Ja-kơ 5

1Măn tuôôy neq, dayh tabông truh đnen, khơl adro karoh kariêp hơq, dayh nhim ook ji pariau alo vii varơuq pơơl hwơơl ku khơl adro đong truh. 2Garuh anôôp khơl adro biq ra oom naat, măn qwuân aau khơl adro vlôh jêêk tuôông xa ka kamoor moq. 3Vajang ji baak ku khơl adro biq hlah maau ji varơuq ka xaak ku kaluh nưq hnoq laa dưk xanưk tachơơl hlê khơl adro, ji kaluh ni hnoq xa luôôt xăk hlek khơl adro dang đaji ôôlh. Khơl adro heq chơt rahloot garuh anôôp ni đom kaluh hngơy lôôch dik. 4Dayh 'yo hơq, jêêt kông ku khơl adro dơơp xapo, nưq laa khơl thơq goch tol kaluh manay ruôngq ku khơl adro, jêêt nưq heq biq jư hlê aduq khơl adro, ni đong taayh pariau tok, ji kaluh apok nhim alo ku khơl thơq goch nưq heq truh pi tôôr Lôôk kaluh bing kuun. 5Khơl adro heq riirh xa agưt ji vuul weel ataalh vari. Khơl adro heq pa heeq xuum ni ka hngơy păk kaxêêt. 6Khơl adro heq rôp kadrôôp ji păk kaxêêt manih hyioh jăk, manih nưq leh tachơơl tangưưr hlê khơl adro.

7Vii anưq, wơơy oh ay, dayh atuq xuum dong truh tuôôy Lôôk truh. 'Yo hơq, manih dơơp nôông takôô raak play quiq jaq xing vari, atuq xuum takôô ni dong truh tuôôy vari nhonq jah jit adroyq muua ji lôôch muua. 8Oh ay kung pheq atuq xuum. Dayh dơơp ka kajưk xuum ni vii varơuq rama truh ku Lôôk heq jeq. 9Oh ay lơơy, te ramôôl trek tachơơl hlê mamuuyq, xôq oh ay klơlh biq xưh xadrah. 'Yo hơq, Adro Xưh Xadrah đong dưk măn ka 'mok. 10Wơơy oh ay, dayh dơơp atôôlh truh varơuq chiuq pơơl ji atuq xuum ku khơl kơy hlit, khơl manih taayh yal Lôôk padoh pato. 11'Yo ne, haay taayh khơl adro kajưk xuum laa e vanong. Oh ay heq tameng truh paraat chiuq uunq ku Joop, ji oh ay heq hloq muk đik ku Lôôk, vii Lôôk karoh xuum biit angơuq ji kaxay xuum.

12Bơh adroyq dêq, wơơy oh ay ku gô, te paleek, kung te pahnho plêêk long pahnho vari long paq kê apok paleek leq đêh. Bơh, “e” yôôych pheq laa “e”, ji “leh” leh pheq laa “leh”, xôq oh ay leh klêh muut varơuq xưh xadrah.

13Adro leq đom oh ay đong chiuq pơơl be? Adro nưq dayh xadrook apôôy. E kơyq hlah hlaak be? Adro nưq dayh ayuôôt laat. 14Adro leq đom oh ay jiq jiêh be? Adro nưq dayh mơơy khơl kadraq lơơk đom tayuup vah truh ji đom yal ku Lôôk, oot pheq xadrook apôôy thêq ka ni, para jơu ka ni. 15Apok xadrook apôôy ku xuum tuôq hnoq wơơt waak adro jiq jiêh ji Lôôk hnoq rôôk adro nưq kah. Atoh dro nưq e hnoq heq lôp kadrôôp, yôôych adro nưq hnoq jah ka'lăk. 16Nưq, dayh xưng kadrôôp dii mamuuyq ji xadrook apôôy ka mamuuyq xôq oh ay e hnoq jah paxêêk yơh. Apok xadrook apôôy ku manih hyioh jăk tuôôy e da uh yôôych thier jah jêêk. 17Ê-li laa muuyq koot manih chiuq xet ik hlah rơu i đaji haay, ji kơy xadrook apôôy dii varơuq dêq xuum xiin ka plêêk te jit, yôôych plêêk leh jit đom dêh tuôôt pe xanưm drơu xiêk. 18Yôôch kơy laay xadrook apôôy, yôôych plêêk kahrôq jit, ji vari vlok raak play.

19Wơơy oh ay ku gô, atoh manih leq đom oh ay hyaak tawaak klơlh varơuq dik, ji muuyq kơyq nưq jarooy manih nưq wiit xuq, 20yôôych pheq xet đaneq kơyq wih ngưưr adro e kadrôôp vlôh klơlh trôôk hyaak hyul ku ni, manih nưq hnoq vook wơơt phool hiel adro nưq klơlh varơuq kaxêêt, ji hnoq katuh galôp thier 'ngưng kadrôôp maroh.