Mak 16

1Tuôôy hngơy Sa-bat heq dêq, Ma-ri Ma-đơ-len, Ma-ri miq Ja-kơ, ji Sa-lô-mê, root jarơơu thơơm xôq tuôôy truh aduq, oot hnoq ik para xaak Kadraq. 2Xing thier meel hngơy thưq nhưk đom twuân, oot hooy truh aduq xanưng tuôôy mot hngơy vơ bloq tok. 3Oot tajauq kung mamuuyq: “Kơyq hnoq vlơq kuk phơu klơlh 'mok xanưng ka haay?” 4Tuôôy 'yo tok, oot hloq đaneq kuk phơu heq jah palanh hooy, long ni thier kôt. 5Yôôch tuôôy heq muut đom xanưng, oot hloq muuyq dro tadăp hlưp aau ko đong 'ngôôy măn pi bơ, ji oot biq kadrăch varaal. 6Khơl adro nưq đnooy dii oot: “Te yôq. Êêp mư đong axek Jê-xu manih Na-xa-ret, Kơy heq biq đongq đing tol gay charăk. Kadraq heq jah khienq riirh hlê yôôch! Kadraq leh măn đnen. Dayh 'yo aduq đơu khơl kadrơy heq xôq xaak Kadraq. 7Long anưq, dayh hooy, đnooy ka khơl xatyauq Kadraq ji Phi-e-rơ đaneq: ‘Kadraq hnoq hooy adroyq oh ay truh Ga-li-lê. Măn đnư, oh ay hnoq hloq Kadraq’, dang đaji Kadraq heq đnooy dii oh ay.”

8Tuôôy heq vlôh pi gôk, oot charơơk klơlh xanưng, vii varơuq padrau padrik ji akêh klum xuum oot. Ji oot be đnooy kajoq dii kơyq bơyh vii oot thier yôq varaal. 9(Xaroq meel hngơy thưq nhưk đom twuân, tuôôy heq riirh hlê, Kadraq rama vlôh adroyq dik ka Ma-ri Ma-đơ-len, laa adro đơu Kadraq heq druyh pơh kamuuych vlôh klơlh. 10Adro khơl drê nưq hooy taboon hlê ka khơl adro hmưq măn dii Kadraq đom tuôôy oot đong hlu rơu ji nhim ook. 11Măn oot, tuôôy tameng đaneq Kadraq đong măn riirh ji heq jah kadih mư 'yo hloq, yôôych leh tuôq.

12Tuôôy nưq, atêq kaluh varơuq nưq, Kadraq rama vlôh đom long lơuq kadrơy ka vaarq dro đom sôôq oot đong tuôôy hooy jôôk hooy xuq dêh katu. 13Ji vaarq dro nưq, atêq tuôôy wiit xuq hlê, taboon ka khơl xatyauq măn hlê, bơh oot leh tuôq baarq.

14Bơh yôôch, lôôch dik, Kadraq rama vlôh ka kưl muuyq dro xatyauq đong tuôôy oot 'ngôôy gah para xa, Kadraq toah varơuq leh tuôq ji găk xuum ku oot vii oot be tuôq khơl adro heq hloq Kadraq atêq tuôôy Kadraq heq jah riirh hlê xing aduq kaxêêt. 15Kadraq đnooy patăk oot: “Tuôôy hooy truh loch dêh araak, dayh padoh taboon Hêêl Kaxay ka tôôy dro. 16Kơyq tuôq ji chiuq Bap-tem hnoq jah wơơt, măn kơyq leh tuôq hnoq biq rôp kadrôôp. 17Kaluh hlêêl akêh neq hnoq xa tyauq dii khơl adro e xuum tuôq: Taayh yal thơy, oot hnoq druyh pađuôôy kaluh kamuuych. Oot hnoq đnooy kaluh apok athêêk đơơu. 18Oot hnoq rôp volh, ji long ăm oot hôôch thưq kajoq đôk haiq, kajưk dik ni leh dơơp jiq jool kajoq truh oot. Oot hnoq xôq ti tol khơl adro jiq jiêh yôôych khơl adro nưq hnoq jah yơh.”

19Atêq tuôôy Lôôk Jê-xu heq đnooy dii oot, Kadraq jah taway tok plêêk ji 'ngôôy pi bơ Kơy Plêêk. 20Măn khơl adro nưq, atêq tuôôy vlôh hooy, oot padoh taboon loch tôôy aduq, đom tuôôy Lôôk dơơp varơuq kung dii oot ji 'yo xanưk ka đaauq bơơn kaluh dơuq akêh hooy xatyauq. Amen.)