Kông-vuq 26

1Nưq yôôch, vuua Ak-rip-ba đnooy dii Phao-lô: “Kơy jah pheep xôq đnooy vlôh truh xăk.” Muut tuôôy neq, atêq tuôôy tơơk ti vlôh, Phao-lô kadih đnooy tagêh, đaneq:

2“Kuh vuua Ak-rip-ba, apiq truh tôôy varơuq đơu gô biq rôp kadrôôp xing manih Jo Thaiq, gô hloq gô dik tơơl dal tuôôy jeq kadih bing ka gô kangưưr vuua hngơy neng, 3nhưk laa vii vuua laa manih hlolh xet dêq hloay kaluh dok dơơp ji hloay kaluh dong varơuq tagay takaay tayaat katul đom manih Jo Thaiq. Lunưq gô xiin vuua atuq xuum tameng gô. 4Dik anưq, tôôy adro Jo Thaiq raay xet kach riirh ku gô xing tuôôy măn de, xalih vlôh xing tuôôy kapa tep katul đom tamooy gô kung đaji aduq Jê-ru-sa-lem, 5vii heq xet adroyq truh gô xing adroyq, lunưq atoh oot e xuum xôq dơơp xanưk, yôôych nưq laa gô heq riirh tyauq bing ja leh hlơu klêq đom đaauq ku 'wot, laa bing ja Pha-ri-si. 6Juneq, gô dưk đnen chiuq xưh xadrah laa vii xuum takôô gamưh aduq apok tavek Kơy Plêêk heq lăp dii kơl mo kơy ku 'wot, 7laa apok tavek đơu kưl vaarq adrơơk 'wot đom varơuq talăng jăk, đong takôô xôq nhonq jah, tuôôy ayuôôt laat Kơy Plêêk hngơy ji klôôy. Kuh vuua, jơq vii xuum takôô gamưh nưq, gô đong biq rôp kadrôôp xing manih Jo Thaiq. 8Atoh Kơy Plêêk khienq manih kaxêêt riirh hlê, vii aleq varơuq nưq biq 'yo laa varơuq leh hnoq tuôq ik katul đom oh ay? 9Dik anưq, gô heq kadih biit duh pheq dưk dơơp 'ngưng kach tachơơl đôôyq dii yal Jê-xu Na-xa-ret, 10laa kaluh varơuq đơu gô heq dơơp hloay kaah măn Jê-ru-sa-lem, gô pheq đnooy măn rôp karuk 'ngưng dro khơl vah muut karuk atêq tuôôy nhonq jah qwuyen xing khơl thơy tơơk tưp kôt, ji hloay ajơ oot biq păk kaxêêt, yôôych gô heq viet phiuq ưng anưq. 11Tuôôy ragơy hmơt dook oot đom kaluh hnhư hơu, gô heq ahnanh dăt oot pheq katơơk galơh, katuôôy vii tôq jaraq oot paq ik, gô pheq đnooy heq hooy rôp toop oot dong truh hloay kaluh theng daak kadrơy, 12đơu đom kaluh varơuq rôp toop nưq, đong tuôôy hooy trôôk truh Đa-mach kung dii qwuyen ji varơuq dơơp xing khơl thơy tơơk tưp kôt, 13yôôych kuh vuua, tuôôy katul mot hngơy dưk, tol trôôk hooy, gô 'yo hloq xaraar tađnah xing plêêk, xaraar ah iaq hloay mot hngơy, jaraak ahnhe rawiit gô ji khơl adro đong hooy achung dii gô. 14Katuôôy, atêq tuôôy dêq hloay 'wot gưlh pôôt vari, gô tek muuyq apok đnooy xanoh dii gô bơơn apok Hê-bơ-rơ: ‘Sau-lơ, Sau-lơ, aleq koot rôp toop Gô? Dik leh tơơl dal ka koot tuôôy heq đa muut nok 'mooch.’ 15Atêq nưq, gô tơơl: ‘Kuh Lôôk, Kadraq laa kơyq?’ Yôôch Lôôk xanoh: ‘Gô laa Jê-xu, Kơy đơu koot đong rôp toop. 16Lunư, dayh dưk tok ji dưk hyioh tol jôôk koot, vii xing varơuq neq đơu Gô heq rama vlôh dii koot, xôq pato đinq koot dơơp xapok ji manih xanưk hloay truh kaluh varơuq koot heq hloq aduq Gô, hloay kaluh varơuq Gô hnoq kahnoq ka koot, 17tuôôy wơơt koot klơlh tamooy koot ji klơlh kaluh tamooy daak kadrơy đơu Gô patăk koot truh, 18xôq luh mot oot, xôq ka wih klơlh kamơng jaluk wih truh xaraar tađnah, ji klơlh qwuyen lưk ku Sa-tan truh kung Kơy Plêêk, xôq oot nhonq xok varơuq tha ka'lăk kadrôôp maroh, kung kơ ngiip katul đom khơl manih heq jah pa xarêh xing xuum tuôq aduq Gô.’ 19Vii anưq, kuh vuua Ak-rip-ba, gô heq be hôôk leh tameng đôôyq dii varơuq ăm hloq adroyq xing plêêk nưq, 20wih hlê, adroyq dêq gô heq padoh taboon ka khơl manih aduq Đa-mach, yôôch dêq aduq Jê-ru-sa-lem, hloay loch dêq dêh Ju-đê, kung ka khơl tamooy daak kadrơy, pheq wiit xuum ji wiit xuq kung Kơy Plêêk, dưk dơơp kaluh varơuq taxưngq dii xuum wiit xuum nưq. 21Vii kơq kaluh varơuq nưq, manih Jo Thaiq, atêq tuôôy rôp jư gô đom hnhư hơu, kưq axek kach păk kaxêêt gô. 22Anưq, gamưh nhonq jah varơuq wơơt waak xing Kơy Plêêk dong truh hngơy neng, gô heq dưk tok, dơơp xanưk vơơ ka adro de, vơơ ka khơl kôt, leh đnooy kajoq đêh iaq kaluh kajoq đơu dêq khơl hnhư hlit hloay Môi-se heq đnooy laa xarôp xalih vlôh — 23đaneq Lôôk Wơơt Dêh jah đinq pheq chiuq pơơl, ji vii laa manih adroyq dêq vlôh xing varơuq riirh hlê ku khơl adro kaxêêt, Kadraq hloay hnoq đnooy vlôh varơuq tađnah dêq ka tamooy dêh 'wot hloay kaluh tamooy daak kadrơy.”

24Tuôôy nưq, tuôôy kơy đong kadih đnooy tagêh bơơn kaluh varơuq neq, Phê-tu đnooy kalh xarooy đaneq: “Kơy adruôy yôôch, Phao-lô lơơy! Varơuq xa hok 'ngưng qwaq dơơp kơy jêêk adro ta'ngơk.” 25Bơh Phao-lô đnooy: “Gô leh adruôy 'leq, wơơy kadraq Phê-tu đangq vado, wih hlê gô đong đnooy kaluh apok dong dik ji talăng jăk. 26Vii kơy vuua xet truh kaluh varơuq neq — gô pheq đnooy kôk dik tơơl dii kadraq — bơyh gô tuôq kajưk be muuyq varơuq leq đom kaluh varơuq neq padu ik kơy vuua, vii dong varơuq nưq yôôych heq leh hmưq ik dưk dơơp măn đom kamơng jaluk leq nưq. 27Kul vuua Ak-rip-ba, vuua tuôq khơl hnhư hlit be? Gô xet đaneq vuua tuôq.” 28Bơh Ak-rip-ba dăt Phao-lô: “Kơy đong xok xuum gô xôq vlôh jêêk khơl tuôq Kơ Đôk đom kawat lêq ih?” 29Bơh Phao-lô tơơl: “Dik laa gô apôôy vôôch Kơy Plêêk, long đom kawat lêq long yơơt, leh vơ vuua, đơu măn dêq hloay khơl leq tameng gô hngơy neng jah vlôh jêêk kung muuyq dang đaji gô đong e, đêh vlôh taleq looy tooy neq.”

30Yôôch vuua dưk tok, kung dii padrok dêh, kaah mo Bê-rê-nit hloay khơl manih đong 'ngôôy dii oot, 31ji atêq tuôôy chuh hooy, oot tajauq dii mamuuyq, đnooy đaneq: “Manih neq be dơơp kajoq đangq kaxêêt long rôp tu.” 32Yôôch Vuua Ak-rip-ba đnooy dii Phê-tu: “Manih neq 'miêh hnoq ik jah tha, atoh kơy nưq heq be kienq hlê tok Sê-sa.”