Cua Bible Literal Text
Mak 15
Hloay dêh xaroq meel, tuôôy khơl thơy tơơk tưp kôt heq luh anguk tajauq dii khơl draq lơơk kung khơl thơy pato ganuun ji dêq hloay Tayuup karôp Jo Thaiq, yôôych atêq tuôôy vek Lôôk Jê-xu, oot jarooy Kadraq hooy ji pahnăp ka Phi-lat. Phi-lat vôôch Kadraq: “Ay laa vuua tamooy Jo Thaiq jơq be?” Bơh tuôôy tơơl apok kơy, Kadraq đnooy: “Kadih kơy đnooy đanưq.” Yôôch khơl thơy tơơk tưp kôt rôp kadrôôp Kadraq 'ngưng varơuq. Tuôôy nưq, Phi-lat laay vôôch 'yo Kadraq, đaneq: “Ay leh tơơl hlê kajoq dêq ih? Dayh 'yo, oot đong rôp kadrôôp ay 'ngưng qwaq kachưng!” Bơh Lôôk Jê-xu leh eh tơơl hlê apok leq đnoyq, pheq dơơp Phi-lat xok dơơp akêh.
Mot kadrơy, muut tuôôy lêh, kơy 'ngưng luh vlôh ka manih karôp muuyq manih karuk đơu oot apôôy vôôch. Tuôôy nưq, e muuyq dro jah taayh laa Ba-ra-ba đong biq karuk kung dii khơl adro dơơp paloanq, laa khơl adro lôp kadrôôp păk kaxêêt manih đom đơơt paloanq. Atêq tuôôy garuk truh, manih karôp xarôp apôôy dăt kơy đaji kơy 'ngưng dơơp ka oot. Tuôôy nưq, Phi-lat vôôch oot, đaneq: “Êêp trôôch gô luh vlôh Vuua tamooy Jo Thaiq ka êêp be?” Vii kơy nưq xet đaneq khơl thơy tơơk tưp kôt heq rôp nôôp kadraq vii xuum 'yarơ. Bơh khơl thơy tơơk tưp kôt ahluk ahlul manih karôp xôq xaloah muut đnư, kơy nưq duh pheq luh vlôh Ba-ra-ba ka oot. Lunư, tuôôy vôôch hlê, Phi-lat đnooy dii oot: “Nưq yôôych, gô duh dơơp kajoq dii adro đơu êêp taayh laa vuua tamooy Jo Thaiq neq?” Tuôôy nưq, manih karôp laay laa kôt: “Dayh đongq đing ni tol gay charăk.” Bơh, Phi-lat đnooy kung oot: “Vii varơuq xơk leq manih neq heq dơơp?” Lunư, khơl kadrơy kơn laa kôt iaq: “Dayh đongq đing ni tol gay charăk.” Tuôôy nưq, vii trôôch dơơp hlah xuum manih karôp, Phi-lat heq luh vlôh Ba-ra-ba ka oot ji kơy ăm jarooy Lôôk Jê-xu hooy xôq atêq tuôôy tiel dook, yôôych Kadraq biq đongq đing.
Tuôôy nưq, bing kuun ahwoa Kadraq muut đom hnhư (nưq laa hnhư padrok) ji taayh dêq bing kuun anguk hlê, yôôch oot kahliik tol Kadraq muuyq poop aau maau tôô, yôôch ayil ka Kadraq muuyq poop đoat bơơn jaliê oot heq voot, ji oot xarôp vôôch hrok Kadraq: “Laa tok Vuua manih Jo Thaiq!” Nưq yôôch, oot tiel tol akoq Kadraq bơơn gay ji khook kaxôh muut Kadraq, ji kul takuul pôôt akuh Kadraq. Tuôôy bing oot heq tache aklêêu Kadraq yôôch, oot leh ka'lăk klơlh Kadraq poop aau maau tôô ji pahlưp aau ku Kadraq muut ka Kadraq, yôôch jarooy Kadraq hooy xôq oot đongq đing Kadraq tol gay charăk. Oot rôp muuyq dro hooy tyauq trôôk nưq, anơng laa Si-môn, manih Si-ren (vaq ku A-lek-xan-đơ ji Ru-phu), xing katu tok, xôq kơy hlôôy gay charăk ku Kadraq.
Oot jarooy Kadraq truh Gô-gô-tha (muuyq aduq đơu ni e iq laa “Aduq Kadah akoq”). Oot ăm Kadraq hôôch lok jah aluq dii jarơơu jươk, bơh Kadraq leh hôôch. Yôôch oot đongq đing Kadraq ji ahlook rapa poop aau ku Kadraq bơơn kach palăk ka xăk, 'yo kơyq jah phon leq. Tuôôy nưq laa wat thưq pe, oot đongq đing Kadraq. Neq laa kapah tapaat kadrôôp lôp ku Kadraq, heq jah valơk: “Vuua Manih Jo Thaiq.” Oot kung đongq đing vaarq dro atôk kung dii Kadraq, muuyq dro măn pi bơ, măn dro hơq măn pi akeng Kadraq. (Apok Rahlăp Vah heq jah jêêk, đaneq: “Kadraq biq 'yo achung dii khơl adro lôp ganuun.”) Khơl dro hooy hlê đnooy ra ơơh Kadraq, 'ngongq 'ngengq akoq oot ji đnooy: “A ha! Adro pahrưp hnhư hơu yôôch panưk hlê đom pe hngơy, dayh kadih wơơt xăk bơơn trôôk pôôt klơlh gay charăk yơu!” Kung dang đanưq, Khơl thơy tơơk tưp kôt dii khơl thơy pato ganuun, kung rapa tache xagiel Kadraq, oot đnooy: “Ni wơơt ik 'ngưng adro kadrơy, bơh ni leh ik kadih wơơt xok ni. Lôôk Wơơt Dêh, Vuua ku I-sơ-ra-ên, tuôôy neq dayh pôôt klơlh gay charăk yơu, xôq 'wot hloq đơu tuôq.” Khơl adro biq đongq đing kung dii Kadraq kung tache xagiel Kadraq.
Truh wat thưq drơu, varơuq kamơng jaluk vlôh katuh klum loch vari dong truh wat thưq xiit. Muut wat thưq xiit, Lôôk Jê-xu taayh kôt apok: “Ê-lô-i, Ê-lô-i, la-ma sa-bach-tha-ni?” apok nưq e iq laa: “Kơy Plêêk gô lơơy, Kơy Plêêk gô lơơy, vii aleq Kadraq chuh ka'lăk gô?” Tuôôy tameng anưq, toleq dro dưk jeq đnư đnooy: “'Yo hơ, ni đong taayh Ê-li.” Nưq yôôch, muuyq kơyq nưq, atêq tuôôy charơơk hooy hnhuuk viik daak jămq muut buuy 'nhuuy, xa'măk tol gay kadeer, adro nưq ăm Kadraq hôôch, dăt: “Dayh kưq xôq kê ni, 'yo Ê-li e truh xagook ni pôôt be.” Tuôôy nưq, atêq tuôôy heq taayh tok muuyq apok kôt, Lôôk Jê-xu khơơh hoot heet lôôch dik. Ji vaayh maang đom hnhư hơu biq chieh dơơp vaarq xing ataalh pôôt 'laarq. Tuôôy nưq padrok kuun, kơy dưk măn pi tahyioh Kadraq, tuôôy heq hloq đaneq Kadraq khơơh hoot heet lôôch dik đanưq, kơy đnooy: “Dong dik dro neq laa Koot ku Kơy Plêêk.” Kung e khơl adro khơl drê dưk 'yo xing kơn xangưưy, đom sôôq oot e Ma-ri Ma-đơ-len, Ma-ri (miq Ja-kơ de ji Jô-sê) kung dii Sa-lô-mê, laa khơl adro đơu tuôôy Kadraq đong măn aduq Ga-li-lê, oot heq hooy tyauq Kadraq ji hơu varơuq Kadraq, măn 'ngưng khơl drê kadrơy đnoyq heq kung hooy tok dii Kadraq truh Jê-ru-sa-lem.
Tuôôy heq truh rayôôp klôôy yôôch, vii hngơy nưq laa Hngơy Ralauq Xôq, nưq laa hngơy adroyq hngơy Sa-bat, Jô-sep laa manih xing dêh A-ri-ma-thê, muuyq dro dơơp đangq vado đom Tayuup Karôp, kung jơq laa adro đong takôô daak dêh ku Kơy Plêêk, tuôôy heq truh aduq, kơy kalh xuum muut tavơh Phi-lat ji vôôch xaak Lôôk Jê-xu. Tuôôy nưq, Phi-lat thier akêh atoh dik laa Kadraq heq kaxêêt yôôch, ji atêq tuôôy taayh padrok xakaq kuun, kơy vôôch dro nưq 'yo thưh Kadraq heq kaxêêt dong leq. Tuôôy heq xet hlolh dong varơuq xing padrok xakaq kuun, kơy nưq atăq xaak ka Jô-sep. Atêq tuôôy root vaayh lanh, xagook Kadraq pôôt klơlh gay charăk, kơy ahnom Kadraq hlê bơơn vaayh nưq, ji xôq Kadraq muut muuyq aduq xanưng heq jah đuk đom troop phơu. Yôôch kơy palanh muuyq kuk phơu kôt klơl 'mok xanưng. Tuôôy nưq, Ma-ri Ma-đơ-len ji Ma-ri miq ku Jô-sê heq dưk 'yo aduq Kadraq jah up xôq.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.