1 Phi-e-rơ 1

1Phi-e-rơ, adro jah rơơlh ku Lôôk Wơơt Dêh Jê-xu, atăq ka khơl manih jah rơơlh katul khơl manih riirh xangưưy dêh pachaay loch aduq đom dêh Bông, Ga-la-ti, Kap-ba-đôk, A-si ji Bi-thi-ni, 2tyauq varơuq xet adroyq ku Kơy Plêêk, laa Vaq, bơyh varơuq xôq đêh vlôh ku Lôôk Phool Hiel ka varơuq tameng tyauq ji varơuq xa'nhơyh vahaap ku Lôôk Wơơt Dêh Jê-xu. Apôôy xiin vanong plêêk ji varơuq hrok hrol jah 'ngưng athêêp galơh galaay tol oh ay.

3Đangq ayuôôt laat Kơy Plêêk ji Vaq ku Lôôk haay, laa Lôôk Wơơt Dêh Jê-xu, Kơy xatyauq xuum biit angơuq kôt galơh ku Kadraq, heq tađôôy đơơu haay muut đom xuum takôô gamưh riirh gamưh varơuq riirh hlê ku Lôôk Wơơt Dêh Jê-xu xing aduq kaxêêt, 4wih xuq muuyq kơ ngiip leh hư hlơp, leh klơl 'yêq ji leh rook hlơp, heq jah jư 'yo tol plêêk ka oh ay, 5laa deng ka khơl adro gamưh xuum tuôq, jah jư 'yo bơyh taay yaak Kơy Plêêk ka varơuq wơơt xok, laa varơuq ralauq 'miêh xôq jah kahnoq vlôh đom kađơơy lôôch dik. 6Gamưh anưq, oh ay thier hlah hlaak, long ka juneq duh pheq chiuq hlu rơu muuyq jơy đom 'ngưng varơuq thưh thek 7xôq ka varơuq dưk xanưk truh xuum tuôq ku oh ay — varơuq quiq iaq vajang, laa thưq biq hư hek đơu măn chiuq thưh 'yo bơơn ôôlh — e hnoq jah 'yo nhonq xôq taway truh varơuq ayuôôt laat, tađnah tađnaak ji vado đom varơuq rama vlôh ku Lôôk Wơơt Dêh Jê-xu, 8Kơy đơu oh ay xung xiaq ju koq hloq, juneq long leh hloq Kadraq bơh vii tuôq gamưh aduq Kadraq, lunưq oh ay hlah hlaak dii xuum hlah be ik đnooy ji jah viik galaay tađnah tađnaak, 9nhonq xok raak play aduq xuum tuôq ku oh ay, nưq laa varơuq wơơt xok phool hiel. 10Khơl hnhư hlit heq axek 'yo ji arơơk 'yo thier ki truh varơuq wơơt xok neq, nưq laa khơl adro heq đnooy adroyq truh vanong plêêk deng ka oh ay, 11tuôôy axek 'yo truh adro leq long tuôôy leq đơu Kơy Phool Hiel ku Lôôk Wơơt Dêh đom oot 'miêh heq kahnoq vlôh, ăm xet adroyq truh varơuq pơơl jiq ku Lôôk Wơơt Dêh ji varơuq tađnah tađnaak atêq kaluh varơuq nưq. 12Varơuq heq jah kahnoq vlôh ka oot, nưq laa oot 'miêh leh hơu varơuq ka kadih oot, bơh ka oh ay, truh kaluh varơuq đơu juneq heq jah đnooy vlôh ka oh ay xing khơl manih padoh taboon Hêêl Kaxay ka oh ay gamưh Kơy Phool Hiel jah patăk xing plêêk — đôôyq dii kaluh varơuq nưq, khơl yaak plêêk kung trôôch xung 'yo hloq.

13Vii anưq, bơơn kach ralauq xôq xuum biit oh ay đaji hnoq hnek katêêk, jư talăng jăk, dayh xôq xaleep takôô gamưh muut vanong plêêk jah xagook truh ka oh ay đom varơuq rama vlôh ku Lôôk Wơơt Dêh Jê-xu. 14Đaji koot xau xet tameng apok, leh dơơp tyauq kaluh xuum hmưch trôôch adroyq hơq đom varơuq koq hlolh xet ku oh ay, 15wih hlê, dang đaji Kơy heq tawooyh taayh oh ay laa vah, kadih oh ay kung pheq jah yuôôr vah đom dêq hloay kach xa măn ku oh ay. 16Vii e apok valơk: “Khơl koot hnoq yuôôr vah vii Gô laa vah.” 17Ji atoh oh ay taayh Kơy xưh xadrah kach leh bing kơyq xatyauq kông varơuq ku tôôy adro laa “Vaq”, yôôych dayh riirh dii xuum kuh yôq đom kawat măn đơ đơơy neq ku oh ay, 18vii xet đaneq be aalq gamưh kaluh thư e hnoq hư hek đaji baak long vajang đơu oh ay heq jah wơơt vlôh klơlh đơơy riirh be raa kajoq ku oh ay xing mo kơy xôq hlê, 19bơh laa gamưh vahaap quiq ku Lôôk Wơơt Dêh, đaji trưưu koot leh e hlêêl tachoot ji leh klơl 'yêq, 20heq jah đinq adroyq tuôôy panưk jêêk plêêk vari, bơh jah kahnoq vlôh đom đơơy xanưm lôôch dik neq vii kơq oh ay, 21laa khơl adro gamưh Kadraq tuôq aduq Kơy Plêêk, Kơy heq khienq Kadraq riirh hlê xing aduq kaxêêt ji kahniq tađnah tađnaak ka Kadraq, xôq xuum tuôq ji xuum takôô gamưh ku oh ay măn đom Kơy Plêêk. 22Tuôôy heq pa xarêh phool hiel oh ay gamưh varơuq tameng tyauq varơuq dik wih truh xuum xiaq oh ay dong dik, oh ay dayh xung xiaq mamuuyq kach dêq paraat dii xuum pa xarêh, 23vii heq jah tađôôy đơơu, be aalq xing adrek e hnoq hư hek, đơu xing adrek leh e hnoq hư hek, gamưh apok hloay riirh ji măn miet ku Kơy Plêêk. 24Bơyh vii:

“Tôôy xăk xamơk dang đaji rek,

ji tôôy tađnah tađnaak ku ni dang đaji raak rek.

Rek kateh, ji raak ruh,

25bơh apok Lôôk măn truh đơơy đơơy.”

Nưq laa Hêêl Kaxay heq jah padoh taboon ka oh ay.