Hê-bơ-rơ 7

1Vii Mên-chi-xê-đeek neq, 'ngưq laa vuua ku Sa-lem, thơy tơơk tưp ku Kơy Plêêk Thier Yơơt, manih heq tavơh Ap-ra-ham đong tuôôy wiit xuq xing đơơt tahmơt hrưp khơl vuua, ji heq chuk vanong ka kơy, 2đơu Ap-ra-ham kung heq aklah vlôh đêh muuyq phon kưl xing dêq hloay garuh anôôp hmơt jăk deng ka vuua nưq; adroyq dik, Mên-chi-xê-đeek jah jich laa “vuua hyioh jăk,” đơu đêh vlôh kung laa vuua ku Sa-lem, iq laa “vuua hrok hrol,” 3vuua leh e vaq, leh e miq, leh e katôôl, kung leh e kaluh hngơy paxa rôp long lôôch dik đơơy riirh, bơh jah jêêk dang đaji Koot Kơy Plêêk, vuua măn kưq laa thơy tơơk tưp dong truh miet miet.

4Bơh dayh tabông 'yo vuua nưq kôt galơh đaleq, đơu mo kơy Ap-ra-ham heq tơơk tưp phon kưl xing đom kaluh garuh anôôp tahmơt jăk tolh dik. 5Măn khơl dro xing adrơơk Lê-vi, tuôôy dưk dơơp chưk tơơk tưp, yôôych e apok tanưưl xôq xok hlê muuyq phon kưl xing manih karôp tyauq ganuun, iq laa xing oh ay haay, ju raay heq vlôh xing xuum Ap-ra-ham. 6Lunư, tuôôy leh jah 'yo đom adrơơk vlôh xing oot, vuua neq heq thu xok phon kưl aduq Ap-ra-ham, ji heq chuk vanong ka manih e kaluh apok tavek. 7Panưh kadrơy, be e paq kê varơuq tayaat leq tuôôy manih băk 'laarq iaq jah chuk vanong xing manih băk yơơt iaq. 8Ji đom ka varơuq neq, khơl manih đong jeq kaxêêt nhonq xok phon kưl, măn đom ka varơuq hơq, vuua nưq jah 'yo xanưk laa măn đong riirh. 9Hnoq ik đnooy muuyq varơuq luneq, Lê-vi, manih thu kaluh phon kưl, kung heq jah thu phon kưl gamưh hlê Ap-ra-ham, 10vii kơy đong măn đom klaak ku mo kơy ku kơy tuôôy Mên-chi-xê-đeek tavơh mot Ap-ra-ham.

11Anưq, atoh varơuq xaleep laa gamưh chưk tơơk tưp ku manih Lê-vi (vii tol varơuq nưq, manih karôp heq jah kahniq ăm ganuun), yôôych duh kajoq pheq panưk tok athêêp thơy tơơk tưp kadrơy tyauq adrơơk Mên-chi-xê-đeek, đơu leh jah 'yo tyauq adrơơk A-rôn? 12Vii tuôôy chưk tơơk tưp biq tađôôy, yôôych jo varơuq rôp băt, varơuq tađôôy truh ganuun kung pheq xalih vlôh. 13Vii Kadraq, Kơy đơu kaluh varơuq neq đong jah đnooy truh, thuôk muuyq adrơơk kadrơy, đơu xing đom adrơơk nưq koq e kơyq hmưq hơu varơuq aduq para hơu. 14Vii ro raang đaneq Lôôk haay pa iir vlôh xing Ju-đa, đơu đôôyq dii adrơơk nưq, Môi-se heq be đnooy varơuq kajoq tajinq truh khơl thơy tơơk tưp. 15Varơuq neq pheq đnooy kơn ro raang iaq đnoyq atoh muuyq thơy tơơk tưp kadrơy dưk tok tyauq long lơuq ku Mên-chi-xê-đeek, 16laa Kơy jêêk vlôh thơy tơơk tưp leh tyauq ganuun đom ganeen ku xăk xamơk, bơh laa tyauq taay yaak ku varơuq riirh paq kaxêêt. 17Vii Kadraq jah dơơp xanưk đaneq:

“Koot laa thơy tơơk tưp đơơy đơơy tyauq adrơơk Mên-chi-xê-đeek.”

18Vii muuyq panưh, varơuq ka'lăk ganeen adroyq neq xalih vlôh vii ni ravoch ji leh xung liq 19(nưq jo ganuun be dơơp ăm xaleep varơuq kajoq), ji panưh kadrơy laa varơuq xagook hlê xuum takôô gamưh kaxay tamaq iaq, đơu gamưh đnư haay truh jeq Kơy Plêêk. 20Ji be aalq jah dêq hloay kaluh varơuq nưq đơu leh e apok paleek, — vii long khơl manih hơq be e apok paleek yôôych heq jêêk vlôh khơl thơy tơơk tưp, 21bơh Kadraq yôôych apiq tajinq dii muuyq apok paleek, gamưh Kơy xanoh dii Kadraq:

“Lôôk heq paleek ji hnoq leh tađôôy iq:

‘Koot laa thơy tơơk tưp dong truh đơơy đơơy.’” —

22vii anưq tyauq kach thier galơh nưq, Lôôk Jê-xu heq jêêk vlôh Kơy hôôk kajưk ku muuyq tavek tolh iaq. 23Ji long khơl manih hmưq jêêk vlôh thơy tơơk tưp laa karôp iaq, vii kơq biq varơuq kaxêêt klơl hlê xôq kưq dơơp đnoyq, 24anưq bơh, Kadraq jư chưk tơơk tưp leh ik tađôôy, vii Kadraq hloay măn dong truh đơơy đơơy, 25đơu vii kơq nưq, Kadraq kung e taay yaak xôq wơơt xok truh mưk xaleep khơl adro truh jeq Kơy Plêêk gamưh Kadraq, laa Kơy hloay riirh xôq apôôy vôôch thay ka oot. 26Vii muuyq thơy tơơk tưp kôt đanưq dik jơq laa deng ka haay: Kơy hlăng vah, be e kadrôôp, paxa rêh, jah aklah vlôh klơlh khơl adro kadrôôp maroh, ji jêêk vlôh yơơt galơh iaq kakuh tal plêêk; 27laa Kơy leh e varơuq duh tôôy hngơy dang đaji khơl thơy tơơk tưp kôt kadrơy, pheq tơơk tưp ôq lêh, adroyq dik laa thay ka kadrôôp ku kadih oot, atêq nưq laa kadrôôp ku manih karôp, vii Kadraq heq dơơp payôôch varơuq nưq atêq tuôôy pahnăp tơơk tưp kadih kadraq muuyq yưk đu hloay. 28Vii ganuun panưk tok khơl koot manih e varơuq pơh pơơl dơơp thơy tơơk tưp kôt, bơh apok paleek, laa varơuq truh atêq ganuun, yôôych pato đinq Koot, laa Kơy heq jah dơơp jêêk xaleep dong truh đơơy đơơy.