Cua Bible Literal Text
Hê-bơ-rơ 10
Vii ganuun — tuôôy vơ e long lơuq ku kaluh varơuq tamaq kaxay jeq truh, leh aalq kadih long lơuq ku kaluh varơuq nưq — leh hmưq e 'leq hnoq ik dơơp xaleep khơl leq truh jeq Kơy Plêêk dii kung kaluh ôq lêh đơu oot kưq tuôôt dơơp xagook tơơk tưp tôôy xanưm. Vii atoh hnoq ik, yôôych be aalq kaluh ôq lêh dik laa heq padơy jah tơơk tưp tok, vii khơl manih ayuôôt laat leh măn pơq xuum klaak kadrôôp maroh đnoyq, tuôôy heq jah 'nhaau xarêh muuyq yưk đu hloay be aalq? Wih hlê, dii kaluh ôq lêh nưq, e muuyq varơuq hmưk nhăk truh kadrôôp maroh tôôy xanưm. Vii vahaap ku bo pôô ji vove pôô leh ik ka'lăk kadrôôp maroh hlơơp ik. Jo nưq, tuôôy muut đom dêh araak, Kadraq xanoh:
“Lôôk leh trôôch ôq lêh ji kuah lêh,
bơh Kadraq heq ralauq 'miêh muuyq xăk xamơk ka Koot;
Kadraq kung be ưng trôôch
kaluh kuah lêh vuh ji wơơt kadrôôp.
Atêq nưq, gô tơơl: ‘Xiin 'yo neq, koot truh —
tyauq đaji apok đom phon qwuônq rahlăp heq valơk truh koot —
xôq dưk dơơp xuum trôôch ku Kadraq, kuh Kơy Plêêk.’”
Tuôôy Kadraq xanoh đaji heq đnooy đaneq: “Lôôk leh trôôch ôq lêh ji kuah lêh, kung kaluh kuah lêh vuh ji wơơt kadrôôp. Kadraq kung be ưng trôôch kaluh thưq nưq” (đơu kaluh nưq jah tơơk tưp tok tyauq ganuun), atêq nưq, Kadraq xanoh: “Xiin 'yo nee, Koot truh xôq dưk dơơp iq trôôch ku Kadraq.” Kadraq deep ka'lăk varơuq thưq yưk xôq dơơp avlôh varơuq thưq vaarq. Vii iq trôôch nưq, haay neq heq jah tađôôy đơơu gamưh varơuq tơơk tưp xăk xamơk ku Lôôk Wơơt Dêh Jê-xu dơơp ôq lêh muuyq yưk đu hloay. Dik, tôôy muuyq thơy tơơk tưp tôôy hngơy dưk dơơp hơu varơuq ji ragơy tưp kung kaluh ôq lêh, đơu kaluh nưq leh hmưq e 'leq hnoq ik xagook ka'lăk kadrôôp maroh hlơơp ik. Bơh Kadraq, atêq tuôôy vii kơq kadrôôp maroh tưp ôq lêh muuyq heq dong truh miet miet, yôôch heq 'ngôôy aduq pi akoh Kơy Plêêk, takôô xing katuôôy nưq dong truh tuôôy khơl adro tachơơl Kadraq biq xôq pôôt dơơp aduq đơ ka jôôk Kadraq. Vii gamưh vơ muuyq ôq lêh, Kadraq heq khienq khơl manih jah tađôôy đơơu jêêk vlôh xaleep dong truh miet miet. Măn Lôôk Phool Hiel kung dơơp xanưk ka haay, vii atêq nưq heq xanoh:
“Neq laa tavek đơu Gô hnoq lâp dii oot
atêq kaluh hngơy nưq, Lôôk xanoh,
tuôôy xôq ganuun Gô đom xuum klaak oot,
Gô kung hnoq valơk ganuun tol akoq biit oot.”
Ji:
“Gô kajưk dik hnoq leh măn văch truh kadrôôp maroh oot
ji kaluh varơuq xơk tauq ku oot đnoyq.”
Bơh aduq leq e varơuq tha ka'lăk kaluh lôp kadrôôp nưq, aduq nưq paq măn ôq lêh bla kadrôôp.
Vii anưq, wơơy oh ay, vii e jah xuum kôk kalh ka varơuq tawaak muut kaluh aduq vah gamưh vahaap ku Lôôk Jê-xu, laa Kơy heq luh vlôh ka haay muuyq trôôk hooy đơơu ji riirh hlulh hlê bơk maang, 'ngưq laa xăk xamơk Kadraq, ji muuyq thơy tơơk tưp kôt xakaq 'yo tol hnhư ku Kơy Plêêk, vii anưq haay duh truh jeq Kơy Plêêk dii xuum klaak dong dik đom varơuq hôôk kajưk ku xuum tuôq, xuum jah ta'nhơyh vahaap paxa rêh klơlh xuum klaak xơk tauq ji xăk xamơk jah 'nhaau bơơn daak hlăng xarêh. Haay duh jư kajưk apok đnooy avlôh truh xuum takôô gamưh ku haay leh varaal hwaal, vii Kơy heq tavek laa jư apok. Ji haay duh biit tabông truh mamuuyq xôq wih truh varơuq ahluk ahlul xuum xung xiaq ji kaluh varơuq tamaq kaxay, tuôôy leh ka'lăk varơuq nhomq hlê kung mamuuyq ku kadih haay đaji katik đôôyq dii muuyq sôôq dro, wih hlê laa ahmưk nhăk mamuuyq, ji atoh oh ay hloq hngơy nưq truh jeq taleq yôôych kơn dơơp anưq 'ngưng iaq tanư.
Vii atoh haay kưq ưng dơơp lôp kadrôôp atêq tuôôy heq nhonq xok varơuq hlolh xet đu truh varơuq dik, yôôych leh măn ôq lêh wơơt kadrôôp đnoyq, bơh laa varơuq takôô ramêq dik kajưk dik truh varơuq xưh xadrah ji truh ôôlh rahưk ralauq xôq vuh jaq khơl adro tachơơl hlê. Paq kê kơyq, atoh heq ka'lăk vlôh ganuun Môi-se gamưh tol vaarq long pe adro dơơp xanưk, yôôych kaxêêt hlơơp leh angơuq. Oh ay biit adro joaq jek Koot Kơy Plêêk, ji 'yo vahaap tavek laa leh ra kajoq klơơr 'yêq — đơu vii vahaap nưq, haay jah tađôôy đơu — ji đnooy ra ơơh Kơy Phool Hiel ku vanong plêêk, ni hnoq đangq biq hmơt dook parêq iaq 'ngưng xet taleq? Vii haay xet Kơy heq xanoh: “Varơuq bla dook laa ku Gô; Gô hnoq bla dook.” Ji laay đaneq: “Lôôk hnoq xưh xadrah tamooy Kadraq.” Klêh muut ti Kơy Plêêk hloay riirh laa muuyq varơuq ramêq dik!
Bơh dayh văch hlê kaluh hngơy adroyq neq, đơu heq jah luh laak đom kaluh hngơy nưq, đaneq oh ay heq chiuq muuyq đơơt tahmơt kôt lơyq ku 'ngưng varơuq jiq jiêh, tuôôy nưq yôôych chiuq kaah varơuq đnooy ra ơơh hloay rôp toop kangưưr manih karôp, măn tuôôy hơq yôôych jah jêêk vlôh manih ahlook aklah dii khơl leq biq dơơp tyauq kach nưq. Vii oh ay kung heq biit angơuq khơl manih biq karuk, ji heq đoonq nhonq katuôôy hmơt varoh garuh anôôp oh ay dii varơuq hlah hlaak, vii xet kadih oh ay e garuh anôôp tolh kaxay iaq ji măn miet. 1 Jo anưq, oh ay te liq avih ka'lăk xuum tuôq kajưk ku oh ay, laa varơuq e muuyq phon kadrool thier kôt. Vii oh ay e varơuq duh truh katik atuq xuum chiuq uunq, xôq atêq tuôôy dưk dơơp iq trôôch ku Kơy Plêêk, oh ay hnoq ik nhonq jah apok tavek.
“Vii đom măn leh xiik đnoyq,
Kơy đong truh hnoq truh, ji hnoq leh manưưn manưl.
Bơh manih hyioh jăk ku Gô hnoq riirh bơyh xuum tuôq;
măn atoh xăk xadăk luuy, yôôych phool hiel Gô be hlah xuum truh xăk.”
Bơh kadih xăk haay leh măn đom varơuq xadăk luuy truh aduq kaxêêt hlơơp, wih hlê laa đom xuum tuôq wih truh aduq xôq wơơt ku phool hiel.
Source notes (1)
- Footnote Muuyq sôôq rahlăp hnu iaq đok: Vii oh ay e xuum biit angơuq đôôyq dii gô đom tuôôy măn kong looy tooy.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.