Skip to content
BibleKenya

Cua Bible Literal Text

Lu-ka 1

Vii kơq 'ngưng adro heq raanq kông valơk achêêp phon valơk taboon truh kaluh varơuq jah payôôch katul wat haay, tyauq đaji khơl adro xing tuôôy kapa tep jêêk vlôh khơl adro xanưk ka đnư ji xapok ku đaauq Lôôk heq taboon hlê ka haay, đơu tuôôy heq xưh xadrah tôôy varơuq xing patep kach rơơt rol, gô hloq dik tolh ka gô xôq valơk hlê tyauq tong varơuq ka nhu kadraq, kuh kadraq Thê-ô-phi-lơ thier vado, xôq ka nhu kadraq hnoq e xet truh varơuq kajưk dik ku kaluh apok pato đơu nhu heq jah pato dayq.

Đom đơơy Hê-rôt, vuua dêh Ju-đê, e muuyq thơy tơơk tưp hơq anơng laa Xa-cha-ri, thuôk bing A-bi-ja. Kadrê kơy thuôk adrơơk khơl koot kadrê A-rôn, ji anơng mo laa Ê-li-sa-bet. Kaah vaarq kadrê kanau raay hyioh jăk kangưưr Kơy Plêêk, vii riirh leh aduq trek ik đom tôôy varơuq ganeen kung kaluh ganuun ku Lôôk. Oot leh e koot vii Ê-li-sa-bet biq thoon, ji hloay vaarq 'miêh heq 'ngưng tuuyh.

Varơuq heq xalih vlôh muut tuôôy ku kơy dưk dơơp phon varơuq tơơk tưp kangưưr Kơy Plêêk đom kahnoq kadih ku bing kơy, Tyauq varơuq 'miêh ku bing tơơk tưp, kơy heq hruut palăk kahlôôp muut pi 'lăp hnhư hơu ku Kơy Plêêk xôq tơơk tưp kagul. Dêq bing karôp manih tamooy măn pi gôk xadrook apôôy đom tuôôy tơơk tưp kagul. Tuôôy nưq, muuyq kơy yaak ku Lôôk rama vlôh dii kơy, dưk pi akoh para hơu vuh kagul. Xa-cha-ri biq xôôl dôôl tuôôy hloq kơy yaak, ji varơuq yôq varaal kariik klum tol kơy. Bơh kơy yaak đnooy dii kơy; “Xa-cha-ri, te yôq, vii apok xadrook apôôy ku kơy heq jah nhonq, ji kadrê kơy, Ê-li-sa-bet, hnoq pa iir ka kơy muuyq koot kanau, ji kơy hnoq vlăk anơng koot laa Jăng. Nưq hnoq laa xuum hlah hlaak, tơơl dal ka kơy, ji 'ngưng adro hnoq rayơh rayơơy gamưh varơuq pa iir vlôh ku oh de. Vii oh hnoq jah vanê vado kangưưr Kơy Plêêk, oh dong dik leh hôôch lok long tuôông kajoq dơơp ăm vuul, ji oh hnoq jah viik ngăk Lôôk Phool hiel hloay kaah xing đom klaak ku miq ni. Ni hnoq khienq 'ngưng koot xau I-sơ-ra-ên wiit xuq kung Lôôk laa Kơy Plêêk ku oot. Kadih ni hnoq hooy kangưưr Lôôk dii danưng kooy ji taay yaak ku Ê-li, xôq khienq xuum vaq wih hlê dii koot, ji adro leh tameng truh dii varơuq khôôt xet ku manih hyioh jăk — xôq palauq ralauq ka Lôôk muuyq tamooy heq jah 'meq ralauq.”

Xa-cha-ri tơơl dii kơy yaak: “Bơơn kach aleq đơu gô hnoq nhonq xok ik varơuq nưq? Vii gô heq karaq, ji kadrê gô heq 'ngưng tuuyh.” Xôq tơơl hlê, yaak plêêk đnooy dii kơy: “Gô laa Gap-ri-ên, laa adro dưk tangưưr kangưưr Kơy Plêêk, gô jah patăk truh đnooy dii kơy ji xagook hêêl kaxay neq ka kơy. Dayh 'yo ranih neq, kơy hnoq biq hôp ji leh đnooy ik dong truh hngơy kaluh varơuq hơq xalih vlôh, vii kơq kơy heq leh tuôq apok gô, laa kaluh apok hnoq jah jêêk muut klip katuôôy ku ni.” Manih karôp 'miêh đong takôô Xa-cha-ri, ji oot hloq akêh tuôôy kơy măn xiik đom hnhư hơu. Bơh tuôôy hooy vlôh, kơy leh hnoq đnooy athêêk ik dii oot, đơu oot hlolh đaneq kơy heq hloq kahnoq vlôh đom hnhư hơu, măn kơy kưq vlôh hlêêl ka oot đơu măn biq hôp. Varơuq xalih vlôh tuôôy kaluh hngơy dưk dơơp kaluh varơuq tơơk tưp ku kơy heq dêq, kơy dưk hooy xuq hnhư kơy.

Bơh atêq kaluh hngơy nưq, kadrê kơy, Ê-li-sa-bet, măn bonq, ji mo padu xăk đom dăp xiêk, đnooy đaneq: “Lôôk heq dơơp đanưq ka gô, đom kaluh hngơy đơu Kadraq 'yo xiaq gô, xôq tơơk ka'lăk varơuq kamưưl ier ku gô katul tôôy adro.”

Truh xiêk thưq drơu, kơy yaak Gap-ri-ên jah Kơy Plêêk patăk truh muuyq theng ku dêh Ga-li-lê anơng ku theng laa Na-xa-ret, tavơh muuyq khơl drê tadăp heq tavek xarooy dii muuyq dro e anơng laa Jô-sep, thuôk adrơơk Đa-vik, măn anơng ku mư tadăp laa Ma-ri. Tuôôy truh tavơh mư, kơy yaak đnooy: “Dik hlah ka mư vii jah ha ơơr vanong! Lôôk măn kung mư.” Bơh mư biq xôôl dôôl xing kaluh apok nưq ji ravơq biit 'yo apok hrok neq e iq kajoq. Yôôch kơy yaak đnooy dii mư: “Mư Ma-ri, xiin te yôq, vii mư heq jah vanong kangưưr Kơy Plêêk. 'Yo neq, mư hnoq măn bonq đom klaak mư yôôch pa iir muuyq koot kanau, ji mư hnoq vlăk anơng ku koot de laa Jê-xu. Koot kanau nưq hnoq jah yơơt vado ji hnoq jah taayh laa Koot ku Kơy Thier Yơơt, ji Lôôk laa Kơy Plêêk hnoq kahniq ka Kadraq ngôôy Đa-vik, mo kơy Kadraq. Kadraq hnoq xanok tol hnhư Ja-kôp dong truh đơơy đơơy, ji daak ku Kadraq hnoq laa miet miet.” Ma-ri đnooy dii kơy yaak: “Varơuq nưq hnoq xalih vlôh đaleq, tuôôy gô koq nhonq xet muuyq dro khơl kanau?” Xôq tơơl hlê, kơy yaak đnooy dii mư: “Lôôk Phool Hiel hnoq truh tol mư ji taay yaak ku Kơy Thier Yơơt hnoq klum katuh mư. Vii anưq, Koot Vah pa iir vlôh hnoq jah taayh laa Koot Kơy Plêêk. Dayh 'yo hơq, Ê-li-sa-bet, manih oh ay ku mư — mo kung heq măn bonq muuyq koot kanau tuôôy mo 'ngưng tuuyh, ji bonq nưq đong jah drơu xiêk đom mo, laa adro biq pơq apok thoon. Vii be apok heq xanoh leq hnoq jêêk vlôh lưp dơơp ik đôôyq dii Kơy Plêêk.” Tuôôy nưq, Ma-ri tơơl: “Gô neq, adro xapok kadrê ku Lôôk. Apôôy varơuq xalih vlôh ka gô tyauq đaji apok ku Kadraq.” Yôôch kơy yaak chuh klơlh mư.

Đom kaluh hngơy nưq, Ma-ri dưk tok dii xuum pơl wol, mư hooy tok ma gôk, truh muuyq theng thuôk Ju-đa, Yôôch mư hooy muut đom hnhư Xa-cha-ri ji vôôch hlơq Ê-li-sa-bet. Varơuq xalih vlôh tuôôy Ê-li-sa-bet tameng apok hrok ku Ma-ri, koot de đom klaak mo axe we hlah hlaak, măn Ê-li-sa-bet jah galơh galaay Lôôk Phool Hiel. Mo taayh kalh apok đơu đnooy: “Mư jah vanong hloay katul wat khơl kadrê, bonq de đom klaak mư kung jah vanong. Xing leq đơu varơuq neq truh ka gô, nưq laa miq ku Lôôk gô heq truh dii gô? Vii 'yo hơq, hloay tuôôy apok hrok ku mư truh aduq tôôr gô, adro de đom klaak gô heq axe we đom hlah hlaak. Vanong ka mư tuôq đaneq kaluh apok xing Lôôk heq jah xanoh dii mư hnoq jah jêêk.” Yôôch Ma-ri đnooy:

“Phool hiel gô ayuôôt laat Lôôk,

danưng kooy gô dêq paraat hlah hlaak aduq Kơy Plêêk laa Wơơt Lôôk ku gô.

Bơyh kơq Kadraq heq 'yo truh xăk xamơk de dik ku xapok kadrê Kadraq.

Vii 'yo hơq, kê xing juneq, tôôy adrơơk hnoq kheng gô e vanong,

bơyh Kơy Taay Yaak heq dơơp kaluh varơuq kôt ka gô,

yal Kadraq laa vah,

xuum biit angơuq ku Kadraq padoh xing adrơơk neq truh adrơơk kadrơy đôôyq dii khơl leq kuh yôq Kadraq.

Kadraq heq dưk dơơp kaluh varơuq taay yaak bơơn pla ti ku Kadraq;

Kadraq heq dơơp ka khơl adro katơơk galơh hyaak hyul tyauq kaluh iq biit aduq xuum oot.

Kadraq taluq ka'lăk khơl vuua padrok klơlh ngôôy oot,

ji tapôôk khơl xăk xamơk lêq de tok yơơt.

Kadraq khienq manih pangoot phiq viik tuôông tolh,

ji druyh adro karoh hooy xuq ti hloh.

Kadraq heq wơơt waak I-sơ-ra-ên, adro xapok Kadraq,

xôq jah dong văch hlê xuum biit angơuq,

dang đaji Kadraq heq xanoh dii khơl mo kơy 'wot — dii Ap-ra-ham ji dii adrơơk kơy truh đơơy đơơy.”

Ma-ri măn dii mo đom pe xiêk, yôôch mư wiit xuq hnhư mư.

Katuôôy hngơy ku Ê-li-sa-bet xôq mo pheq pa iir koot heq truh, ji mo heq pa iir vlôh muuyq koot kanau. Kaluh palơy pla ji oh ay ku mo tameng đaneq Lôôk heq kahnoq vanong xuum angơuq ku Kadraq kach kôt galơh ka mo, yôôych oot kung hlah hlaak dii mo.

Varơuq xalih vlôh đom hngơy thưq thơơm, oot truh xôq goch kađuh ka oh de, ji oot xung taayh oh tyauq anơng vaq ku oh, laa Xa-cha-ri. Tơơl hlê varơuq nưq, miq oh đnooy: “Leh aalq, bơh oh de hnoq jah taayh laa Jăng.” Oot đnooy dii mo đaneq: “Leh e kơyq đom wat oh ay ku mo đơu jah vlăk anơng đanưq.” Oot vlôh hlêêl ka vaq oh, 'yo thưh kơy xung vlăk anơng ka oh laa kajoq. Atêq tuôôy dăt xok muuyq tômq tapaat, kơy valơk đaneq: “Anơng oh de laa Jăng.” Dêq hloay raay thier tưng hưng. Hloay lunưq, huuy ji kapiet kơy luh vlôh, yôôch kơy đnooy tok apok ayuôôt laat Kơy Plêêk. Varơuq varaal hwaal truh tol dêq hloay khơl adro măn gah gih oot, ji dêq hloay kaluh varơuq nưq jah taboon vlôh đom loch dêh đoot gôk ku Ju-đê. Tôôy manih tameng tek yôôych xôq muut xuum oot, kadih vôôch: “Kơn têq, oh de neq hnoq jêêk vlôh đaleq?” Vii dik ti Lôôk măn dii oh.

Xa-cha-ri, vaq oh de, jah galơh galaay Lôôk Phool Hiel, ji đnooy apok hlit, đaneq:

“Đangq ayuôôt laat Lôôk laa Kơy Plêêk ku I-sơ-ra-ên,

vii Kadraq heq hlơq hlôôp ji dưk dơơp varơuq wơơt xok ka koot tamooy Kadraq.

Kadraq heq tơơk tok ka 'wot muuyq akê wơơt xok

đom hnhư Đa-vik, xapok Kadraq

(đaji Kadraq heq xanoh xing tuôôy hnu xing huuy khơl hlit vah ku Kadraq),

laa varơuq wơơt xok klơlh khơl tachơơl ku 'wot,

ji klơlh ti ku tôôy adro 'yarơ 'wot;

xôq kahnoq xuum biit angơuq đôôyq dii mo kơy 'wot,

ji xôq jah ajơ văch hlê tavek vah ku Kadraq,

'ngưq laa apok tavek đơu Kadraq heq paleek kung Ap-ra-ham, mo kơy 'wot, xôq kahniq ka 'wot

tuôôy heq jah wơơt xok vlôh klơlh ti khơl tachơơl 'wot,

xôq ka hơu varơuq Kadraq kach leh yôq varaal,

đom varơuq hlăng vah ji hyioh jăk kangưưr Kadraq, dêq kaluh hngơy ku 'wot.

Măn koot, koot de lơơy, koot hnoq jah taayh laa adro hlit ku Kơy Thier Yơơt,

vii koot hnoq hooy kangưưr Lôôk xôq deep trôôk ku Kadraq,

xôq xagook varơuq nhonq xet vanong wơơt xok ka tamooy Kadraq

đom varơuq tha ka'lăk kaluh kadrôôp maroh ku oot,

gamưh xuum biit angơuq galơh galaay ku Kơy Plêêk haay,

bơyh nưq, mot hngơy vlok xing tol taalh hnoq hlơq hlôôp haay,

xôq xaraar ahnhe khơl leq đong 'ngôôy đom kamơng jaluk ji đom long lơuq ku varơuq kaxêêt,

xôq atăq jarooy pla jôôk haay muut trôôk hrok hrol.”

Koot de kôt tok ji jah kajưk kalh đom danưng kooy, oh măn đom wăngq we dong truh hngơy kadih anưq kahnoq vlôh ku ni kangưưr tamooy I-sơ-ra-ên.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.