Skip to content
BibleKenya

Cua Bible Literal Text

Hê-bơ-rơ 8

Nưq yôôych, aduq duh dik truh varơuq đong jah đnooy padoh laa đaneq: Haay e muuyq thơy tơơk tưp kôt đanưq, laa Kơy heq 'ngôôy măn pi akoh ngaai ku Kơy Ra uk Ra aal tol kaluh tal plêêk, muuyq xapok ku aduq vah ji raap đơ dong dik đơu jơq Lôôk heq panưk tok, leh aalq koot manih. Vii tôôy muuyq thơy tơơk tưp kôt yôôych jah pato đinq xôq tưp kaah kaluh kuah lêh hloay kaluh ôq lêh, đơu vii kơq nưq, Kơy nưq kung duh e varơuq kajoq nưq đơu Kadraq hnoq ik tơơk tưp tok. Anưq, atoh đaji Kadraq đong măn tol vari, yôôych kajưk dik Kadraq pheq đnooy heq leh dơơp thơy tơơk tưp, vii heq e khơl dro tơơk tưp kuah lêh tyauq ganuun; laa khơl dro hơu varơuq muuyq kahri dơơp tyauq ji long lơuq ku kaluh varơuq tol plêêk, đaji Môi-se hmưq jah đnooy dăt tuôôy jeq dơơp payôôch raap đơ, vii Kơy Plêêk xanoh: “Dayh rơơt rol, koot hnoq pheq dơơp tôôy thưq tyauq khwuôôn anưq heq jah kahnoq ka koot tol đoot.” Bơh juneq Kadraq heq nhonq xok muuyq varơuq dơơp kôt galơh iaq taleq, Kadraq kung laa Kơy Kaplah ku muuyq tavek tolh iaq tanư, laa tavek heq jah lâp tok gamưh tol kaluh apok tavek tolh iaq. Vii atoh tavek thưq nhưk nưq heq laa leh huq aleq, yôôych kajưk dik aduq ka tavek thưq vaarq heq be jah axek hloq. Vii tuôôy đnooy toah manih karôp, Kơy Plêêk xanoh:

“Dayh 'yo nee, kaluh hngơy nưq đong truh, Lôôk xanoh:

yôôch gô hnoq dơơp payôôch muuyq tavek đơơu

dii hnhư I-sơ-ra-ên ji dii hnhư Ju-đa;

leh gamưh tyauq tavek

đơu Gô heq lâp dii khơl mo kơy ku oot

đom hngơy Gô adrơk ti oot

xôq jarooy oot vlôh klơlh vari Ai Kâp,

vii oot heq leh kưq măn đom tavek ku Gô,

Gô kung heq ka'lăk oot,

Lôôk xanoh.

Vii neq laa tavek

đơu Gô hnoq lâp dii hnhư I-sơ-ra-ên

atêq kaluh hngơy nưq,

Lôôk xanoh,

tuôôy xôq kaluh ganuun ku Gô muut xuum biit oot,

Gô kung hnoq valơk ganuun tok xuum klaak oot,

ji Gô hnoq laa Kơy Plêêk đôôyq dii oot,

ji oot hnoq laa muuyq tamooy deng ka Gô.

Kajưk dik oot hnoq be pato tong dro palơy pla oot

kung tôôy muuyq oh ay oot, đaneq: ‘Dayh nhonq xet Lôôk,’

vii dêq hloay oot hnoq xet Gô,

xing dro de dik đom oot dong truh dro kôt dik.

Vii Gô hnoq hwêêt xuum đôôyq dii kaluh varơuq xơk tauq ku oot,

ji Gô kajưk dik hnoq leh măn văch truh kadrôôp maroh ku oot đnoyq.”

Vii varơuq xanoh laa “đơơu”, yôôych Kadraq heq khienq ka tavek thưq nhưk jêêk vlôh paq xung liq, đơu varơuq biq khienq ka paq xung liq ji jêêk vlôh duut dek yôôych jeq đaji laa thưq heq hruh hlơơp.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.