Skip to content
BibleKenya

Cua Bible Literal Text

Lu-ka 15

Tuôôy nưq, dêq hloay khơl adro xok xơu ji adro kadrôôp maroh raay truh dii Kadraq xôq tameng Kadraq. Ji yôôch, dêq manih Pha-ri-si hloay khơl thơy pato ganuun raay ramôôy, đnooy đaneq: “Manih neq jeq khơl adro kadrôôp maroh, ji xa achung dii oot.”

Nưq laa Kadraq taboon kadook atoh neq ka oot, đaneq: “Adro leq đom khơl kơy e muuyq hreek ôô trưưu, ji tuôôy biq hyaak hlơơp muuyq poop đom sôôq nưq, yôôych leh xôq hlê xiit kưl xiit poop hơq aduq manay rap ji hooy axek ôô trưưu hyaak dong truh tuôôy axek hloq ni? Tuôôy heq axek jah yôôch, adro nưq hlah hlaak hlôôy ni tok vara kơy. Xuq truh hnhư, kơy nưq taayh khơl 'wơyq ji palơy pla kơy anguk hlê, đnooy dii oot: ‘Dayh hlah hlaak dii gô, vii gô heq axek hloq ôô trưưu biq hlơơp ku gô.’ Gô đnooy dii khơl kơy đaneq kung muuyq đanưq, hnoq e varơuq hlah hlaak tol plêêk truh muuyq adro kadrôôp wiit xuum, iaq laa truh xiit kưl xiit adro hyioh jăk đơu leh e varơuq duh wiit xuum.

Long adro kadrê leq e kưl đông baak, atoh đaji mư dơơp hlơp muuyq kapah, yôôych leh ataak đeen, rahiing hnhư ji dêq paraat akhiim axek dong truh tuôôy axek jah ih? Tuôôy heq axek jah, mư mơơy khơl 'wơyq ji palơy pla tagumq hlê, đnooy đaneq: ‘Dayh hlah hlaak dii gô, vii gô heq axek hloq đông baak đơu gô dơơp hlơơp.’ Kung muuyq đanưq, gô đnooy dii khơl kơy, e varơuq hlah hlaak măn kangưưr khơl kơy yaak ku Kơy Plêêk truh muuyq adro kadrôôp wiit xuum.”

Atêq nưq, Kadraq taboon: “Muuyq adro hơq e vaarq koot kanau, adro oh đnooy dii vaq, ‘Vaq lơơy, xiin ăm koot phon garuh anôôp thuôk ku koot.’ Ji kơy ahlook garuh anôôp kơy ka baarq. Atêq nưq, leh jah taleq hngơy, tuôôy heq anguk agoop tôôy thưq, adro koot lưyq dưk tok hooy dêh xangưưy, măn đnư ay nưq tayuh dêq garuh anôôp ni tuôôy riirh kach agưt agooh. Tuôôy ni heq tayuh xarêh tôôy thưq, yôôych muuyq đơơt pangoot hrah kôt dik xalih vlôh loch dêh nưq, ji ni pa xarôp biq adrah. Yôôch ni hooy dơơp xapo ka muuyq adro tamooy đom dêh, ji kôôch patăk ni vlôh manay ruôngq ku adro nưq xôq ajư xuur. Ni tajôh jah xa xing aduq kadôh tuôh, laa thưq bơy xuur đong xa, đơu be kơyq ăm ni. Bơh đong tuôôy biit hlê truh ni, ni đnooy: ‘Xet taleq adro dơơp xapo ku vaq gô e tuôông xa raah jôh, măn gô jeq kaxêêt pangoot măn đnen! Atêq tuôôy xalaak kah, gô hnoq hooy xuq kung vaq ku gô, ji gô hnoq đnooy dii vaq đaneq: “Vaq lơơy, koot heq lôp kadrôôp tachơơl dii plêêk ji kangưưr vaq. Koot be taxưngq jah taayh laa koot ku vaq đnoyq. Xiin 'yo koot đaji muuyq adro dơơp xapo ku vaq.”’ Ji tuôôy heq xalaak kah, ni hooy xuq kung vaq ni. Bơh tuôôy ni đong măn xing xangưưy, vaq ku ni heq tamaak hloq ni ji kơy arơơk xuum biit angơuq, yôôch charơơk truh gah, kơy khwuôt kabiin xok ranong ni ji hiip ni. Tuôôy nưq, adro koot đnooy dii vaq: ‘Vaq lơơy, koot heq lôp kadrôôp tachơơl dii plêêk ji kangưưr vaq. Koot be taxưngq jah taayh laa koot ku vaq đnoyq.’ Bơh adro vaq đnooy dii khơl xapok kơy: ‘Dayh dayh xagook aau kahliik tolh nhưk pahlưp ka ni, hlưk kook muut ti ni, ji troaq kaxôôp muut jôôk. Dayh rôp bo koot heq, dơơp ôq ni, ji haay luh waal xa mưng. Vii adro koot kanau neq ku gô 'miêh heq kaxêêt đơu heq riirh hlê, 'miêh heq hlơơp đơu heq jah axek hloq.’ Yôôch oot luh waal hlah hlaak. Bơh koot kanau kôt ku kơy 'miêh đong măn pi gôk manay, ji tuôôy wiit xuq, ay hooy jeq truh hnhư, tameng tek hnưm varo kacheeu, ayuch ayauq. Taayh muuyq adro xapok hlê, ay vôôch varơuq neq laa aleq. Adro xapok tơơl dii ay đaneq: ‘Oh kanau ay wiit xuq ji vaq ay ăm dơơp ôq bo koot heq, vii kơq kơy heq đoonq oh nưq xuq hnhư hrok hrol tơơl dal.’ Lunư, adro koot kôt tôq jaraq, ay leh xung muut pi'lăp, ji vaq ay hooy vlôh adô ahmưk ay. Bơh tuôôy tơơl hlê, ay đnooy dii vaq ay: ‘Vaq 'yo, koot dơơp varơuq ka vaq tuôôt taleq xanưm, ji koot koq hmưq 'yo galiah apok đinq ku vaq, đơu vaq be dong leq ăm koot muuyq ôô vove chwoay xôq koot hnoq ik xa waal dii khơl 'wơyq koot, bơh tuôôy adro koot hơq ku vaq wiit xuq, laa adro heq dơơp xarêh dêq garuh anôôp ku vaq dii khơl xakwoah, yôôych vaq heq ăm dơơp ôq bo koot heq vii ni.’ Nưq yôôch adro vaq đnooy dii ay nưq: ‘Koot lơơy, koot hloay măn kung dii vaq, ji dêq hloay kaluh kajoq ku vaq laa ku koot. Bơh đong dik đangq xôq luh waal ji hlah hlaak, vii ma oh kanau ku koot neq 'miêh heq kaxêêt đơu laay riirh, hmưq hyaak hlơơp đơu heq jah axek hloq.’”

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.