Kông-vuq 25

1Anưq, tuôôy heq truh nhonq chưk đom dêh, yôôych pe hngơy atêq Phê-tu hooy tok xing Sê-sa-rê truh Jê-ru-sa-lem. 2Katuôôy, Khơl thơy tơơk tưp kôt ji khơl adro dưk ưk đom tamooy Jo Thaiq vlôh kahnoq kangưưr kơy tachơơl hlê Phao-lô ji oot apôôy taayh kơy, 3tuôôy xiin muuyq vanong tachơơl dii Phao-lô, nưq laa padrok dêh hnoq ik ăm mơơy taayh Phao-lô tok Jê-ru-sa-lem, đom tuôôy ralauq xôq vih karauq xôq păk kaxêêt kơy tyauq trôôk. 4Atêq nưq, Phê-tu tơơl hlê đaneq Phao-lô yôôych đong biq karuk aduq Sê-sa-rê, măn kadih xăk kơy yôôych jeq pheq dayh dayh dưk hooy. 5Kơy đnooy: “Vii anưq, khơl manih dưk xanok katul đom êêp kơy, atêq tuôôy kung pôôt đnư, atoh e varơuq kajoq be troq aduq manih neq, yôôych oot dayh rôp kadrôôp kơy nưq.”

6Tuôôy nưq, tuôôy heq măn dii oot leh 'ngưng iaq thơơm long kưl hngơy, kơy nưq hooy pôôt truh Sê-sa-rê. Hngơy atêq, atêq tuôôy 'ngôôy muut ragê xưh xadrah, kơy nưq dăt ăm Phao-lô jah jarooy vlôh. 7Nưq yôôch, tuôôy kơy heq truh,khơl manih Jo Thaiq 'miêh xing Jê-ru-sa-lem pôôt heq dưk rawiit kơy, đnooy vlôh 'ngưng apok rôp kadrôôp parêq parơh đơu oot leh hnoq dơơp xanưk ik, 8đom tuôôy Phao-lô kadih đnooy tagêh đaneq: “Gô be lôp paq kê kadrôôp leq tachơơl hlê ganuun ku manih Jo Thaiq, leh tachơơl hlê hnhư hơu, kung leh tachơơl hlê Sê-sa.” 9Bơh vii xung xok xuum manih Jo Thaiq, Phê-tu tơơl apok Phao-lô đaneq: “Kơy e trôôch, atoh hooy tok Jê-ru-sa-lem, xôq chiuq xưh xadrah ka đnư kangưưr gô truh kaluh varơuq neq be?” 10Lunưq, Phao-lô tơơl: “Gô đong dưk kangưưr hnhư xadrah ku Sê-sa, laa aduq duh ka gô pheq chiuq xưh xadrah. Gô be dơơp varơuq kajoq dơơp ra ơơh ka manih Jo Thaiq, đaji kadraq kung xet thier hlolh. 11Anưq, atoh gô dơơp ra ơơh ji heq dơơp varơuq kajoq đangq kaxêêt, yôôych gô be xiin ăm klơlh kaxêêt. Bơh atoh leh kadrôôp leq măn đom sôôq kaluh kajoq oot rôp xadrah gô, yôôych leh kơyq hnoq ik palo gô ka oot. Gô kienq hlê truh Sê-sa.” 12Atêq nưq, tuôôy heq tajauq dii tayuup karôp kôq vânq, Phê-tu tơơl apok: “Kơy heq kienq hlê tok Sê-sa. Kơy hnoq hooy truh Sê-sa!”

13Tuôôy nưq, atêq tuôôy ratơh hlê taleq hngơy, vuua Ak-rip-ba ji mo Bê-rê-nit heq hooy pôôt truh Sê-sa-rê, vôôch hlơq Phê-tu. 14Yôôch đom tuôôy khơl kơy nưq măn đnư 'ngưng hngơy, Phê-tu padoh hlê ka vuua kaluh dong varơuq truh Phao-lô, đaneq: “Adro khơl kanau hơq laa muuyq dro tu jah Phê-lit xôq hlê, 15đơu truh manih neq, khơl thơy tơơk tưp kôt ji khơl draq lơơk manih Jo Thaiq heq atăq rôp xadrah, tuôôy gô măn aduq Jê-ru-sa-lem, đooy xưh xadrah tachơơl dii kơy nưq. 16Gô heq tơơl apok dii oot đaneq tyauq ganuun ku La Mah laa leh atăq noop adro leq adroyq tuôôy adro biq rôp kadrôôp hnoq ik tangưưr mot dii khơl adro rôp xadrah, katuôôy nhonq jah kawah kadih đnooy tagêh truh varơuq rôp kadrôôp nưq. 17Vii anưq, tuôôy heq ka uua mamuuyq truh đnen, leh tagay vlôh takiêh tahyơq hlê 'leq, yôôych hngơy atêq, tuôôy 'ngôôy muut ragê xưh xadrah yôôch, gô dăt ka adro nưq jah jarooy muut, 18đơu apiq truh adro rôp kadrôôp, atêq tuôôy khơl adro rôp kadrôôp jah ăm dưk tok, oot heq leh ăm hloq apok rôp kadrôôp leq đaji kaluh kadrôôp xơk đơu gô biit. 19Tađôôy muut đnư, oot e muuyq sôôq takaay tayaat dii kơy nưq truh đaauq ku oot ji truh Jê-xu nưq heq kaxêêt đơu Phao-lô đnooy laa măn đong riirh. 20Nưq laa, vii leh xet chăk varơuq tayaat truh kaluh varơuq neq, gô heq vôôch kơy nưq jơq be xung hooy truh Jê-ru-sa-lem xôq jah xưh xadrah kađnư truh kaluh dong varơuq nưq. 21Bơh tuôôy Phao-lô kienq hlê xôq kơy jah jư 'yo kôô varơuq xưh xadrah ku vuua, gô heq vlôh tanưưl xôq kơy nưq jah jư 'yo dong truh tuôôy gô hnoq ik jarooy kơy nưq tok Sê-sa.” 22Yôôch Ak-rip-ba đnooy dii Phê-tu: “Kadih gô kung xung tameng manih neq.” Kơy tơơl hlê: “Hngơy dơh vuua hnoq jah tameng kơy nưq.”

23Anưq, muut hngơy atêq, tuôôy Ak-rip-ba ji Bê-rê-nit heq truh kung pheep tăk thier ra uk ra aar ji tawaak muut đom hnhư gưl dii dêq khơl xakaq kuun, hloay khơl adro tyauq tong varơuq dơơp ku theng phôq, yôôch tuôôy Phê-tu đnooy dăt, yôôych Phao-lô jah jarooy muut. 24Phê-tu đnooy vlôh: “Kuh vuua Ak-rip-ba ji dêq hloay oh ay e mot kung dii 'wot, oh ay đong 'yo hloq adro neq, laa adro đơu muuyq bing karôp manih Jo Thaiq heq kung mamuuyq waak apôôy gô, hloay măn Jê-ru-sa-lem hloay ka đnen, pariau tarok xôq leh ăm kơy nưq riirh đnoyq. 25Bơh gô xet ik kơy nưq heq be dơơp varơuq kajoq đangq kaxêêt. Lunư, vii kadih xăk adro neq heq kienq tok truh vuua, lunưq gô đinq jarooy kơy nưq hooy, 26đơu truh kơy nưq, gô be e kajoq chăk chănq xôq tauq tok ka vuua. Vii anưq, gô jarooy kơy nưq vlôh kangưưr oh ay, ji tolh iaq laa kangưưr vuua, wơơy vuua Ak-rip-ba, xôq atêq tuôôy wat vôôch 'yo neq xalih vlôh, gô e varơuq kajoq nưq đơu gô hnoq ik tauq tok. 27Vii dii gô, tuôôy rôp jarooy muuyq dro tu đơu leh đnooy vlôh kaluh kadrôôp nưq tachơơl hlê ni yôôych dik laa lưp e liq.”