Cua Bible Literal Text
Ga-la-ti 3
Wơơy, khơl manih Ga-la-ti vlô khưrq! Kơyq heq iêmh buua oh ay, tuôôy đơu kangưưr mot oh ay, Lôôk Wơơt Dêh Jê-xu chiuq đongq đing tol gay charăk heq padoh vlôh kach kahnoq hlolh? Gô vơ xung axek hlolh varơuq neq xing oh ay: Oh ay heq nhonq jah Kơy Phool Hiel xing varơuq dơơp tyauq ganuun long xing varơuq tameng tyauq đom xuum tuôq? Oh ay vlô khưrq đanưq ih? Tuôôy heq xarôp bơơn Kơy Phool Hiel, jơq be juneq oh ay đong payôôch bơơn xăk xamơk? E jơq oh ay heq chiuq xet taleq pơơl hwơơl xôq be jah kajoq? — atoh dik anưq yôôych dik laa đaji hloh! Anưq, Kơy kahniq Kơy Phool Hiel ka oh ay ji dưk dơơp kaluh varơuq taay yaak đom katul oh ay, nưq laa bơyh varơuq dơơp tyauq ganuun, long bơyh varơuq tameng tyauq đom xuum tuôq? Đaji Ap-ra-ham “tuôq gamưh Kơy Plêêk ji nưq laa varơuq xôq kơy jah 'yo laa hyioh jăk,” anưq yôôych pheq hlolh đaneq khơl leq e xuum tuôq, nưq laa koot ku Ap-ra-ham. Bơh tuôôy hloq adroyq đaneq Kơy Plêêk xưng manih daak kadrơy laa hyioh jăk vii xuum tuôq, yôôych Rahlăp Vah heq pato dayq Hêêl Kaxay adroyq ka Ap-ra-ham đaneq: “Tôôy tamooy hnoq jah vanong aduq koot.” Lunưq, kơyq e xuum tuôq yôôych jah vanong kung dii Ap-ra-ham, manih e xuum tuôq. Xet taleq manih gamưh muut varơuq dơơp tyauq ganuun yôôych măn 'laarq apok karoay axaap; vii e valơk đaneq: “Đangq karoay axaap tôôy adro leh kajưk xuum dii tôôy varơuq jah valơk đom rahlăp ganuun xôq dưk dơơp ni.” Bơh ro raang đaneq be e kơyq gamưh ganuun jah xưng hyioh jăk kangưưr Kơy Plêêk, vii “manih hyioh jăk hnoq riirh bơyh xuum tuôq.” Măn ganuun yôôych leh vlôh xing xuum tuôq, bơh “Manih dơơp kaluh varơuq ku ganuun hnoq riirh gamưh ni.” Lôôk Wơơt Dêh heq root haay klơlh varơuq karoay axaap ku ganuun tuôôy chiuq karoay axaap thêq ka haay — vii e apok valơk: “Đangq karoay axaap adro leq biq kađnok tol gay charăk” — xôq vanong kaxay ku Ap-ra-ham truh dii manih tamooy kadrơy đom Lôôk Wơơt Dêh Jê-xu, xôq ka haay hnoq ik nhonq jah apok tavek truh Kơy Phool Hiel gamưh xuum tuôq.
Wơơy oh ay, gô đnooy tyauq kach koot manih. Ju đaleq, be ekơyq hnoq ik pahyaak ka'lăk long athêêp muut tavek heq jah khơl drơy dơơp vlôh. Panưh kadrơy, kaluh apok tavek yôôych heq jah xanoh dii Ap-ra-ham ji ka koot xau ku kơy. Apok nưq leh đnooy “ji ka khơl koot xau” đaji pato truh 'ngưng manih, bơh laa “ji ka koot xau ku koot” đaji pato truh muuyq dro, đơu nưq laa Lôôk Wơơt Dêh. Bơh truh varơuq gô xung đnooy nưq laa: Tuôôy e atêq poot hreek pe kưl xanưm, ganuun leh pahyaak ka'lăk tavek heq jah Kơy Plêêk dơơp vlôh adroyq nưq xôq dơơp paq ik xung liq apok tavek. Vii atoh kơ ngiip truh xing ganuun, yôôych kơ ngiip nưq paq măn laa xing apok tavek. Bơh Kơy Plêêk heq kahniq vanong ka Ap-ra-ham gamưh hlê apok tavek. Anưq yôôych, ganuun xôq dơơp kajoq? Ganuun heq jah athêêp muut vii kơq kaluh varơuq gưlh lôp, atêq tuôôy jah kahniq ăm xing khơl yaak plêêk gamưh ti ku muuyq manih măn katul, dong truh tuôôy leq koot xau heq truh, đơu apok tavek heq jah dơơp vlôh truh koot xau nưq. Bơh manih măn katul yôôych leh deng ka muuyq panưh, đơu Kơy Plêêk yôôych e muuyq. Anưq, ganuun hooy kaxơơlh hlê apok tavek ih? Varơuq nưq laa leh e đanưq! Vii atoh ganuun jah kahniq ăm đơu hnoq ik taway hlê varơuq riirh, yôôych kajưk dik varơuq hyioh jăk dong dik truh xing ganuun. Bơh Rahlăp Vah heq karuk jư dêq hloay 'laarq kadrôôp maroh xôq bơyh xuum tuôq aduq Lôôk Wơơt Dêh Jê-xu, apok tavek hnoq ik kahniq ka khơl manih e xuum tuôq.
Anưq bơh, adroyq katuôôy xuum tuôq nưq truh, haay 'miêh biq karuk jư 'laarq ganuun, tuôôy biq karuk dong truh tuôôy xuum tuôq jah kahnoq vlôh. Pheq đnooy, ganuun heq jêêk vlôh manih pato jarooy ku haay wih truh Lôôk Wơơt Dêh, xôq haay hnoq ik xưng hyioh jăk xing xuum tuôq. Bơh atêq tuôôy xuum tuôq truh, haay paq măn ka'laalq manih pato jarooy đnoyq. Vii dêq hloay oh ay laa koot ku Kơy Plêêk gamưh xuum tuôq aduq Lôôk Wơơt Dêh Jê-xu. Vii atoh khơl dro heq chiuq bap-tem đom Lôôk Wơơt Dêh yôôych raay hlưp xok Lôôk Wơơt Dêh. Leh măn kahra vlôh Jo Thaiq long Hi Lap, paq măn kahra vlôh xapok long rayơh rayơơy, paq măn kahra vlôh khơl kanau long khơl kadrê, vii dêq hloay oh ay laa muuyq đom Lôôk Wơơt Dêh Jê-xu. Đơu atoh oh ay laa thuôk Lôôk Wơơt Dêh, yôôych oh ay laa koot xau ku Ap-ra-ham, laa khơl dro dưk katôôl tyauq apok tavek.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.