Skip to content
BibleKenya

Cua Bible Literal Text

Ma-thi-ơ 13

Đom hngơy nưq, atêq tuôôy hooy vlôh klơlh hnhư, Lôôk Jê-xu 'ngôôy pi gah tahli. Muuyq bing manih thier karôp heq anguk hlê rawiit gah Kadraq. Pheq đnooy, atêq tuôôy tawaak tok muuyq poop ge, Kadraq 'ngôôy pôôt, đơu dêq hloay manih karôp yôôych dưk tol gah. Yôôch Kadraq đnooy dii oot 'ngưng varơuq bơơn apok atoh, đaneq: “'Yo nee, muuyq dro paraay adrek hooy vlôh xôq paraay. Tuôôy paraay adrek, muuyq sôôq kalook rôh gah trôôk, yôôych xêêp plêêk truh ji xa dêq oot. Muuyq sôôq kadrơy rôh tol vari phơu kalook, laa aduq leh e 'ngưng vari dik. Vơ hloay, kalook adrek pluh vlok, vii katuh vari leh e jaruq. Bơh atêq tuôôy mot hngơy vlok tok, ni heq biq vuh jah ji yauq kateh vii leh e rayah. Măn muuyq sôôq kadrơy rôh katul kaluh ưk jaliê, yôôych kaluh ưk jaliê kôt tok ji rơơk hnhuuk oot. Đơu sôôq kadrơy đnoyq rôh tol vari kaxay ji ăm vlôh raak play, kalook yôôych muuyq hreek yưk 'ngưng iaq, kalook yôôych drơu kưl, kalook yôôych pe kưl. Kơyq e tôôr, dayh tameng.”

Yôôch khơl xatyauq, atêq tuôôy hlê jeq, heq tơơl dii Kadraq: “Vii kakơq kajoq đơu thơy laay đnooy bơơn kaluh apok atoh dii manih karôp?” Anưq laa, tuôôy tơơl apok, Kadraq heq đnooy dii oot đaneq: “Đôôyq dii oh ay yôôych heq jah kahniq xôq nhonq xet kaluh varơuq kadook truh daak dêh daak plêêk, măn đôôyq dii khơl adro nưq yôôych leh jah kahniq ăm. Bơyh dro leq e, yôôych truh phon dro nưq hnoq jah ăm athêêp, ji dro nưq hnoq jah raah 'ngưng. Bơh dro leq leh e, yôôych hnoq biq xok klơlh ni hloay ka varơuq dro nưq đong e. Vii kakơq neq, thơy đnooy dii oot bơơn apok atoh; vii long e 'yo, oot be 'yo xet; ji long tôôr tameng, oot leh tameng ik, kung leh hlolh ik. Ji apok hlit ku Ê-sai yôôych jah jêêk aduq oot, đaneq:

‘Đôôyq dii varơuq tameng, êêp koot hnoq tameng, đơu kajưk dik êêp koot hnoq leh hlolh;

măn tuôôy 'yo, êêp koot hnoq 'yo, đơu kajưk dik êêp koot hnoq leh 'yo xet.

Vii xuum tamooy neq heq vlôh jêêk kamơng jaluk;

tôôr oot heq tameng trôôk pơl hwơơl,

ji oot heq kađniêp mot oot,

leh kheoq oot hnoq ik 'yo hloq bơơn mot,

tameng bơơn tôôr,

hlolh bơơn xuum klaak,

yôôch wiit xuq hlê,

ji Gô hnoq payơh hlah oot.’

Bơh vanong hloay laa mot ku oh ay, vii hloq ik, ji tôôr ku oh ay, vii tameng ik. Dong dik, thơy đnooy dii oh ay đaneq 'ngưng hnhư hlit ji manih hyioh jăk trôôch kajoq xôq hloq kaluh kajoq oh ay hloq, đơu oot heq leh hloq ik, ji xôq tameng kaluh kajoq oh ay tameng, đơu oot heq leh tameng ik. Anưq, oh ay dayh tameng apok atoh truh dro paraay adrek. Tôôy dro tameng đaauq ku daak plêêk đơu leh hlolh, yôôych kamuuych truh ji varoh xok kaluh kajoq heq jah paraay đom xuum dro nưq. Neq laa kalook adrek biq paraay gah trôôk. Măn kalook adrek bi paraay muut vari phơu kalook, nưq laa adro tameng đaauq ji vơ hloay nhonq xok đaauq kung dii xuum hlah hlaak; đơu dro nưq leh e rayah đom ni, bơh laa măn hlê đa đơ; anưq yôôch pơl dal long rôp toop xalih truh vii kơq đaauq, yôôych dro nưq vơ biq gưlh lôp. Măn kalook adrek biq paraay katul kaluh ưk jaliê, neq laa dro tameng đaauq, đơu varơuq tabông truh đơơy neq ji biit apau ku varơuq karoh e dơơp ka đaauq nưq rơơk hnhuuk ji ni vlôh leh raak play. Kaluh kalook adrek jah paraay tol vari dik, nưq laa adro tameng đaauq ji hlolh, dro nưq dik raak play ji vlôh play muuyq vlôh muuyq hreek, muuyq vlôh drơu kưl, muuyq vlôh pe kưl.”

Kadraq taboon kangưưr oot muuyq apok atoh kadrơy, đaneq: “Daak dêh daak plêêk jah 'yo đaji muuyq dro heq paraay adrek kaxay đom ruôngq ni. Bơh tuôôy khơl drơy vik, dro tachơơl ku kơy nưq truh ji paraay rek lahaay aluq muut katul va away yôôch hooy klơlh. Tuôôy ưk va kôt tok ji vlôh raak, yôôych rek lahaay kung biq looy vlôh. Juneq, khơl xapok ku kôôch hnhư nưq, atêq tuôôy truh, heq đnooy dii kơy: ‘Kơy kôôch lơơy, be aalq kơy heq paraay kalook adrek kaxay đom ruôngq kơy ih? Anưq, rek lahaay xing leq đơu e?’ Anưq laa kơy đnooy ka oot: ‘Muuyq dro tachơơl heq dơơp varơuq neq.’ Yôôch khơl xapok tơơl dii kơy: ‘Anưq, kơy e trôôch tuôôy vlôh đnư, 'wot vưyq dêq rek be?’ Bơh kôôch tơơl: ‘Te, leh kheoq đong tuôôy vưyq rek lahaay, khơl ay hnoq vưyq va away achung dii rek. Dayh xôq dêq tavaarq jah kung kôt tok dong truh tuôôy goch, ji muut katuôôy goch, gô hnoq dăt khơl thơq goch: Adroyq ik, dayh anguk rek lahaay hlê ji vek oot vlôh bo xôq vuh oot ka'lăk, bơh dayh anguk va away muut đom pơ xôq ku gô.’”

Kadraq taboon kangưưr oot muuyq apok atoh kadrơy, đaneq: “Daak dêh daak plêêk yôôych dang đaji muuyq kalook avơy đơu atêq tuôôy xok, muuyq dro heq paraay đom ruôngq ni; đơu kalook adrek nưq tabơh laa de dik đom dêq hloay kaluh kalook adrek, bơh tuôôy ni kôt tok, ni kôt iaq kaluh adrek ưk đom hluôôt ji vlôh jêêk muuyq ưk gay, pheq đnooy xêêp plêêk truh ji dơơp tapu tol kaluh đook ku ni.” Kadraq taboon ka oot muuyq apok atoh kadrơy: “Daak dêh daak plêêk yôôych dang đaji tape đơu atêq tuôôy xok, dro khơl drê heq anhơơu dii pe hlưk bôôt dong truh tuôôy dêq ka bôôt vôô tok.”

Lôôk Jê-xu heq đnooy tôôy varơuq nưq dii manih karôp bơơn apok atoh, ji Kadraq be đnooy varơuq kajoq dii oot đơu leh bơơn apok atoh, dơơp aleq ka apok heq jah xanoh gamưh hnhư hlit jah jêêk, đaneq:

“Gô hnoq luh huuy Gô bơơn kaluh apok atoh.

Gô hnoq đnooy vlôh kaluh varơuq hmưq jah kadook padu xing tuôôy panưk kahnier plêêk vari.”

Atêq nưq, tuôôy heq chuh klơlh manih karôp, Kadraq hooy muut hnhư, Khơl xatyauq Kadraq truh jeq Kadraq, tơơl: “Xiin padoh hlolh ka 'wot apok atoh truh rek lahaay đom manay ruôngq.” Tuôôy nưq, tuôôy tơơl apok, Kadraq đnooy: “Adro paraay adrek tolh laa Koot Manih, đơu manay ruôngq laa dêh araak, măn kalook adrek tolh — nưq laa koot xau ku daak plêêk, Wih hlê, rek lahaay laa koot xau ku adro xơk, đơu adro tachơơl, laa adro heq paraay rek, laa kamuuych. Măn xiêk goch laa hngơy hlơơp dêh, đơu khơl thơq goch laa yaak plêêk. Anưq, luleq đơu rek lahaay jah anguk hlê ji biq vuh đom ôôlh, yôôych varơuq kung hnoq xalih vlôh đanưq muut ka hngơy hlơơp dêh. Koot Manih hnoq patăk dăt yaak plêêk ku kadraq, ji oot hnoq anguk vlôh klơlh daak dêh Kadraq dêq hloay kaluh kajoq dơơp gưlh lôp kung khơl adro dơơp varơuq xơk tauq. Ji oot hnoq qweek oot muut loo ôôlh, laa aduq hnoq e varơuq nhim alo ji takik kaneeng. Tuôôy nưq, khơl manih hyioh jăk hnoq xaraar tađnah đaji mot hngơy đom daak dêh ku Vaq oot. Kơyq e tôôr, dayh tameng.”

“Daak dêh daak plêêk yôôych dang đaji muuyq kho bauq jah kadook padu đom muuyq aloq ruôngq, laa ưng đơu muuyq dro heq kadook xôq atêq tuôôy axek hloq. Vlôh xing xuum hlah hlaak ku ni, dro nưq dưk hooy, tek dêq hloay tôôy kajoq ni e ji root aloq ruôngq nưq. Athêêp đnoyq, daak dêh daak plêêk yôôych dang đaji muuyq dro, laa dro tabôôt xa axek akhiim ngok traai quiq jaq. Anưq yôôch, tuôôy heq axek jah muuyq kalook ngok traai thier laa e jaq, yôôych atêq tuôôy chuh hooy, ay heq tek dêq hloay tôôy kajoq ni e ji root ni.

Măn đnoyq, daak dêh daak plêêk yôôych dang đaji muuyq poop lưyq jah qweek pôôt tahli ji duuy tok đu thưq ka, đơu tuôôy lưyq heq viik, khơl drơy duuy muut gah, ji atêq tuôôy 'ngôôy pôôt, oot tôôch xok kaluh ka tơơl muut đom vuk tađnưk, măn ưng thưq be ik xung liq, oot qweek vlôh pi gôk. Tôôy varơuq hnoq laa đanưq muut ka hngơy hlơơp dêh: Yaak plêêk hnoq hooy vlôh, ji hnoq aklah vlôh bing xơk tauq klơlh katul khơl dro hyioh jăk, Yôôch oot hnoq qweek bing nưq muut loo ôôlh, laa aduq hnoq e varơuq nhim alo ji takik kaneeng. Oh ay heq hlolh dêq kaluh varơuq neq koq?” Oot tơơl kung Kadraq: “Heq hlolh.” Tuôôy nưq, Kadraq đnooy dii oot: “Vii kakơq neq, tôôy thơy pato ganuun heq jah pato dayq ka daak dêh daak plêêk yôôych dang đaji muuyq dro kôôch hnhư, laa adro lôôy vlô đôô duut ji đôô đơơu xing đom pơ xôq ku ni.” Varơuq xalih vlôh nưq laa tuôôy Lôôk Jê-xu payôôch kaluh apok atoh neq, Kadraq heq chuh hooy klơlh aduq nưq.

Atêq tuôôy hooy truh dêh katu hnhư kadraq, Kadraq heq pato dayq manih karôp đom hnhư tagumq ku oot, pheq dơơp khienq oot akêh ji đnooy: “Varơuq khôôt xet nưq kung kaluh pheep akêh xing aduq manih neq vlôh xing leq? Be aalq manih neq laa koot kanau kơy thơq 'môôk ih? Be aalq miq kơy nưq jah taayh laa Ma-ri, ji khơl oh kanau ku kơy laa Ja-kơ, Jô-sep, Si-môn ji Ju-đa ih? Be aalq dêq hloay khơl ma oh kadrê ku kơy nưq đong măn dii haay be aalq? Anưq, tôôy varơuq neq xing aduq kơy nưq vlôh xing leq?” Oot biq xatôôlh gưlh aduq Kadraq. Bơh Lôôk Jê-xu đnooy dii oot: “Hnhư hlit be biq 'yo leh ra kajoq, đêh vlôh aduq dêh hnhư katu ni ji đom kôôch hnhư ni.” Kadraq heq leh dơơp 'ngưng pheep akêh ka đnư vii xuum leh tuôq ku oot.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.