Hê-bơ-rơ 11

1Xuum tuôq laa varơuq kajưk dik truh kaluh varơuq jah takôô gamưh, laa bơơn xanưk truh kaluh varơuq be hloq ik. 2Vii bơyh xuum tuôq, khơl manih hnu heq jah xanưk kaxay. 3Bơyh xuum tuôq haay nhonq xet plêêk vari neq heq jah dơơp payôôch bơyh apok xanoh ku Kơy Plêêk — xôq varơuq hloq ik heq leh jêêk yuôôr xing varơuq hnoq ik 'yo hloq. 4Vii xuum tuôq A-bên heq tơơk tưp tok Kơy Plêêk muuyq kuah lêh tolh iaq so dii Ka-in, đơu gamưh đnư kơy jah 'yo nhonq laa hyioh jăk, tuôôy Kơy Plêêk avlôh varơuq 'yo nhonq tol kaluh kuah lêh ku kơy, ji gamưh xuum tuôq, A-bên đong măn đnooy long heq kaxêêt. 5Vii xuum tuôq Hê-nok jah taway hooy, be hmưq jah xet varơuq kaxêêt, ji “kơy leh jah axek hloq, jo Kơy Plêêk heq taway kơy hooy.” Vii adroyq ka varơuq taway hooy ku kơy, kơy heq jah 'yo nhonq laa dơơp hlah xuum Kơy Plêêk. 6Anưq bơh, leh e xuum tuôq yôôych leh ik dơơp hlah xuum Kơy Plêêk, vii varơuq băt dăt đôôyq dii dro truh kung Kơy Plêêk laa pheq tuôq đaneq Kadraq hloay e ji Kadraq laa Kơy kahniq kadrool ka khơl leq axek akhiim Kadraq. 7Bơyh xuum tuôq, atêq tuôôy jah đnooy adroyq truh kaluh varơuq koq jah hloq, yôôych vii kuh yôq, Nô-ê heq đongq muuyq poop tau deng ka varơuq wơơt waak ku kôôch hnhư kơy, đơu hlê đnư, kơy heq tok xadrah dêh araak ji jêêk vlôh dro dưk katôôl varơuq hyioh jăk gamưh tol xuum tuôq. 8Bơyh xuum tuôq, vii jah tawooyh taayh, Ap-ra-ham heq tameng apok xôq vlôh hooy truh aduq đơu kơy hnoq nhonq dơơp kơ ngiip, ji kơy heq vlôh hooy tuôôy leh xet kơy đong hooy maleq. 9Bơyh xuum tuôq, kơy măn hlê đom vari tavek đaji tamooy kadrơy, tuôôy heq riirh đom pơ raap dii I-sak ji Ja-kôp, khơl manih achung dưk katôôl ku kung muuyq apok tavek, 10Vii kơy măn takôô muuyq theng e kahnier, đơu Kienq Truk Sư ji Manih Xơy Tok ku theng nưq laa Kơy Plêêk. 11Bơyh xuum tuôq, pheq đnooy kadih Sa-ra heq nhonq jah paraat xôq măn bonq hloay kaah tuôôy heq qwaq kawat 'yo tamuut ku tuuyh, vii mo 'yo nhonq Kơy heq tavek laa jư apok.1 12Vii anưq, kung xing aduq muuyq dro — ji ju biq 'yo đaji kaxêêt yôôch — kaluh đơơy koot xau heq jah pa iir vlôh, đaji kasôôq 'ngưng karôp đaji kaluh xalok tol plêêk, ji đaji choah leh hnoq jauq ik pi gah tahli. 13Đom xuum tuôq, dêq hloay khơl manih neq heq kaxêêt tuôôy koq nhonq jah kaluh apok tavek, bơh 'yo hloq ji hrok kôô ni xing xangưưy, kung xưng đaneq oot laa tamooy kadrơy ji tamooy charôô dêh tol vari. 14Vii khơl manih đnooy kaluh varơuq đanưq ăm hloq ro đaneq oot đong axek akhiim muuyq dêh katu. 15Atoh oot văch truh dêh katu đơu oot heq xing đnư vlôh hooy, yôôych kajưk dik laa oot heq e kawah xôq wiit xuq. 16Bơh juneq oot thier trôôch muuyq aduq tolh kaxay iaq, nưq laa dêh katu tol plêêk. Jo nưq Kơy Plêêk leh kamưưl truh oot, xôq jah xưng laa Kơy Plêêk ku oot, vii Kadraq heq ralauq xôq muuyq theng ka oot. 17Vii xuum tuôq, Ap-ra-ham tơơk tưp I-sak tuôôy chiuq thư, pheq đnooy atêq tuôôy nhonq jah kaluh apok tavek, kơy heq taway tơơk tưp koot kanau vơ muuyq ku kơy, 18đơu truh koot nưq, e apok xanoh đaneq: “Gamưh I-sak, adrơơk ku koot hnoq jah taayh anơng,” 19vii heq biit kajưk đaneq Kơy Plêêk e qwuyen dơơp ăm riirh hlê, kê kaah xing aduq kaxêêt, ji đom iq bongq, kơy heq nhonq hlê koot kơy xing aduq nưq. 20Kung bơyh xuum tuôq, I-sak apôôy vanong ka Ja-kôp ji Ê-sau truh kaluh varơuq hnoq xalih truh. 21Bơyh xuum tuôq, tuôôy jeq kaxêêt, Ja-kôp chuk vanong ka tong koot kanau ku Jô-sep, ji ganưq muut akoq gay katôôlh kơy, kơy kul takuul ayuôôt laat. 22Bơyh xuum tuôq, tuôôy truh lôôch đơơy, Jô-sep panhăk văch truh varơuq vlôh hooy ku koot xau I-sơ-ra-ên ji đnooy dăt oot truh khiêk ku kơy. 23Bơyh xuum tuôq, atêq tuôôy jah pa iir vlôh, Môi-se heq jah miq vaq kơy xagook padu đom pe xiêk vii oot hloq oh de kaxay tamaq, ji oot leh yôq apok tanưưl ku vuua. 24Bơyh xuum tuôq, tuôôy heq kôt, Môi-se chôôyq ka'lăk jah taayh laa koot kanau ku koot kadrê Pha-ra-ôn. 25Tađôôy muut đnư, kơy rơơlh chiuq pơơl kung dii koot xau Lôôk iaq laa jah xa hôôch taamq bơq ku kadrôôp maroh. 26Kơy 'yo hloq varơuq đnooy ra ơơh ku manih jah para jơu laa varơuq karoh e kôt galơh iaq kaluh garuh anôôp ku Ai Kâp, vii kơy 'yo kach ranih muut wih truh phon kadrool ku kơy. 27Bơyh xuum tuôq, kơy vlôh klơlh Ai Kâp, leh yôq đơơt jaraq ku vuua, vii kơy kajưk xuum chiuq uunq dang đaji đong 'yo hloq Kơy leh hloq ik. 28Bơyh xuum tuôq, kơy jư Lêh Dalơh Hlê ji varơuq ta'nhơyh vahaap, xôq kơy păk kaxêêt dêq khơl koot ay kaa leh đuk truh manih karôp. 29Bơyh xuum tuôq, manih karôp hooy tapa hlê Tahli Dôôp dang đaji dalơh hlê vari kateh, laa aduq đơu manih Ai Kâp heq biq luôôt apoop atêq tuôôy vlôh dêq paraat dơơp. 30Bơyh xuum tuôq, kaluh apưt theng Jê-ri-kô hrưp pôôt, atêq tuôôy biq hooy rawiit tuôôt pơh hngơy. 31Bơyh xuum tuôq, mư xakwoah Ra-hap leh kaxêêt achung kung khơl adro leh tuôq, atêq tuôôy tiip đoonq khơl dro hooy xoak dii xuum hlah hlaak. 32Ji Gô hnoq ik đnooy athêêp varơuq kajoq đnoyq? Vii kawat hnoq leh đu ka gô tuôôy taboon hlê truh Gê-đê-ôn, Ba-rak, Sam-sôn, Jep-thê, Đa-vik, ji kaah Sa-mu-ên hloay khơl hnhư hlit, 33laa khơl manih, gamưh xuum tuôq, heq jah jay kaluh daak, dưk dơơp hyioh jăk, nhonq jah apok tavek, biik huuy ôô vomq, 34kajôp poch paraat kalh ku ôôlh, xaloot klơlh pla xieh, jah kalh paraat xing aduq ravoch, jah yuôôr kalh paraat đom tahmơt jăk, khienq ka kaluh bing kuun daak kadrơy pheq tameng tyauq. 35'Ngưng khơl kadrê nhonq hlê manih hnhư heq kaxêêt ku oot xing varơuq riirh hlê, bơh khơl manih kadrơy biq hmơt tiel, leh biit takôô varơuq luh tha, xôq oot hnoq ik jah nhonq varơuq riirh hlê tolh kaxay iaq; 36măn sôôq kadrơy đnoyq heq chiuq thưh thek xing kaluh apok đnooy ra ơơh ji tu tiel, đơu iaq anưq đnoyq laa kal vek ji karuk tu. 37Oot biq tiip phơu, biq akưa vaarq, oot chiuq thưh thek, kaxêêt bơyh pla xieh păk kaxêêt, oot hooy kađneng kahơ đom kađuh trưưu, kađuh vove, biq pangoot adrah, biq rôp toop, biq xa dơơp ra ơơh;2 38(đơu dêh araak yôôych be taxưngq dii oot), biq jarooy hooy hyaak hyul đom wăngq we, đoot gôk, kaluh kôôp troop ji hôôm raluk 'laarq vari. 39Ji atêq tuôôy jah xanưk kaxay vii kơq xuum tuôq, dêq hloay khơl manih neq koq nhonq hlê apok tavek ka oot, 40vii Kơy Plêêk heq ralauq 'miêh varơuq tolh iaq tajinq truh haay, xôq ka leh e haay, oot leh jah dơơp ăm xaleep.