Ja-kơ 4

1Kaluh đơơt takaay tayaat truh xing aduq leq ji kaluh varơuq tagoa vlôh xing 'leq katul đom oh ay? Be aalq ni vlôh xing kaluh hmưch trôôch ku oh ay, laa varơuq măn đong takaay tayaat katul kaluh xăk xamơk ku oh ay aleq? 2Oh ay hmưch trôôch đơu be e jah, oh ay păk kaxêêt manih. Oh ay biit trôôch, đơu leh hnoq jah ik, oh ay takaay tayaat ji tahmơt. Oh ay leh e vii oh ay leh vôôch. 3Oh ay xiin đơu be nhonq jah vii oh ay xiin kach leh troq, xôq xa agưt ka kaluh hmưch trôôch ku oh ay. 4Khơl adro tuut taak hơq! Oh ay leh xet đaneq varơuq dơơp 'wơyq dii dêh araak laa varơuq tachơơl dii Kơy Plêêk aleq? Ăm atoh, long kơyq xung laa 'wơyq dii dêh araak, yôôych adro nưq biq xôq muut ka aduq adro tachơơl ku Kơy Plêêk. 5Long oh ay biit đaneq Rahlăp Vah đnooy hlo hloh: “Kơy Phool Hiel đơu Kadraq khienq riirh đom haay, Kơy nưq trôôch xiaq haay truh ajơ geen bơyq”? 6Lunưq, Kadraq kahniq ăm vanong plêêk kôt iaq, đơu Rahlăp Vah đnooy: “Kơy Plêêk tachơơl hlê adro katơơk galơh, bơh Kadraq kahniq vanong plêêk ka khơl apôôt xăk.” 7Vii anưq, dayh tameng tyauq Kơy Plêêk. Bơh dayh tachơơl hlê kamuuych, yôôch ni hnoq chuh xangưưy klơlh oh ay. 8Dayh truh jeq Kơy Plêêk, ji Kadraq hnoq truh jeq oh ay. Khơl adro lôp kadrôôp, dayh dơơp xarêh ti oh ay, khơl leq vaarq xuum, dayh dơơp pa xarêh xuum oh ay. 9Dayh hlu rơu, nhim ook ji tanguh alo! Dayh tađôôy apok xagiel ku oh ay jêêk apok nhim, ji tađôôy hlah hlaak vlôh varơuq hlu. 10Dayh kadih apôôt xăk pôôt adroyq kangưưr Lôôk, yôôch Kadraq hnoq rôôk oh ay tok.

11Wơơy oh ay, te đnooy xơuq mamuuyq. Adro đnooy xơuq oh ay long xưh xadrah oh ay ni laa đnooy xơuq ganuun ji xưh xadrah ganuun. Bơh atoh ay xưh xadrah ganuun yôôych ay leh aalq laa adro dơơp tyauq ganuun, đơu laa xưh xadrah. 12Kơy kahniq ganuun ji xưh xadrah laa vơ muuyq, laa Kơy e qwuyen wơơt ji păk kaxêêt. Măn ay laa kơyq, ne adro xưh xadrah manih gah gih ay?

13Juneq, dayh tameng ne, khơl adro đong đnooy đaneq: “Hngơy neng long hngơy dơh 'wot hnoq hooy truh theng hơq, yôôch hnoq dơơp varơuq aduq nưq muuyq xanưm, tabôôt tek ji karoh e.” 14Nưq khơl adro be xet ik varơuq hngơy dơh, đơơy riirh ku oh ay laa kajoq? Vii oh ay laa xa uh daak vlôh đom muuyq jơy yôôych biq rook hlơơp. 15Tađôôy muut đnư, oh ay pheq đnooy: “Atoh Lôôk xung, yôôych 'wot hnoq riirh ji hnoq dơơp varơuq neq long varơuq hơq.” 16Bơh, oh ay juneq đong pa ưưt akhwoak đom katik katơơk galơh ku ni. Tôôy varơuq pa ưưt akhwoak đanưq laa xơk xơuq. 17Ăm atoh, adro leq xet varơuq kaxay duh dơơp đơu laay leh dơơp, yôôych adro nưq e kadrôôp.