Kông-vuq 28

1Tuôôy jah hrok hrol yôôch, yôôch tuôôy nưq 'wot 'yo xet đaneq ngok tahli neq jah taayh laa Man-tơ. 2Katuôôy, tamooy đom dêh deng ka 'wot varơuq hlah hlaak đêh xateek, vii oot heq vôôch hrok dêq hloay 'wot bơơn kach atuut ôôlh vii muuyq đơơt jit đong truh ji vii jaleek. 3Bơh tuôôy Phao-lô heq agoop jah muuyq bo kadrưp ji ahluk muut ôôlh, yôôych muuyq poop volh taweek, atêq tuôôy talôôk vlôh klơlh kachô tôq, heq qwal riit xok ti kơy. 4Tuôôy nưq, tuôôy tamooy đom dêh 'yo hloq volh qwal tol ti kơy, oot đnooy dii mamuuyq: “Manih neq chăk chănq laa dro păk kaxêêt manih, laa dro đơu long jah wơơt klơlh tahli, bơh hyioh jăk leh ăm riirh.” 5Atêq nưq, tuôôy heq ta'nhơyh volh muut ôôlh, kơy heq be e huq aleq kajoq. 6Lunư, oot 'miêh biit kơy pa xarôp biq golh ahlưng long tưng hưng gưlh kaxêêt. Bơh atêq tuôôy oot 'yo kôô heq xiit ji hloq be e kajoq lưp aleq xalih vlôh ka kơy, yôôych tuôôy heq tađôôy iq, oot đnooy kơy laa muuyq kơy yaak.

7Tuôôy nưq, măn raa wiit aduq nưq laa kaluh hluôôt vari ku kơy ja lang ngok tahli, anơng Bup-li-u, laa manih vôôch hrok 'wot, heq đoonq tiip muuyq kach hlah hlaak đom pe hngơy. 8Tuôôy nưq, varơuq xalih vlôh nưq laa vaq ku Bup-li-u đong vik lêêt tol chanưng vii biq tanget aluq kaniet, yôôych Phao-lô, atêq tuôôy hooy muut tavơh kơy ji xadrook apôôy, xôq ti tol kơy, heq paxêêk yơh ka kơy. 9Nưq yôôch, atêq tuôôy dong varơuq nưq xalih vlôh, khơl manih kadrơy tol ngok tahli biq bingq kung hooy truh ji jah paxêêk yơh, 10đơu oot kung heq kuh yôq 'wot dii varơuq kul vado thier kôt, pheq đnooy đong tuôôy vlôh tahli, oot xagook atăq 'ngưng thưq deng ka varơuq duh ku 'wot.

11Tuôôy nưq, atêq pe xiêk, 'wot vlôh tahli tol muuyq poop tau e kleh vangưl Đi-ôt-ku-ri, xing A-lek-xan-ri-a, heq măn ka oaq aduq ngok tahli. 12Tuôôy jah truh gah aduq Si-ra-ku-sơ, 'wot măn đnư pe hngơy. 13Xing nưq vlôh tahli, 'wot hooy truh Rê-gi-um, yôôch muuyq hngơy atêq, vii đơơt khiel naam puh tok, 'wot heq hooy truh Pu-tê-ô-li hngơy xatyauq atêq nưq, 14nưq laa aduq đơu atêq tuôôy tavơh muuyq sôôq oh ay, 'wot heq jah adô adeng măn hlê kung oot đom pơh hngơy, ji kưq đanưq, 'wot hooy truh Rô-ma. 15Xing nưq, tuôôy tameng hêêl truh 'wot, khơl oh ay heq hooy truh tavơh mot dii 'wot măn aduq Tabôôt Ap-bi-u ji Ba Lưh Qwuanq, tuôôy 'yo hloq oot, Phao-lô heq e jah varơuq kajưk tuôq, kuh kway Kơy Plêêk.

16Nưq yôôch, tuôôy 'wot heq muut đom theng Rô-ma, Phao-lô jah pheep măn đêh raa kơy dii muuyq dro kuun jư 'yo kơy.

17Tuôôy nưq, varơuq xalih vlôh atêq pe hngơy nưq laa kơy ăm mơơy khơl adro laa khơl padrok đom tamooy Jo Thaiq kung truh. Yôôch tuôôy oot heq tagumq hlê, kơy đnooy dii oot: “Wơơy oh ay, khơl oh ay, long be dơơp kajoq tachơơl hlê manih karôp long dok dơơp ku vaq kơy haay, bơh xing Jê-ru-sa-lem gô heq biq rôp jarooy đaji dro karuk đom ti manih La Mah, 18đơu kadih oot, atêq tuôôy 'yo vôôch gô, 'miêh đinq bla rayơh rayơơy ka gô vii be e muuyq kadrôôp đangq kaxêêt leq măn aduq gô. 19Bơh vii manih Jo Thaiq aklơ hlê, gô biq băt pheq kienq hlê tok Sê-sa — đom tuôôy be e iq kienq hlê manih dêh gô. 20Anưq, vii liq jo nưq, gô heq mơơy êêp kơy truh, xôq tavơh ji athêêk. Vii kơq xuum takôô gamưh ku I-sơ-ra-ên, đơu gô đong chiuq kal looy tooy neq.” 21Lunư, oot đnooy dii kơy: “'Wot koq nhonq jah hla thư kajoq truh kơy xing Ju-đê, kung koq e oh ay leq truh tauq boon long đnooy paq kê varơuq xơuq kajoq truh kơy. 22Bơh 'wot hloq trôôch tameng xing pi kơy kaluh kajoq kơy biit, vii truh bing ja neq, varơuq jah xet măn aduq 'wot nưq laa ni biq tachơơl aklơ loch aduq.”

23Nưq yôôch, atêq tuôôy đinq hngơy ka kơy, yôôych 'ngưng manih iaq heq truh kung kơy aduq kachô măn ku kơy, đơu xing xaroq ăm truh rayôôp klôôy, kơy padoh taboon dii oot, bơơn kach dơơp xanưk truh daak dêh Kơy Plêêk, katuôôy đnooy xok xuum oot truh Lôôk Jê-xu xing kaah ganuun Môi-se hloay kaluh rahlăp hlit. 24Long muuyq sôôq manih chiuq tuôq kaluh varơuq jah padoh boon, bơh sôôq kadrơy yôôych leh tuôq. 25Tuôôy nưq, tuôôy e varơuq lưp tagu dii mamuuyq, oot chuh hooy atêq tuôôy Phao-lô đnooy muuyq varơuq, đaneq: “Gamưh kơy hlit Ê-sai, Kơy Phool Hiel heq xanoh troq dik dii mo kơy ku êêp kơy, 26đaneq: ‘Dayh hooy truh tamooy neq ji đnooy:

“Tuôôy tameng, êêp koot hnoq tameng ik, đơu êêp koot chăk chănq leh hlolh,

ji tuôôy 'yo, êêp koot hnoq hloq, đơu êêp koot chăk chănq be hloq ik.”

27Vii xuum tamooy neq heq vlôh jêêk găk khăk,

tôôr oot dang đaji leh tameng,

ji mot oot yôôych kađniêp hlê,

leh kheoq muuyq tuôôy leq nưq, oot e hnoq hloq ik bơơn mot,

tameng ik bơơn tôôr, ji hlolh ik bơơn xuum klaak,

yôôch oot hnoq ik wiit hlê,

ji Gô hnoq paxêêk yơh ka oot.’

28Vii anưq, varơuq hlolh xet pheq e aduq khơl kơy, nưq laa varơuq wơơt xok neq ku Kơy Plêêk heq jah padoh taboon ka khơl tamooy daak kadrơy, ji oot hnoq tameng.” 29[Tuôôy kơy đnooy yôôch taleq apok nưq, khơl manih Jo Thaiq vlôh xuq, e varơuq takaay tayaat diik miik katul đom oot.]

30Tuôôy nưq, kơy măn dêq vaarq xanưm đom hnhư xapo ku kơy, ji tiip đoonq dêq hloay khơl leq hooy truh kung kơy, 31tuôôy padoh taboon truh daak dêh Kơy Plêêk ji pato dayq kaluh varơuq truh Lôôk, laa Lôôk wơơt Dêh Jê-xu, dii dêq hloay xuum kôk dik, leh tavơh đơ klơl leq.