Skip to content
BibleKenya

Cua Bible Literal Text

Ma-thi-ơ 15

Atêq nưq, khơl manih Pha-ri-si ji Thơy pato ganuun xing Jê-ru-sa-lem truh dii Lôôk Jê-xu, đnooy đaneq: “Aleq khơl xatyauq ku thơy gưlh lôp kaluh ganuun pato ku manih hnu? Vii kơq khơl oot leh 'nhaau ti tuôôy xa tôôp.” Bơh tuôôy tơơl hlê, Kadraq đnooy dii oot: “Aleq êêp kơy laay gưlh lôp ganeen ku Kơy Plêêk vii kơq kaluh pato dayq manih hnu ku êêp? Vii Kơy Plêêk heq xanoh pato, đaneq: ‘Dayh e xuum xung ka miq vaq ku koot,’ ji ‘Dro leq karoay axaap vaq long miq, dayh păk kaxêêt dro nưq.’ Bơh êêp kơy đnooy: ‘Dro leq đnooy dii vaq long miq ni: “Long varơuq kajoq xing aduq koot hnoq ik e ik ka miq vaq raay laa kuah lêh tơơk tưp Kơy Plêêk yôôch,”’ yôôych dro nưq hnoq leh duh pheq e xuum xung miq vaq ni. Đanưq, êêp kơy heq ka'lăk apok Kơy Plêêk vii kơq pato dayq manih hnu ku êêp. Bing xuum pa ôôh hơq! Ê-sai heq đnooy hlit thier jơq truh êêp kơy, đaneq:

‘Tamooy neq vanê ayuôôt gô măn ka huuy kapiet,

bơh xuum oot yôôych xangưưy klơlh Gô.

Đơu oot ayuôôt laat Gô kach đaji hloh,

tuôôy pato kaluh ganeen laa kaluh ganuun ku koot manih.’”

Yôôch atêq tuôôy taayh bing karôp truh, Kadraq đnooy dii oot: “Dayh tameng ji hlolh: Be varơuq kajoq hooy muut đom huuy dơơp klơơr 'yêq muuyq dro, bơh laa varơuq xing huuy đnooy vlôh, ưng neq dơơp klơơr 'yêq dro nưq.” Atêq nưq, tuôôy heq truh jeq, khơl xatyauq tơơl dii Kadraq: “Thơy xet đaneq khơl manih Pha-ri-si heq hloq biq đnooy ra ơơh atêq tuôôy tameng apok nưq be?” Bơh tuôôy tơơl apok, Kadraq đnooy: “Tôôy ưk đơu Vaq tol plêêk ku thơy leh pêêt hnoq biq vưyq xarơyh dêq. Kê ka oot! Oot laa khơl jarooy trôôk apul. Đơu atoh dro apul jarooy dro apul, yôôych dêq baarq hnoq klêh pôôt raluk.” Tuôôy nưq tuôôy tơơl hlê, Phi-e-rơ tơơl dii Lôôk: “Apôôy tauq rơy ka 'wot apok atoh nưq.” Bơh Kadraq đnooy: “Pheq đnooy truh juneq, oh ay kung leh hlolh ih? Oh ay kung koq hlolh đaneq tôôy thưq hooy muut đom huuy yôôych hooy pôôt klaak yôôch jah eh vlôh đom hnhư kaxoh long aleq? Bơh kaluh kajoq vlôh klơlh huuy vlôh xing xuum klaak, ji ưng nưq dơơp klơơr 'yêq khơl drơy. Vii xing xuum đnooy vlôh kaluh xuum biit xơuq 'moh, păk kaxêêt manih, tuut taak, apuq atrăp, xa atôk, xanưk lar ji kaluh apok katơơk galơh. Nưq laa kaluh varơuq dơơp klơơr 'yêq xăk, măn xa bơơn ti koq lưp 'nhaau yôôych leh dơơp klơơr 'yêq khơl drơy.”

Yôôch atêq tuôôy hooy vlôh klơlh đnư, Lôôk Jê-xu wiit xuq kaluh dih dêh ku Ti-rơ ji Si-đôm. Ji 'yo hơq, muuyq khơl drê manih Ka-na-an, atêq tuôôy xing dêh nưq truh, heq alo ook, đaneq: “Kuh Lôôk, Koot vuua Đa-vik, biit angơuq gô rơy! Koot kadrê gô biq kamuuych nhôp pơl hwơơl paq ik.” Bơh Kadraq leh tơơl hlê mư apok leq. Atêq tuôôy truh jeq Kadraq, khơl xatyauq apôôy vôôch Kadraq, đaneq: “Thơy lơơy dăt mư nưq hooy yơu, vii mư nưq kưq taayh ratuut pi atêq haay.” Măn tuôôy tơơl apok, Kadraq đnooy: “Thơy heq be jah patăk truh, atoh leh aalq ka kaluh trưưu hyaak ku hnhư I-sơ-ra-ên.” Bơh atêq tuôôy truh, mư nưq kul pôôt kangưưr Kadraq, tơơl: “Kuh Lôôk, apôôy wơơt waak gô.” Tuôôy nưq, tuôôy tơơl hlê, Kadraq đnooy: “Xok tôôp ku koot xau yôôch qwel ka xo koot laa leh duh.” Bơh mư nưq tơơl: “Kuh Lôôk, jơq anưq, vơ laa hloay ka taleq poop xo koot yôôych jah xa aduq kaluh apek raah rôh pôôt xing para kôôch ku ni.” Tuôôy nưq, xôq tơơl hlê, Lôôk Jê-xu đnooy dii mư: “Nee dro khơl drê hơq, xuum tuôq ku mư kôt dik. Varơuq pheq jah jêêk ka mư tyauq đaji mư trôôch.” Ji koot kadrê ku mư jah payơh hlah xing wat nưq.

Atêq tuôôy chuh hooy klơlh dêh nưq, Lôôk Jê-xu hooy tyauq gah tahli Ga-li-lê, ji tuôôy tok tol muuyq ngok đoot yôôch, Kadraq 'ngôôy aduq nưq. Yôôch khơl bing manih karôp hooy tok dii Kadraq, e khơl dro tawe, dro apul, dro atul tâk, dro hôp, ji 'ngưng dro kadrơy kung dii oot. Khơl drơy xôq khơl dro nưq aduq jôôk Kadraq ji Kadraq payơh ka oot, pheq đnooy, bing manih karôp dơơp akêh tuôôy hloq dro hôôp đnooy ik, dro taqwauq tâk yôôych yơh hlah, dro tawe tawaak hooy ji dro apul 'yo hloq, yôôch oot ayuôôt laat Kơy Plêêk ku I-sơ-ra-ên.

Tuôôy nưq, atêq tuôôy taayh khơl xatyauq kadraq hlê, Lôôk Jê-xu đnooy: “Thơy biit angơuq dii manih karôp, vii oot heq kưq măn kung thơy pe hngơy yôôch đơu leh e kajoq xôq xa. Thơy leh trôôch ăm oot xuq klaak pangoot, leh kheoq oot hnoq phoch langoch tyauq trôôk.” Khơl xatyauq tơơl kung Kadraq: “Đom wăngq we yôôych xing leq vlôh 'ngưng tôôp đanưq xôq 'wot ăm bing manih karôp đa hơq xa phiq?” Lôôk Jê-xu đnooy dii oot: “Oh ay e taleq poop tôôp?” Yôôch oot tơơl: “Pơh poop tôôp, ji taleq poop ka de.” Ji atêq tuôôy patăk ka manih karôp 'ngôôy pôôt tol vari, Kadraq adrơk pơh poop tôôp kung taleq poop ka, ji atêq tuôôy kuh qwaay, Kadraq pleelh vlôh ăm ka khơl xatyauq, yôôch khơl xatyauq ahlook ka manih karôp. Manih karôp raay xa ji jah phiq phơh. Oot anguk hlê pơh vuk atar viik phon raah ku kaluh apek rah. Tuôôy nưq, sôôq dro xa laa poot ravơu khơl kanau, leh jauq khơl drê ji oh de. Tuôôy heq ăm manih karôp xuq, Kadraq muut đom ge ji hooy truh dêh Ma-ga-đan.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.