Lu-ka 13

1Muuyq sôôq manih e mot muut tuôôy nưq taboon hlê ka Kadraq truh khơl manih Ga-li-lê đơu Phi-lat heq khienq vahaap khơl manih nưq aluq dii kuah lêh ku oot. 2Tuôôy tơơl hlê, Kadraq đnooy dii oot: “Khơl kơy biit đaneq khơl manih Ga-li-lê nưq laa kadrôôp maroh iaq tôôy adro Ga-li-lê kadrơy vii oot pheq chiuq đanưq ih? 3Gô đnooy dii khơl kơy, be aalq đanưq. Lunư, atoh khơl kơy leh wiit xuum, yôôych dêq hloay kung hnoq biq kaxêêt hlơơp đanưq. 4Long đaji kưl thơơm adro hơq, đơu hnhư yơơt aduq Si-lô-ê heq hrưp pôôt kateep tok taalh ji păk kaxêêt oot: Khơl kơy biit đaneq oot laa khơl adro kadrôôp maroh ramêq iaq tôôy adro riirh aduq Jê-ru-sa-lem ih? 5Gô đnooy dii khơl kơy, be aalq đanưq. Bơh atoh khơl kơy leh wiit xuum, yôôych dêq hloay kung hnoq biq kaxêêt hlơơp đanưq.”

6Yôôch Kadraq taboon kadook atoh neq: “Adro nưq e ưk pok puut jah pêêt đom hluôôt nho ni, ji kơy truh axek play tol ưk nưq bơh leh hloq. 7Kơy đnooy dii adro dơơp hluôôt: ‘Ay 'yo nee, pe xanưm xing tuôôy đơu gô truh axek play aduq ưk pok puut neq đơu be hloq. Dayh kơl ni dơyh. Vii liq jo kajoq đơu ni pheq đnooy tagoa vari lưp yuôôr?’ 8Bơh tuôôy tơơl apok, ay nưq đnooy dii kôôch: ‘Kôôch lơơy, xiin dayh xôq ni hlê athêêp xanưm neng đnoyq, truh mưk đơu gô heq xiel vari rawiit ni ji uk ek. 9Axit vlôh yôôych, truh atêq ni hnoq ik vlôh play … măn atoh dik be e kajoq, kôôch hnoq kơl ni!’”

10Kadraq đong pato dayq đom muuyq hnhư hơu muut hngơy Sa-bat, 11ji hơq, muuyq adro kadrê biq kamuuych jiq jiêh nhôp tuôôt kưl thơơm xanưm, mư biq kadônq karok ji leh hnoq dưk hyioh ik. 12Tuôôy Lôôk Jê-xu hloq mư, Kadraq ăm taayh yôôch đnooy dii mư: “Nee mư, mư heq jah wơơt xaloot klơlh dong varơuq jiq jiêh ku mư.” 13Kadraq xôq ti tol mư, hloay juneq mư dưk hyioh tok, ji ayuôôt laat Kơy Plêêk. 14Bơh tuôôy adro jư 'yo hnhư tagumq tok apok, vii tôq jaraq vii kơq Lôôk Jê-xu heq payơh bingq đom hngơy Sa-bat, lunưq kơy đnooy dii bing karôp đaneq: “E drơu hngơy đơu đom kaluh hngơy neq laa pheq dơơp varơuq. Vii anưq, dayh truh payơh bingq muut kaluh hngơy nưq, bơh leh aalq muut hngơy Sa-bat.” 15Bơh Lôôk tơơl hlê kơy nưq, ji Kadraq dăt: “Khơl xuum pa ôôh! Be aalq muut hngơy Sa-bat tôôy adro khơl kơy raay luh talơy vek bo long lưưa ku êêp vlôh klơlh chuông ji jarooy ni hooy hôôch daak ih? 16Măn adro khơl kadrê neq, laa koot kadrê ku Ap-ra-ham, laa adro đơu Sa-tan heq rôp vek, 'yo hơq, đom tuôôt kưl thơơm xanưm, mư leh duh jah luh vlôh klơlh varaq neq muut hngơy Sa-bat ih?” 17Tuôôy Kadraq đnooy kaluh apok nưq, tôôy adro tachơơl hlê Kadraq raay kamưưl, măn dêq bing tamooy karôp yôôych hlah hlaak truh dêq hloay kaluh varơuq akêh jah dưk dơơp xing Kadraq.

18Nưq yôôch, Kadraq đnooy: “Daak dêh ku Kơy Plêêk yôôych dang dii varơuq kajoq, ji gô hnoq taso ni dii kajoq neq? 19Daak dêh nưq yôôych dang đaji muuyq kalook avơy đơu muuyq adro xok paraay đom hluôôt adro nưq, yôôch ni kôt tok jêêk vlôh muuyq poop ưk, ji xêêp plêêk dơơp tapu tol đook ku ni.”

20Kadraq laay đnooy: “Gô hnoq taso daak dêh ku Kơy Plêêk dii varơuq kajoq? 21Daak dêh nưq yôôych dang đaji tape đơu muuyq khơl kadrê xok aluq muut pe hlơk bôôt dong truh tuôôy bôôt vôô dêq tok.”

22Yôôch Kadraq hooy dalơh kaluh theng ji palơy pla, vơơ pato dayq vơơ dưk dơơp varơuq hooy truh Jê-ru-sa-lem. 23Tuôôy nưq, muuyq adro hơq tơơl dii Kadraq: “Kuh Lôôk, jơq be vơ muuyq sôôq axit adro jah wơơt?” Kadraq tơơl hlê oot: 24“Dayh tagoa tadơơp xôq hooy muut hlê 'mok kieep vii, gô đnooy ka oh ay xet, 'ngưng adro hnoq axek kach xôq muut đơu leh ik. 25Atêq tuôôy kôôch hnhư heq xalaak kah ji kađnoch 'mok hlê, oh ay đơơu dưk pi gôk ji ahngoq 'mok, tơơl đaneq: ‘Kuh Lôôk, xiin luh ka 'wot.’ Yôôych tuôôy tơơl hlê oh ay, adro kôôch hnoq đnooy: ‘Gô be xet êêp, long êêp măn ka'leq vlôh.’ 26Tuôôy nưq, oh ay hnoq luh apok xôq tơơl đaneq: ‘'Wot heq xa hôôch kangưưr Kadraq, ji Kadraq heq pato dayq tol kaluh trôôk theng ku 'wot.’ 27Bơh kôôch hnhư hnoq tok apok, đnooy kung oh ay: ‘Gô be xet êêp măn ka'leq truh. Dayh chuh xangưưy klơlh gô, dêq hloay bing dơơp kông lưp hyioh jăk hơq!’ 28Măn aduq nưq, hnoq e nhim ook ji takik kaneeng tuôôy oh ay hloq Ap-ra-ham, I-sak, ji Ja-kôp, kung dêq hloay khơl kơy hlit măn đom daak dêh Kơy Plêêk, đơu leh e oh ay, vii biq avih vlôh pi gôk. 29Manih kadrơy hnoq truh xing đông ji tâây, xing băk ji naam, ji oot hnoq 'ngôôy waal xa đom daak dêh ku Kơy Plêêk. 30Hơq, e khơl adro atêq lôôch đơu oot hnoq jêêk vlôh adroyq, ji e 'ngưng adro măn adroyq đơu oot hnoq jêêk vlôh atêq.”

31Muut kadih wat nưq, taleq dro Pha-ri-si nưq truh jeq, đnooy dii Kadraq: “Xiin thơy vlôh hooy ji dayh hooy xangưưy klơlh đnen vii Hê-rôt xung păk kaxêêt thơy.” 32Kadraq đnooy dii oot: “Dayh hooy, dăt xo karaak nưq: ‘'Yo nee, gô druyh kamuuych ji dưk dơơp kaluh varơuq payơh hngơy neng ji hngơy dơh, yôôch muut hngơy thưq pe gô dơơp payôôch xaleep.’ 33Long anưq, đôôyq dii gô, varơuq duh dik laa pheq dơơp đnoyq varơuq hooy hngơy neng, hngơy dơh ji hngơy tăm ma rơ, vii đôôyq dii muuyq kơy hlit, leh hnoq ik kaxêêt pi gôk theng Jê-ru-sa-lem. 34Ôôy Jê-ru-sa-lem, Jê-ru-sa-lem, may păk kaxêêt khơl kơy hlit ji tiip phơu khơl adro heq jah patăk truh dii may. Xet taleq yưk Gô xung anguk koot xau ku may hlê đaji kach đơu ier kadrok toom koot ni 'laarq panưr, đơu êêp leh trôôch. 35Hơq, hnhư ku êêp biq aklah goch klơlh êêp. Gô đnooy dii êêp, êêp kajưk dik leh hloq gô dong truh tuôôy kawat nưq hnoq truh, laa tuôôy êêp đnooy: ‘Đangq ayuôôt laat Kơy truh đom yal Lôôk.’”