Hê-bơ-rơ 12

1Vii anưq lunưq, đong tuôôy e muuyq đum kluk thier kôt ku 'ngưng khơl xanưk dưk rawiit haay, yôôych haay, atêq tuôôy taweek ka'lăk tôôy pơq parêq ji kadrôôp maroh klêq dơơp klơl hlê, kung duh pheq charơơk tathi jah xôq kangưưr haay dii varơuq atuq xuum, 2'yo anhinq muut Lôôk Jê-xu, Kơy Panưk Jêêk ji Kơy Dơơp Payôôch ku xuum tuôq, laa Kơy vii xuum hlah xôq kangưưr kadraq heq pơq chiuq gay charăk, 'yo leh ra kajoq varơuq đnooy ra ơơh, juneq Kadraq heq 'ngôôy aduq pi akoh ngaai Kơy Plêêk. 3Dayh atrêêk 'yo dong wêêt Kơy heq pơq chiuq varơuq tachơơl dang anưq bơyh khơl adro kadrôôp maroh wih truh oot, xôq oh ay leh galeh galal đom xuum oh ay, jarooy truh gưlh xuum.

4Oh ay heq koq tangưưr hlê truh mưk kahrôq vahaap tuôôy tahmơt tachơơl hlê kadrôôp maroh, 5đơu oh ay heq padêq hloay tawol hlơơp varơuq ahmưk nhăk, laa apok pato dăt oh ay đaji koot, đaneq:

“Koot ku gô lơơy, te 'yo ahyơơl varơuq pato dayq ku Lôôk,

kung te gưlh xuum tuôôy biq Kadraq toah;

6Vii dro Lôôk xiaq, yôôych Kadraq 'meq dook,

ji Kadraq tiel dook tôôy dro koot đơu Kadraq tiip nhonq.”

7Oh ay đong chiuq uunq đom varơuq pato dook; 'ngưq laa Kơy Plêêk đong xa dơơp dii oh ay đaji koot. Vii dro koot leq đơu vaq leh 'meq dook? 8Bơh atoh oh ay leh pheq chiuq varơuq 'meq dook, laa varơuq đơu dêq hloay koot xau heq jêêk vlôh khơl dro kung chiuq, anưq yôôych oh ay laa taleq dro koot hyaak, đơu be aalq laa khơl adro koot dik. 9Iaq đnoyq, haay e khơl vaq phon xăk ku haay, đaji khơl manih pato dook, ji haay măn 'yo vado; măn đôôyq dii Vaq phon danưng kooy, be aalq haay hnoq tameng tyauq kơn 'ngưng iaq, ji haay hnoq riirh be aalq? 10Vii ju vaq phon xăk pato dook haay đom axit hngơy tyauq varơuq 'yo đaji laa tolh dik đôôyq dii oot, bơh Vaq phon danưng kooy pato dook vii kơq taway ich lơơy ka haay, xôq jưq phon muut varơuq vah xarêh ku Kadraq. 11Tyauq tôôy varơuq pato dook đom tuôôy xalih vlôh be e veeh kajoq laa xuum hlah, wih hlê laa jiq jiêh, bơh kơn atêq, varơuq nưq vlôh raak play hrok hrol ku varơuq hyioh jăk ka khơl leq heq jah varơuq atuq xing ni. 12Vii anưq, dayh dơơp kalh paraat hlê kaluh pla ti biq galeh galal ji kaluh takuul biq ruh rooy, 13ji dayh dơơp pahyioh kaluh trôôk hooy ka jôôk oh ay, xôq dro qwe hnoq ik leh biq hyaak trôôk, đơu tađôôy muut đnư laa jah payơh.

14Dayh charơơk tyauq varơuq tagu dii tôôy dro, kung varơuq yuôôr vah, đơu leh e varơuq neq yôôych be kơyq hnoq jah 'yo hloq Lôôk, 15bơơn kach rơơt rol jư 'yo, tebe kơyq nưq tavlaayh klơlh vanong plêêk ku Kơy Plêêk, leh kheoq rayah pahlăk leq nưq vlok tok dơơp măk meel, ji 'ngưng adro hnoq ik biq klơơr 'yêq vii ni, 16tebe akơyq nưq apuq atrăp long paq duh đaji Ê-sau, laa adro vii tađôôy xok muuyq tuôông xa heq tek qwuyen ay kaa ku ni. 17Vii oh ay xet đaneq pheq đnooy atêq nưq, tuôôy ưng trôôch jah vanong kaxay, yôôych kơy heq biq khelh vlôh, jo kơy be axek jah kawah wiit xuum, long ju axek akhiim ni achung dii daak mot.

18Vii oh ay heq leh truh jeq dii varơuq hnoq ik vêq muut ik, dii ôôlh jaq rahưk, dii klôôy kamơng, dii varơuq kamơng jaluk, ji dii khiel xong xôôy 19kung dii hnưm ahna ku keeng, ji dii hnưm ahlôôk ku kaluh apok đơu khơl manih tameng heq apôôy vôôch xôq oot leh pheq nhonq athêêp muuyq apok leq đnoyq. 20Vii oot be chiuq nôôy tanưưl jah đnooy, đaneq: “Atoh koot ôô leq pheq đnooy vơ đuk muut đoot, ni hnoq biq tiip phơu.” 21Ji varơuq 'yo jah kahnoq vlôh yôôych thier ramêq pheq đnooy Môi-se heq đnooy: “Gô varaal hwaal ji vadrau vadrik.” 22Lunư, oh ay heq truh dii Đoot Si-ôn ji theng ku Kơy Plêêk hloay riirh, dii Jê-ru-sa-lem tol plêêk, dii karavơu yaak plêêk, dii tayuup anguk kôt, 23dii tayuup vah ku khơl koot ay kaa heq jah valơk anơng tol kaluh tal plêêk, dii Kơy Plêêk laa Kơy Xưh Xadrah ku tôôy dro, dii kaluh yaak ku khơl manih hyioh jăk heq jah dơơp ăm xaleep, 24dii Lôôk Jê-xu, Kơy Kaplah ku tavek đơơu, ji dii vahaap ku varơuq ahngok vlôh e apok đnooy kalh paraat iaq so dii A-bên. 25Dayh 'yo rơơt, tebe oh ay chôôyq ka'lăk Kơy đong xanoh pato. Vii atoh khơl adro hơq heq leh xaloot ik atêq tuôôy chôôyq ka'lăk manih đnooy panhăk oot măn 'laarq vari, yôôych haay kơn têq iaq đnoyq, tuôôy laa khơl adro wih katoor dii Kơy vlôh xing plêêk, 26đơu apok ku Kơy nưq heq dơơp vari anhưh ahrưng muut kawat nưq, măn juneq Kadraq heq tavek đaneq: “Muuyq yưk tra kadih Gô hnoq dơơp anhưh ahrưng, leh vơ vari, đơu laa hloay plêêk.” 27Bơh kaluh apok “Muuyq yưk tra” đong pato ro varơuq deep ka'lăk kaluh thưq biq ahrưng anhưh, đaji kaluh vâk heq jah panưk jêêk, xôq ka kaluh varơuq leh biq ahrưng anhưh hnoq ik măn hlê. 28Jo nưq, haay duh e xuum xet ơơn tuôôy nhonq xok muuyq daak dêh leh ahrưng anhưh, đơu hlê đnư haay hnoq ik ayuôôt laat tyauq kach kaxay xuum Kơy Plêêk, dii varơuq kul vado hloay kul yôq, 29Vii Kơy Plêêk ku haay laa gooy ôôlh huur vuh.