Cua Bible Literal Text
Kông-vuq 27
Tuôôy nưq, tuôôy đinq heq jah đnooy vlôh xôq ka 'wot hooy bơơn trôôk daak tahli truh I-ta-li, yôôych oot pahnăp kaah Phao-lô hloay muuyq sôôq manih tu kadrơy ka muuyq dro padrok xakaq kuun, anơng Ju-lơ, thuôk bing kuun Âu-gu-ta. Tuôôy nưq, tuôôy heq hooy tok muuyq poop tau xing A-tra-mit, đong xarôp hooy dalơh tahli truh kaluh aduq pangach tyauq A-si, yôôych 'wot jah jarooy vlôh tahli, A-ri-tak, manih theng Tê-sa-lô-ni-ka, dêh Ma-xê-đoan măn kung 'wot. Yôôch hngơy atêq, 'wot truh muut Si-đôn, katuôôy Ju-lơ, vii xa dơơp dii Phao-lô thier kaxay xuum, heq ăm pheep kơy truh dii khơl 'wơyq xôq e jah varơuq văch xiap ku oot. Xing aduq nưq, atêq tuôôy vlôh tahli, 'wot ăm tau truh jeq ngok tahli Chip-rơ bơh vii khiel đong klôôp kaxơơlh. Katuôôy, atêq tuôôy dalơh hlê dêh tahli pangach tyauq Si-li-si ji Bam-phi-li, 'wot heq truh muut Mi-ra, thuôk Li-si. Măn đnư, vii padrok xakaq kuun axek jah muuyq poop tau xing A-lek-xan-tri e yưk hooy truh I-ta-li, lunưq kơy jarooy 'wot tok tau nưq. Nưq yôôch, tuôôt 'ngưng hngơy hooy manưưn ji tuôôy heq truh jeq Kơ-nit muuyq kach thier pơơl hwơơl, yôôych vii khiel leh ăm pheep 'wot truh jeq iaq đnoyq, 'wot heq ăm tau truh jeq ngok tahli Kơ-rêt, ta hyioh Sa-môn. Yôôch kưq hooy pi gah dii ngok tahli nưq muuyq kach pơơl hwơơl, 'wot hooy truh muuyq aduq hơq jah taayh laa Mih Kangh, aduq neq măn jeq theng La-sê.
Bơh vii heq hlơơp thier 'ngưng kawat, ji yưk hooy nưq yôôych heq vlôh jêêk ngwi hiêmh vii pheq đnooy heq dêq tuôôy deek xa hlơơp yôôch, lunưq Phao-lô ahmưk nhăk, tuôôy đnooy dii oot, đaneq: “wơơy oh ay, gô hloq đaneq yưk hooy neq hnoq pheq tavơh dii tôônq hư ji 'ngưng hlơơp hlăp, leh vơ truh kông haang ji poop tau, đơu măn xăk riirh ku haay đnoyq.” Bơh padrok xakaq kuun jah xok xuum bơyh dro charơơk tau ji kôôch tau iaq laa kaluh apok jah Phao-lô đnooy vlôh. Lunư, vii kangh leh hơơp măn hlê đom muua ka oaq, lunưq 'ngưng adro heq đnooy vlôh iq đinq vlôh tahli xing aduq neq, atoh bơơn kach leq nưq, yôôych oot hnoq ik truh măn aduq Phê-nit, muuyq kangh aduq Kơ-rêt, 'yo tyauq ngưưr tâây naam ji tyauq ngưưr tâây băk, xôq măn hlê muua ka oaq. Tuôôy nưq, tuôôy khiel naam klôôp hơơy, vii biit heq ik jah muk đik, lunưq atêq tuôôy vưyq neeo, oot ăm tau charơơk pangach tyauq gah, truh jeq ngok tahli Kơ-rêt. Bơh be xiik atêq, muuyq đơơt khiel puh kaxuh jah taayh laa Ơ-ra-qui-lôn, xing ngok tahli klôôp pôôt. Tuôôy nưq, tuôôy tau heq biq guôônq hooy ji leh ik tangưưr dii khiel ik đnoyq, yôôych atêq tuôôy ka'lăk tăk, 'wot biq đôôk tyauq. Bơh atêq tuôôy hooy aloh tyauq pi kađoq khiel ku muuyq ngok tahli nưq jah taayh laa Kơ-lô-đa, yôôych galeh galal dik 'wot đơơu hnoq ik e paraat jư hlê poop ge wơơt manih, laa thưq đơu tuôôy heq duuy tok, khơl drơy xok hloay kaluh talơy varưq waak raa, vek xăk tau dong kajưk. Katuôôy, Vii e yôq, xet 'leq hnoq ik măk ahyaal tol manay choah Si-rơ-tơ, yôôych tuôôy heq ăm tha neeo pôôt, oot kưq xôq biq đôôk tyauq đanưq. Bơh tuôôy 'wot biq khiel puh ra ơơh ra ơơy, yôôych muut hngơy atêq, khơl drơy pa xarôp qwel kông haang pôôt tahli ăm ahyơơl tau. Truh hngơy thưq pe, oot kadih ti qwel pôôt tahli kaluh valong đôô tol tau. Tuôôy nưq, đong tuôôy leh e mot hngơy kung be e kaluh xalok paq e đom 'ngưng hngơy, katuôôy khiel xông xôôy leh de măn đong puh ranhuq 'wot, yôôych dêq hloay takôô gamưh măn hlê aleq ka 'wot jah wơơt heq biq hlơơp dêq. Yôôch tuôôy pa ek muuyq kawat yơơt leh xa, yôôych Phao-lô, tuôôy dưk tok măn katul oot, heq đnooy:
“Wơơy oh ay, tuôôy nưq atoh heq tameng tyauq gô te vlôh tahli chuh klơlh Kơ-rêt, yôôych kung heq trengq ik tôônq hư ji hlơơp hlaak neq. Juneq, gô ahmưk nhăk oh ay kôk kalh tok, vii hnoq leh e tôônq haiq truh xăk riirh katul đom oh ay, đơu vơ hlơơp poop tau neq heq. Vii klôôy neng, muuyq yaak plêêk xing Kơy Plêêk, Kơy gô thuôk xuq ji laa Kơy gô vanê, heq dưk pi gah gô, xanoh: ‘Phao-lô, te yôq. Ay duh pheq vlôh hơu kangưưr Sê-sa, lunưq dayh 'yo hơq, bơyh xuum hwêêt Kơy Plêêk heq kahniq ka ay tôôy adro đong hooy tol yưk hooy kung dii ay.’ Vii nưq, wơơy oh ay, dayh kajưk xuum! Vii gô tuôq gamưh Kơy Plêêk, đaneq dong varơuq hnoq xalih vlôh đanưq, tyauq đaji kach heq jah tauq ka gô. Bơh haay pheq măk ahyaal ka muuyq ngok tahli leq nưq.”
Tuôôy nưq, tuôôy truh klôôy thưq kưl poot, đom tuôôy 'wot măn đong pa duôôl tol daak Tahli A-đơ-ria-tich, yôôych kawah katul mưng, khơl 'wơyq tau biit đaneq oot đong hooy jeq truh muuyq dêh vari leq nưq. Atêq tuôôy tha play wolh, oot hloq jaruq vaarq kưl plaalh, yôôch hooy athêêp muuyq kaplah xangưưy iaq, ji laay tha play wolh, oot hloq măn kưl dăp plaalh. Katuôôy, vii e yôq, xet 'leq 'wot hnoq ik ngưk muut phơu talaat aduq leq nưq, lunưq tuôôy heq tha poot vawauq neeo xing aduq hlooy tau pôôt, oot trôôch kajoq truh xaroq. Bơh tuôôy khơl 'wơyq tau axek kach klôônq hooy klơlh tau ji ăm raduk ge wơơt manih pôôt tahli, dơơp bôô đaji đinq hooy tha neeo xing akoq tau. Phao-lô đnooy dii padrok xakaq kuun ji khơl bing kuun: “Atoh khơl manih neq leh măn hlê tol tau, êêp kơy leh ik jah wơơt.” Anưq laa bing kuun goch kloh talơy varưq ku ge wơơt manih ji xôq ka ni đôôk hooy. Tuôôy nưq, dong truh tuôôy plêêk jeq vlôh tađnah hloay, Phao-lô ahmưk nhăk tôôy adro dayh xa axit tuôông xa, đaneq: “Tuôôy đong takôô dong truh hngơy neng, hngơy thưq kưl poot, oh ay măn kưq đnoyq deek xa, be chiuq xa kajoq. Anưq, gô xiin oh ay dayh xa axit tuôông xa, vii varơuq nưq laa deng ka varơuq wơơt oh ay. Vii leh kơyq đom oh ay hnoq hlơơp muuyq raq hlôôk tol akoq.” Nưq laa, tuôôy heq đnooy đanưq ji xok tôôp vlôh, kơy kuh kway Kơy Plêêk kangưưr tôôy adro, yôôch atêq tuôôy pleelh tôôp vlôh, kơy pa xarôp xa. Yôôch tuôôy tôôy adro e jah varơuq ahmưk nhăk, yôôch kadih oot heq xok tuôông xa. Tuôôy nưq, 'wot e dêq hloay vaarq hreek pơh kưl drơu dro tol tau. Ji yôôch, tuôôy jah phiq klaak dii tuôông xa yôôch, oot dơơp ahyơơl tau, bơơn kach qwel va qwaay pôôt tahli. Tuôôy nưq ajơ plêêk heq xaroq, oot leh nhonq vlôh dêh vari nưq, bơh oot đơơu hloq muuyq poop dêh nưq e manay choah tahli, laa aduq đơu oot tajauq 'yo hnoq ik laayq tau muut ik be. Goch ka'lăk neeo yôôch, oot xôq hlê 'laarq tahli. Katuôôy, atêq tuôôy luh talơy benh laayq ji tơơk buông măn akoq tau, yôôych tyauq ngưưr khiel, oot jư ka tau kahluh hyioh truh manay choah tahli. Bơh tuôôy đuk ka aduq vaarq alook daak tavơh mamuuyq yôôych tau măk ahyaal, ji vii akoq tau măk găk măn đnư, tau kưq leh anhưh hrưng kajoq ik, măn hlooy tau yôôych biq pôh padah naat bơyh ranaq kalh. Tuôôy nưq, iq đinq ku bing kuun laa dơơp aleq xôq oot păk kaxêêt khơl tu karuk, e đaneq kơyq nưq e hnoq xaloot gamưh jalôôy hooy hlơơp. Bơh vii xung wơơt Phao-lô, padrok xakaq kuun heq klơl hlê iq đinq ku oot, Katuôôy kơy đnooy dăt ka khơl leq xet jalôôy adroyq dik kalong vlôh klơlh tau xôq jalôôy muut vari, ji khơl manih măn hlê, taleq dro neq katuk muut kaluh tômq tapaat, măn sôôq manih hơq xok kaluh thưq kadrơy xing xăk tau, yôôch tyauq kach nưq, varơuq xalih truh ka dêq hloay 'wot laa jah xagook muut vari kach hrok hrol.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.