Cua Bible Literal Text
Lu-ka 14
Varơuq nưq xalih vlôh tuôôy Kadraq hooy muut hnhư muuyq dro dưk xanok ku adrơơk Pha-ri-si đom muuyq hngơy Sa-bat xôq xa waal, ji oot đong tamaak 'yo tyauq tavooy Kadraq. Ji hơq, muuyq adro nưq biq jiq bingq pangơlh golh măn hloay kangưưr Kadraq. Tuôôy luh apok, Lôôk Jê-xu đnooy dii khơl thơy ganuun ji manih Pha-ri-si, đaneq: “E ik pheep payơh bingq đom hngơy Sa-bat long be?” Bơh oot hnhep. Yôôch tuôôy rôôk xok adro bingq, Kadraq payơh adro nưq, ji ăm vlôh xuq. Kadraq đnooy dii oot: “kơyq đom khơl kơy e adro koot kanau, long muuyq ôô bo, biq klêh pôôt jiêng đom hngơy Sa-bat đơu leh hloay jơnưq duuy ni tok?” Oot leh hnoq tơơl hlê ik adroyq kaluh apok neq.
Yôôch Kadraq taboon ka khơl adro jah mơơy muuyq kadook atoh, vii nhonq hloq đaleq oot heq rơơlh kaluh aduq 'ngôôy kôt yơơt, lunưq đnooy dii oot đaneq: “Tuôôy khơl kơy jah kơyq nưq mơơy truh jưq waal pajêêk, te 'ngôôy muut para xa măn aduq tơơl nhưk, leh kheoq hnoq ik e muuyq adro kôt galơh iaq khơl kơy heq jah adro nưq mơơy, tuôôy manih heq mơơy oh ay hloay adro khach hơq hooy truh, đnooy dii khơl kơy: ‘Xiin nhương aduq ka kơy neq,’ yôôych khơl kơy hloay laa pheq nhonq xok aduq lôôch dii varơuq kamưưl. Wih hlê, tuôôy khơl kơy jah mơơy, dayh hooy, 'ngôôy muut para xa măn aduq lôôch, xôq tuôôy adro heq mơơy khơl kơy truh, oot hnoq đnooy dii khơl kơy: ‘'Wơyq lơơy, xiin mơơy tok aduq yơơt iaq.’ Tuôôy nưq, hnoq e varơuq vado deng ka khơl kơy kangưưr tôôy adro 'ngôôy kung para dii khơl kơy. Vii kơyq vanê xăk tok hnoq biq haaq pôôt, ji kơyq haaq xăk apôôt hnoq jah vanê tok.”
Atêq nưq, Kadraq kung đnooy dii adro heq mơơy Kadraq: “Tuôôy kơy adoot waal hngơy dưk long waal klôôy, te mơơy khơl 'wơyq kơy, long oh ay kơy, long oh ay takuul takiel kơy, kung te mơơy khơl manih palơy pla karoh e, leh kheoq, oot kung hnoq ik mơơy hlê kơy, ji varơuq bla lêh xalih truh ka kơy. Wih hlê, tuôôy kơy luh kawaal, dayh mơơy khơl manih adrah hrah, atul tâk, qwe tawek, apul phil, yôôych kơy hnoq jah vanong, vii oot leh e xôq bla hlê kơy. Bơyh phon bla hlê hnoq jah deng ka kơy đom varơuq riirh hlê ku manih hyioh jăk.”
Tuôôy muuyq đom khơl adro đong 'ngôôy para xa tameng kaluh apok neq, kơy nưq đnooy dii Kadraq: “Vanong hloay laa adro hnoq jah xa tôôp đom daak dêh Kơy Plêêk!” Bơh Kadraq đnooy dii kơy: “E adro hơq adoot waal kôt ji mơơy 'ngưng khach. Truh wat waal, kơy patăk xapok kơy hooy xôq tauq ka khơl adro khach heq jah mơơy: ‘Xiin dayh truh vii waal xa juneq đong ralauq 'miêh.’ Ji dêq hloay oot laay tong adro muuyq đnooy tawaq. Adro adroyq dik đnooy dii kơy: ‘Gô heq root muuyq aloq ruôngq, ji gô e varơuq duh hooy 'yo ni. Xiin kơy ăm gô jah chôôyq ka'lăk.’ Adro kadrơy đnooy: ‘Gô heq root dăp đôôy ôô bo, ji jeq hooy thư paraat ni. Xiin kơy ăm gô jah chôôyq ka'lăk.’ Adro kadrơy đnoyq đnooy: ‘Gô heq xok kadrê, ji vii anưq gô leh hnoq hooy ik.’ Adro xapok xuq, taboon hlê kaluh varơuq nưq ka kôôch ni. Tuôôy nưq, atêq tuôôy tôq jaraq, adro kôôch hnhư heq đnooy dii xapok kơy: ‘Dayh dayh hooy vlôh kaluh trôôk kôt ji xalah de đom theng đơu jarooy xuq đnen khơl manih adrah hrah, atul tâk, apul phil ji qwe tawek.’ Xapok đnooy: ‘Kơy kôôch lơơy, 'wot heq dơơp varơuq kơy dăt, bơh măn e aduq hong.’ Kôôch đnooy dii xapok: ‘Dayh hooy vlôh tyauq kaluh trôôk kôt ji kaluh paga, yôôch hnen adro nưq muut, aleq dong viit hnhư ku gô. Vii gô đnooy dii ay đaneq leh kơyq đom bing manih jah mơơy hơq hnoq jah jưq waal ku gô.’”
Tuôôy nưq, kaluh bing manih karôp thier 'ngưng đong hooy tyauq Kadraq, ji tuôôy wih xăk hlê, Kadraq đnooy dii oot: “Atoh kơyq truh kung gô đơu leh 'yarơ vaq miq, kadrê koot, oh ay kanau, ay oh kadrê ni, ji hloay varơuq riirh ku ni đnoyq, yôôych adro nưq leh hnoq laa khơl xatyauq ku gô. Atoh kơyq leh hlôôy gay charăk ni ji tyauq atêq gô, yôôych adro nưq leh hnoq laa khơl xatyauq ku gô. Vii manih leq đom oh ay xung xơy muuyq poop thaap, đơu adroyq dik leh 'ngôôy pôôt jauq 'yo tayuh jêêt — ni e đu xôq dơơp payôôch long be? Xôq leh kheoq, atêq tuôôy ay nưq heq xơy xool đơu leh hnoq dơơp payôôch, dêq hloay khơl adro leq 'yo hloq dik laa tok apok xagiel ra ơơh ay nưq, đnooy đaneq: ‘Adro neq xarôp dơơp xơy atok đơu be hnoq dơơp payôôch.’ Long viq vuua leq, tuôôy jeq hooy vlôh hmơt jăk dii vuua kadrơy tol aduq hmơt jăk, leh hnoq 'ngôôy pôôt, adroyq dêq jauq 'yo đaneq atoh vuua e kưl ravơu kuun, yôôych hnoq ik tahmơt dii bing kuun đong truh tachơơl hlê kung vuua dii vaarq kưl ravơu kuun be? Atoh laa leh ik, yôôych đom tuôôy vuua hơq măn aduq xangưưy, vuua neq patăk khơl jah patăk hooy apôôy tagu. Lunưq, dang đanưq, kơyq đom oh ay đơu leh ka'lăk tôôy thưq ni e yôôych leh hnoq laa khơl xatyauq ku gô. Voh yôôych tolh, bơh atoh voh kung biq hlơp hloay viq phaak, yôôych ni hnoq ik panhưưm ăm phaak dii thưq kajoq? Ni be e ich ka vari kung leh xôq dơơp phon. Manih nưq kưq avih ka'lăk ni vlôh pi gôk. Kơyq e tôôr xôq tameng, dayh tameng.”
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.