Lu-ka 24

1Nưq yôôch, xaroq meel rahưng tađnah ku hngơy adroyq twuân, oot hooy truh xanưng, xagook tyauq kahlơu jarơơu đơu oot heq palauq ralauq. 2Bơh oot tamaak hloq kuk phơu heq jah palanh klơlh xanưng, 3lunư, tuôôy muut pi'lăp, oot leh hloq xaak Lôôk Jê-xu. 4Varơuq xalih vlôh đom tuôôy oot đong xôôl dôôl truh varơuq neq yôôych, 'yo hơq, vaarq adro khơl kanau hlưp aau tađnah xaraar dưk gah oot. 5Tuôôy oot varaal hwaal ji kuu mot pôôt vari yôôych vaarq dro nưq đnooy dii oot: “Aleq khơl mư axek manih riirh đom katul adro kaxêêt? 6Kadraq leh măn đnen, bơh Kadraq riirh hlê yôôch! Dayh văch hlê Kadraq heq đnooy đaleq dii khơl oh ay tuôôy đong măn aduq Ga-li-lê, 7dăt đaneq Koot Manih pheq biq atăq muut ti khơl adro kadrôôp maroh ji pheq biq đongq đing tol gay charăk, yôôch truh hngơy thưq pe, pheq riirh hlê.” 8Oot văch hlê apok Kadraq, 9ji tuôôy xing xanưng wiit xuq, oot taboon hlê tôôy varơuq ka kưl muuyq dro jah rơơlh kung dêq hloay khơl adro kadrơy. 10Khơl adro kadrê nưq e Ma-ri Ma-đơ-len, Jan-nơ, Ma-ri miq Ja-kơ, ji khơl adro kadrê kadrơy kung dii oot, taboon hlê ka khơl jah rơơlh kaluh varơuq nưq. 11Kaluh apok taboon nưq tameng e veeh leh dik đôôyq dii khơl jah rơơlh, lunưq oot leh tuôq taleq dro mư neq. 12Lunư, Phi-e-rơ dưk tok charơơk truh xanưng, ji tuôôy kuu pôôt 'yo muut pi'lăp, kơy vơ hloq vaayh ahnom. Nưq laa kơy hooy xuq hnhư, kadih vôôch varơuq kajoq heq xalih vlôh.

13Hơq, đom kadih hngơy nưq, vaarq adro đom sôôq khơl xatyauq đong hooy truh muuyq palơy pla xangưưy anơng laa Em-ma-ut, kawah Jê-ru-sa-lem drơu kưl êch-ta-đơ, 14ji oot đong athêêk tajauq dii mamuuyq truh tôôy varơuq heq xalih vlôh. 15Varơuq xalih vlôh đom tuôôy oot athêêk ji tagêh, yôôych kadih Lôôk Jê-xu truh jeq hooy achung dii oot. 16Bơh mot oot biq kariik kađoq xôq leh nhonq vlôh Kadraq. 17Tuôôy nưq, Kadraq đnooy dii oot: “Taleq varơuq nưq laa kajoq đơu vaarq ay athêêk tajauq dii mamuuyq đong tuôôy hooy trôôk nưq?” Oot dưk tangưưr vlôh nưq, hlu tarôôy dik. 18Yôôch tuôôy tơơl apok, muuyq adro anơng laa Kơ-lê-ô-ba đnooy dii Kadraq: “E jơq vơ muuyq adro kơy laa khach hlơq Jê-ru-sa-lem leh xet kaluh varơuq heq xalih vlôh aduq nưq taleq hngơy neq?” 19Kadraq vôôch baarq: “Varơuq kajoq nưq?” Yôôch baarq đnooy dii Kadraq: “Varơuq apiq truh Jê-xu manih Na-xa-ret, đơu nưq laa muuyq dro, muuyq kơy hlit galaay taay yaak đom varơuq dơơp hloay apok đnooy kangưưr Kơy Plêêk kung dêq manih karôp, 20ji đaleq đơu khơl thơy tơơk tưp kôt kung khơl padrok xanok ku haay heq atăq Kadraq xôq chiuq păk kaxêêt, ji heq đongq đing Kadraq tol gay charăk. 21Măn 'wot 'miêh takôô gamưh đaneq Kadraq nưq laa Kơy truh xôq wơơt xok I-sơ-ra-ên. Wih hlê, leh vơ kung dii dêq hloay kaluh varơuq ataalh, varơuq nưq dalơh hlê truh hngơy neng laa hngơy thưq pe, jauq xing tuôôy kalu varơuq hơq xalih vlôh. 22Bơh, taleq khơl kadrê đom katul 'wot dik khienq 'wot pheq tưng hưng, atêq tuôôy oot măn aduq xanưng tuôôy xaroq meel 23ji tuôôy be axek hloq xaak Kadraq, oot xuq, taboon hlê laa heq hloq varơuq rama truh khơl kơy yaak đnooy Kadraq đong riirh. 24Taleq dro đom 'wot hooy vlôh xanưng ji oot heq hloq dang anưq, troq đaji taleq dro khơl kadrê heq đnooy, bơh oot leh hloq Kadraq.” 25Yôôch Kadraq đnooy dii baarq: “Ôôy, khơl adro vlô apoop ji khơl adro xiik hlolh đom xuum xôq tuôq aduq tôôy varơuq đơu khơl kơy hlit heq đnooy! 26Be aalq Lôôk Wơơt Dêh duh chiuq kaluh varơuq nưq, xôq muut đom tađnah tađnaak ku Kadraq ih?” 27Yôôch xarôp xing Môi-se ji xing dêq hloay khơl kơy hlit, Kadraq padoh hlolh ka oot kaluh varơuq tapa truh Kadraq đom dêq Rahlăp Vah. 28Oot hooy jeq truh palơy aduq oot đinq truh, yôôych Kadraq dơơp đaji đinq hooy xangưưy iaq. 29Nưq laa oot băt eep Kadraq, đaneq: “Xiin măn hlê dii 'wot, vii plêêk heq jeq klôôy ji hngơy heq dêq yôôch.” Kadraq hooy muut xôq măn hlê dii oot. 30Varơuq xalih vlôh tuôôy Kadraq heq 'ngôôy muut para kung dii oot, adrơk tôôp tok, Kadraq kuh kway, ji atêq tuôôy pleh vlôh, Kadraq palo ka oot. 31Tuôôy nưq, mot oot jah luh vlôh ji oot nhonq vlôh Kadraq, yôôch Kadraq heq hooy hlơơp klơlh oot. 32Oot đnooy dii mamuuyq: “Be aalq laa xuum haay tôq tơh tuôôy Kadraq athêêk tajauq dii haay tol trôôk hooy, kung đaji tuôôy Kadraq padoh hlolh Rahlăp Vah ka haay ih?” 33Nưq laa tuôôy dưk tok kung muut kadih wat nưq, oot wiit xuq truh Jê-ru-sa-lem. Ji oot axek tavơh kưl muuyq dro jah rơơlh đong tagumq hlê, kung khơl adro e mot dii oot, 34tauq đaneq: “Lôôk heq riirh hlê dik yôôch, ji Kadraq heq jah Si-môn 'yo hloq.” 35Yôôch oot taboon hlê tôôy varơuq tol trôôk hooy, ji đaleq Kadraq heq kahnoq ka oot xet đom tuôôy pleh tôôp.

36Tuôôy nưq, tuôôy oot đong đnooy kaluh varơuq nưq, kadih Kadraq dưk măn katul oot, ji đnooy dii oot: “Hrok hrol ka oh ay.” 37Bơh vii thier yôq ji varaal hwaal, oot biit laa đong hloq yaak plêêk. 38Kadraq dăt oot: “Aleq oh ay xôôl dôôl ji vii kơq kajoq đơu varơuq biit ravơq tơơk tok đom xuum oh ay? 39Dayh 'yo ti ku thơy ji jôôk ku thơy, đaneq kadih laa thơy neq. Dayh avêq muut thơy ji 'yo. Vii yaak leh e hlek ji khiêk, đaji oh ay nhonq hloq thơy đong e.” 40Đnooy payôôch apok nưq, Kadraq ăm oot 'yo ti ji jôôk kadraq. 41Đom tuôôy oot măn e koq hôôk tuôq ji dơơp akêh vii thier hlah hlaak, Kadraq vôôch oot: “Măn đnen, oh ay e kajoq xa ik be?” 42Tuôôy nưq, oot ăm ka Kadraq muuyq apek kaa vuh; 43Atêq tuôôy adrơk xok, Kadraq xa kangưưr oot.

44Yôôch Kadraq đnooy dii oot: “Neq laa kaluh apok ku thơy đơu thơy heq đnooy dii oh ay tuôôy e măn dii oh ay, đaneq tôôy varơuq heq valơk truh thơy đom ganuun Môi-se, kaluh rahlăp kơy hlit ji kaluh Thi Thiên raay pheq jah jêêk yuôôr.” 45Tuôôy nưq, Kadraq luh akoq ngook oot xôq hlolh Rahlăp Vah, ji Kadraq dăt oot: 46đaneq: “Đaji e apok valơk: Lôôk Wơơt Dêh pheq chiuq jiq jiêh, ji xing aduq kaxêêt riirh hlê muut hngơy thưq pe, 47yôôch varơuq wiit xuum xôq jah tha kadrôôp pheq jah padoh taboon taayh yal Kadraq ăm dêq hloay kaluh tamooy, xarôp xing Jê-ru-sa-lem. 48Oh ay laa khơl xanưk truh kaluh varơuq nưq. 49Thơy jeq atăq varơuq heq tavek ku Vaq thơy truh tol oh ay. Bơh oh ay dayh măn đom theng dong truh tuôôy oh ay jah hlưp xok taay yaak xing ataalh.”

50Yôôch Kadraq jarooy oot vlôh pi gôk dong truh jeq Bê-tha-ni, ji tuôôy tơơk ti kadraq tok, Kadraq kahniq vanong ka oot. 51Varơuq xalih vlôh đom tuôôy Kadraq kahniq vanong ka oot, Kadraq chuh klơlh oot ji jah xagook tok plêêk. 52Atêq tuôôy kuh kul Kadraq, oot wiit xuq aduq Jê-ru-sa-lem dii xuum hlah hlaak paq ik, 53ji dêq hloay oot kưq măn đom hnhư hơu, ayuôôt laat Kơy Plêêk.