qwaay, ji pleelh vlôh, Kadraq palo tuôông xa ka khơl xatyauq, măn khơl xatyauq ahlook ăm ka manih karôp. Dêq hloay manih karôp heq xa ji jah phiq phơh. Yôôch khơl drơy tôôch ưng măn raah hlê xing kaluh apek tapleh raah — jah kưl vaarq vuk atar viik. Tuôôy nưq, sôôq dro xa laa kơh dăp ravơu khơl kanau, koq jauq khơl drê ji on oh de.

Vơ hloay, Kadraq ahluk dăt khơl xatyauq tawaak muut đom ge ji hooy adroyq Kadraq hlê gah pi hơq, đom tuôôy Kadraq dăt manih karôp xuq. Tuôôy heq ăm manih karôp xuq, Kadraq hooy tok ma đoot xôq kadih apôôy đêh. Truh klôôy, Kadraq măn đnư muuyq dro. Măn ge măn katul tahli yôôch yôôych biq daak kapuh kaxuh vii khiel kaxơơlh. Tuôôy nưq, muut đom kawat poot klôôy nưq, Kadraq truh kung oot, tuôôy hooy jôôk tol tahli. Bơh atêq tuôôy hloq Kadraq tawaak hooy tol tahli, khơl xatyauq biq varaal varih, đnooy đaneq: “Nưq laa kamuuych,” yôôch oot laa tarok tok đom tuôôy yôq varaal. Anưq laa, Lôôk Jê-xu vơ tok apok dii oot đaneq: “Te yôq liq! Laa thơy neq. Te yôq!” Tuôôy nưq, tuôôy tơơl hlê Kadraq, Phi-e-rơ tơơl: “Kuh Lôôk, atoh laa thơy, apôôy patăk ka gô hooy tol raak daak truh dii thơy.” Yôôch Kadraq patăk: “Dayh truh yơu.” Ji atêq tuôôy tawaak vlôh klơlh ge, Phi-e-rơ heq tawaak hooy tol daak xôq truh dii Lôôk Jê-xu. Bơh tuôôy hloq khiel kalh, kơy yôq varaal, ji tuôôy xarôp karăp pôôt, kơy laa tok đaneq: “Lôôk lơơy, wơơt rơy gô!” Vơ hloay, atêq tuôôy tơơk ti vlôh, Lôôk Jê-xu rôp xok Phi-e-rơ ji đnooy ka kơy: “Nee dro axit xuum tuôq, bơyh kơq kajoq đơu ay biit yôq?” Tuôôy oot tawaak tok tol ge yôôch, khiel hnhep klôôp. Măn khơl dro đom ge yôôych kuh ayuôôt Kadraq, đaneq: “Dong dik, thơy laa koot Kơy Plêêk.”

Tuôôy dalơh hlê pi hơq yôôch, oot truh muut gah aduq Gê-nê-xa-rêt. Atêq tuôôy 'yo vlôh Kadraq, manih karôp măn aduq nưq dăt manih hooy pahêêr truh loch dih dêh rawiit gah nưq, ji khơl drơy jarooy truh ka Kadraq tôôy dro e bingq. Oot vôôch Kadraq vơ xôq, oot hnoq ik vêq muut kathơơl aau ku Kadraq, ji paq kê laa kơyq vêq muut yôôych jah payơh.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.