Cua Bible Literal Text
Ja-kơ 3
Wơơy oh ay ku gô, te e 'ngưng adro đom oh ay dơơp thơy, bơyh xet đaneq haay hnoq pheq nhonq xok varơuq xưh xadrah kôt iaq. Vii haay raay xatôôlh lôp đom 'ngưng kach. Atoh dro leq leh xatôôlh lôp đom apok đnooy, yôôych nưq laa dro xaleep, e hnoq 'yo jư hloay xăk xamơk. Atoh haay trôôp ro maam muut moon ôô ahleh xôq khienq ni biq pheq tameng tyauq haay, yôôych haay jarooy dêq xăk ku ni. Kung dayh 'yo kaluh poop tau e kơh nưlh kôt dik ji biq khiel kalh puh ranhuq, bơh muuyq poop tau jah raay ngưưr bơyh muuyq benh laayq thier de xôq truh aduq đơu pa xarôp ku manih laayq tau heq đinq. Dang đanưq, kapiet laa muuyq đom phon de bơh laay pa ưưt akhwoak kaluh varơuq kôt. Dayh 'yo muuyq xau ôôlh de đaleq vuh jaq muuyq rơơk gôk kôt vlôh đaleq. Kapiet kung dang đaji ôôlh muuyq dêh araak lưp kaxay. Kapiet jah xôq măn katul kaluh đom dêq xăk xamơk ku haay, dơơp klơl 'yêq dêq xăk xamơk ji vuh jaq hloay tuôôy đơơy, đơu kadih ni yôôych biq vuh jaq 'laarq ôôlh karuk. Tôôy kaluh paroh ôô gôk ji kaluh xêêp, kaluh paroh adool ji paroh tahli raay xakaq ik ji heq biq koot manih xakaq. Bơh leh kơyq e hnoq ik jư poop kapiet, muuyq paroh xơk xơuq leh padơy dơơp loanq, viik nok đôk kaxêêt hlơơp. Dii ni, haay ayuôôt laat Lôôk ji Vaq, kung dii ni, haay karoay axaap koot manih, laa koot manih heq jah pajêêk panưk tyauq long lơuq ku Kơy Plêêk. Apok ayuôôt laat ji apok karoay axaap đnooy vlôh xing kung muuyq poop huuy. Wơơy oh ay ku gô, kaluh varơuq đanưq be huq xalih vlôh. Muuyq alook daak xing kung muuyq xaliap phơu be hnoq hoot vlôh daak jaleek ji hloay daak pahlăk, troq leh? Wơơy oh ay ku gô, gay pok puut leh hnoq ăm vlôh play ô-liu, long gay nho vlôh play pok puut, troq be? Daak phaak kung leh hnoq ăm vlôh daak jaleek.
Adro leq khôôt xet ji hlolh xet katul đom oh ay? Adro nưq pheq kahnoq vlôh kaluh varơuq dơơp ku ni vlôh xing đơơy riirh kaxay tamaq đom xuum klaak apôôt xăk ku varơuq khôôt xet. Bơh atoh oh ay e varơuq 'yarơ tôq jaraq ji hmưch trôôch đom xuum ni, yôôych te pa ưưt akhwoak ji đnooy pa ôôh tachơơl dii varơuq dik. Neq leh aalq laa varơuq khôôt xet kahri pôôt xing ataalh, bơh laa thưq thuôk dêh araak, danưng kooy, kamuuych. Vii varơuq 'yarơ ji hmưch trôôch măn 'leq, yôôych varơuq xalôônq xalaaoq ji tôôy varơuq xơk xơuq măn đnư. Wih hlê, varơuq khôôt xet xing ataalh adroyq dêq laa pa xarêh, atêq nưq laa xiaq trôôch tagu, hien kaxay, xuum klaak tameng tyauq, viik xuum biit angơuq ji kaluh raak play tolh taak, leh aklah xuum biit ravơq, leh dơơp bô. Raak play ku varơuq hyioh jăk jah paraay đom tagu bơyh khơl manih dơơp varơuq tagu.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.