Skip to content
BibleKenya

Cua Bible Literal Text

Lu-ka 23

Hloay bing khơl oot dưk tok, xagook Kadraq truh Phi-lat. Oot pa xarôp đnooy tauq kadraq, đaneq: “'Wot hloq kadra neq dơơp pa mê tamooy 'wot, klơl kơmq nôôp xơu ka Sê-sa, ji kadih xưng xăk laa Lôôk Wơơt Dêh, 'ngưq laa vuua.” Tuôôy nưq, Phi-lat vôôch Kadraq, đaneq: “E jơq ay laa vuua tamooy Jo Thaiq be?” Bơh tuôôy tơơl apok kơy nưq, Kadraq đnooy: “Kadih kơy đnooy anưq.” Atêq nưq, Phi-lat đnooy dii khơl thơy tơơk tưp kôt ji bing karôp: “Gô leh axek hloq kadrôôp xơk kajoq dêq aduq adro khơl kanau neq.” Bơh oot kưq kăng ngăk đnooy đaneq: “Ni ahluk ahlul manih karôp, pato dayq loch hloay dêh Ju-đê, xarôp xing Ga-li-lê dong truh ka aduq neq.” Tuôôy Phi-lat tameng đanưq, kơy vôôch Kadraq jơq be laa tamooy Ga-li-lê. Tuôôy xet ik đaneq Kadraq măn 'laarq qwuyen ku Hê-rôt, kơy nưq atăq Kadraq hlê ka Hê-rôt, kadih vuua kung đong măn aduq Jê-ru-sa-lem đom kaluh hngơy nưq.

Tuôôy Hê-rôt hloq Lôôk Jê-xu, kơy nưq mưng dik jo kơy 'miêh heq xung tavơh Kadraq xing xiit dik yôôch, vii heq tek taboon truh Kadraq, đơu kơy nưq takôô 'yo hloq pheep akêh leq nưq jah kahnoq vlôh bơyh Kadraq. Nưq laa, kơy nưq vôôch Kadraq đom 'ngưng apok, bơh Kadraq leh tơơl hlê kơy kajoq dêq. Măn khơl thơy tơơk tưp kôt ji thơy pato ganuun dưk đnư dik deh tauq kadrôôp Kadraq. Yôôch kaah Hê-rôt hloay kuun ku kơy nưq đnooy toah Kadraq, ji atêq tuôôy xagiel aklêêu Kadraq, pahlưp aau xadroh ah ka Kadraq, kơy nưq atăq bla Kadraq hlê ka Phi-lat. Tuôôy nưq, kaah Hê-rôt ji Phi-lat heq jêêk vlôh khơl 'wơyq dii mamuuyq đom hngơy nưq, vii adroyq nưq đong măn e thơơl 'yarơ geet đom katul vaarq adro oot.

Atêq nưq, atêq tuôôy Phi-lat ăm taayh tagumq hlê khơl thơy tơơk tưp kôt, khơl padrok xakaq ji manih karôp, kơy đnooy dii oot: “Khơl kơy jarooy truh ka gô adro khơl kanau neq đaji adro pamê manih karôp, ji 'yo neq, atêq tuôôy vôôch dook ay nưq kangưưr khơl kơy, gô leh axek hloq đom adro neq kadrôôp xơk kajoq đơu khơl kơy đong tauq kadrôôp tachơơl hlê ay neq. Bơh leh vơ e anưq, Hê-rôt kung leh hloq kajoq, vii vuua heq pahnăp ay nưq hlê ka 'wot, ji 'yo yơu, be varơuq kajoq heq jah dưk dơơp bơyh ay nưq laa đangq kaxêêt. Vii anưq, atêq tuôôy dook ay neq, gô hnoq luh vlôh.” [Panưh kadrơy, muut tôôy đơơt lêh, kơy e varơuq duh dăt pheq luh vlôh muuyq adro tu ka oot.] Bơh oot raay pariau kôt, đaneq: “Dayh kađnok adro nưq tok, ji luh vlôh Ba-ra-ba ka 'wot!” (Adro neq 'miêh biq karuk muut tu vii muuyq đơơt aluk alaak nưq xalih vlôh đom theng phôq ji vii kadrôôp păk kaxêêt manih.) Tuôôy nưq, Phi-lat đnooy panhăk oot yưk tra, vii xung tha Lôôk Jê-xu. Bơh oot taayh tok đaneq: “Dayh đongq đing! Đongq đing ni tol gay charăk!” Yôôch kơy nưq đnooy dii oot yưk thưq pe: “Vii varơuq xơk leq đơu adro neq heq dơơp? Gô be axek hloq kadrôôp xơk kajoq đangq kaxêêt aduq ay nưq. Lunưq, tuôôy dook payôôch, gô hnoq luh vlôh ay nưq.” Bơh oot kưq kôt apok kăng ngăk đooy Kadraq pheq biq đongq đing, ji apok đnooy ku oot heq jay iaq. Phi-lat heq đnooy vlôh xưh xadrah xôq đooy vôôch ku oot jah dưk dơơp. Tuôôy nưq, kơy nưq luh vlôh adro biq karuk đom tu vii kadrôôp paloanq ji păk kaxêêt manih, laa adro đơu oot heq vôôch, bơh kơy nưq pahnăp vlôh Lôôk Jê-xu tyauq iq oot.

Đom tuôôy khơl drơy jarooy Kadraq hooy, vii heq rôp eep Si-môn, muuyq adro Si-ren nưq, truh xing dêh katu, đơu oot xôq gay charăk tol adro nưq xôq hlôôy tyauq atêq Lôôk Jê-xu.

Muuyq bing tamooy thier karôp hooy tyauq Kadraq, ji khơl adro kadrê alo nhim ka Kadraq. Bơh tuôôy wih hlê oot, Lôôk Jê-xu đnooy: “Koot kadrê Jê-ru-sa-lem lơơy, te nhim vii gô, wih hlê, dayh nhim vii kadih xăk ji vii koot xau khơl mư. Vii 'yo hơq, kaluh hngơy jeq truh, đơu đom kaluh hngơy nưq, khơl drơy hnoq đnooy: ‘Vanong ka khơl kadrê thoon, ji klaak leh pa iir, kung tôôh leh ăm uq.’ Tuôôy nưq, khơl drơy hnoq xarôp đnooy dii kaluh ngok đoot, ‘Dayh klêh pôôt 'wot,’ ji dii kaluh ngok gôk, ‘Dayh kariik galôp 'wot.’ Vii atoh khơl drơy xưh đanưq aduq ưk măn adriilh, yôôych varơuq kajoq xalih vlôh aduq ưk kateh?”

Tuôôy nưq, vaarq adro kadrôôp lôp kadrơy kung biq rôp jarooy xôq chiuq păk kaxêêt achung dii Kadraq.

Tuôôy oot hooy truh muuyq aduq jah taayh laa “Kadah Akoq,” yôôych oot đongq đing Kadraq kađnư, kung dii taleq adro kadrôôp lôp — muuyq adro pi bơ măn muuyq adro pi akeng. Yôôch oot bôk palăk ahlook mamuuyq apoop aau ku Kadraq. Manih karôp dưk đnư tamaak 'yo, măn khơl padrok xakaq kung xagiel aklêêu Kadraq, đaneq: “Ni heq wơơt khơl drơy, dayh kadih wơơt xăk yơu, atoh đaji ni laa Lôôk Wơơt Dêh ku Kơy Plêêk, Kơy jah Kadraq rơơlh.” Bing kuun kung tache aklêêu Kadraq, hlê jeq tơơk tưp jôômq ka Kadraq, yôôch dăt: “Atoh may laa Vuua tamooy Jo Thaiq yôôych dayh kadih wơơt xăk yơu.” Măn pi taalh Kadraq kung e muuyq riak chư: “Neq laa Vuua tamooy Jo Thaiq.”

Muuyq đom vaarq anơng kadrôôp lôp đong biq kađnok đnooy ra ơơh Kadraq, đaneq: “Kơy leh aalq laa Lôôk Wơơt Dêh ih? Dayh wơơt xăk xamơk ji 'wot rơy hơu.” Bơh tuôôy tơơl apok, anơng kadrôôp lôp hơq trek ni, ay nưq đnooy: “May măn leh xet yôq Kơy Plêêk tuôôy may đong chiuq kung muuyq xưh xadrah ih? Long haay đaneq laa jơq, vii haay đong nhonq hlê varơuq taxưngq dii varơuq haay heq dơơp, bơh adro neq leh dơơp bơyq varơuq kajoq dêq.” Ji ay nưq tơơl: “Thơy Jê-xu, tuôôy thơy muut đom daak dêh thơy, xiin văch truh gô.” Kadraq dăt ay: “Dong dik, gô đnooy dii ay, hngơy neng ay hnoq jah măn dii gô đom Ba-ra-đi.”

Tuôôy nưq laa muut kaplah wat thưq drơu yôôch, đơu kamơng jaluk aklum truh kahlôôp katuh loch dêh dong truh wat thưq xiit. Mot hngơy kamơng langưm hlê. Măn tômq vaayh đom hnhư hơu biq chieh dơơp đôôy. Atêq tuôôy taayh kôt apok, Lôôk Jê-xu đnooy: “Kuh Vaq, Koot pahnăp atăq phool hiel Koot đom ti Vaq.” Atêq nưq, tuôôy đnooy payôôch apok neq, Kadraq truut hơơy hook heet lôôch dik. Tuôôy nưq, atêq tuôôy adro padrok kuun dưk 'yo varơuq heq xalih vlôh, kơy ayuôôt laat Kơy Plêêk, đaneq: “Manih neq kajưk dik laa hyioh jăk.” Tuôôy dêq bing karôp tagumq anguk vii varơuq păk kaxêêt neq dưk 'yo kaluh kajoq heq xalih vlôh, yôôych oot tuk tada wiit xuq. Măn dêq hloay khơl adro qween xet Kadraq kung dii khơl adro kadrê hooy tyauq Kadraq xing Ga-li-lê, oot 'miêh heq dưk măn kơn xangưưy tamaak 'yo kaluh varơuq nưq.

Hơq, muuyq dro anơng Jô-sep, laa adro waak hnhư xadrah, laa adro tamaq xuum ji hyioh jăk, (kơy 'miêh heq be ưng anưq dii khơl xadrah ji varơuq dơơp ku oot) kơy pa iir vlôh xing A-ri-ma-thê, muuyq theng ku manih Jo Thaiq, laa manih đong takôô daak dêh ku Kơy Plêêk. Tuôôy truh tavơh Phi-lat, kadih kơy heq xiin xaak Lôôk Jê-xu. Ji atêq tuôôy tơq xaak Kadraq pôôt, kơy ahnom guôônq xaak bơơn vaayh lanh, ji up ni đom muuyq phon xanưng jah đuk đom phơu, aduq koq e paq kê kơyq hmưq up xôq. Hngơy nưq laa hngơy Ralauq Palauq, ji hngơy Sa-bat jeq truh. Tuôôy nưq, khơl oh ay kadrê, laa khơl adro 'miêh heq kung hooy dii Kadraq xing Ga-li-lê, tuôôy hooy tyauq pi atêq, oot 'yo hloq apoop xanưng ji padoh xaak Kadraq jah up. Yôôch tuôôy heq wiit xuq, oot ralauq palauq kahlơu jarơơu ji jơu thơơm.

Truh hngơy Sa-bat, oot padơy pado tyauq ganuun đinq.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.