Kông-vuq 24

1Tuôôy nưq, atêq dăp hngơy, thơy tơơk tưp kôt A-na-nia, kung dii taleq dro khơl draq lơơk nưq, ji hnhư tagêh Tet-tu-lu hơq heq hooy pôôt, laa khơl adro hooy truh xôq rôp xadrah kangưưr padrok dêh tachơơl hlê Phao-lô. 2Yôôch tuôôy kơy heq jah taayh truh, Tet-tu-lu pa xarôp rôp xadrah kơy, tuôôy tơơl: “Vii jah varơuq langưưp paat kôt gamưh kadraq, ji jo 'ngưng dơơp đơơu xalih truh ka tamooy neq xing varơuq 'yo xangưưy ranưh ranơơy ku kadraq, 3lunưq wơơy kadraq Phê-lit đangq vado, dêq đom tôôy varơuq hloay loch tôôy aduq, 'wot 'yo nhonq kaluh kông varơuq dơơp nưq dii dêq hloay xuum xet ơơn. 4Bơh xôq gô klơlh dơơp ngơyq kadraq athêêp 'ngưng iaq, gô xiin kadraq, dii varơuq atuq xuum ku kơy, tameng 'wot padoh lê lêq. 5Dik, vii 'yo hloq kadra neq đaji adro bingq jich, ji laa dro ahluk varơuq lôônq xôônq aduq tôôy adro Jo Thaiq loch dêh araak, kung laa dro dưk ưk bing ja Na-xa-ret, 6laa adro pheq đnooy heq raanq dơơp klơơr 'yêq hnhư hơu, kung laa adro đơu 'wot heq rôp jư, — [ Ji 'wot xung xưh xadrah tyauq ganuun ku 'wot. 7Bơh kơy padrok xakaq Li-sia, atêq tuôôy truh aduq, heq tagoa xok ni klơlh ti 'wot bơơn maak xieh, 8vlôh tanưưl ka khơl adro rôp xadrah ni pheq truh kangưưr kadraq] — đơu xing aduq ni, kadraq hnoq ik kadih xăk 'yo vôôch truh dêq hloay kaluh varơuq neq xôq nhonq vlôh kaluh kadrôôp đơu 'wot đong rôp xadrah ni.” 9Nưq yôôch, manih Jo Thaiq kung ka uua tyauq, 'yo nhonq kaluh varơuq nưq laa đanưq.

10Phao-lô kung heq tơơl hlê, atêq tuôôy padrok dêh vlôh hlêêl ka kơy đnooy: “Vii xet kadraq heq dơơp padrok xưh xadrah ka tamooy neq đom 'ngưng xanưm, lunưq gô hlah xuum kadih đnooy tagêh truh kaluh varơuq apiq truh gô, 11vii Kadraq hnoq ik nhonq xet đaneq xing tuôôy gô hooy tok xôq ayuôôt laat aduq Jê-ru-sa-lem laa leh galơh kưl vaarq hngơy, 12ji oot leh rôp tavơh gô takaay tayaat dii kơyq đom hnhư hơu, kung be dơơp vlôh varơuq paloanq aduq bing karôp, long đom kaluh hnhư hơu, long loch dêq theng phôq, 13Oot kung leh e paraat dưk xanưk kajoq ka kadraq truh kaluh kadrôôp đơu oot juneq đong rôp kadrôôp gô. 14Bơh gô 'yo nhonq dii Kadraq varơuq neq, đaneq tyauq đaji Đaauq đơu oot taayh laa bing ja, đơu tyauq nưq gô hơu varơuq Kơy Plêêk ku khơl mo kơy, xôq xuum tuôq muut dêq hloay kaluh kajoq gamưh tol ganuun ji kaluh apok jah valơk đom kaluh rahlăp hlit, 15e xuum takôô gamưh aduq Kơy Plêêk đơu kadih oot kung đong takôô, tuôôy đinq laa hnoq e varơuq riirh hlê ku dêq manih hyioh jăk hloay adro xơk tauq. 16Vii kơq nưq, kadih gô kung raanq paraat xôq e muuyq xuum klaak leh đangq trek kangưưr Kơy Plêêk ji koot manih đom tôôy varơuq. 17Tuôôy nưq, atêq 'ngưng xanưm, gô wiit xuq, xagook tyauq jêêt waak tajưp ka vari dêh gô, kung kaluh kuah tơơk tưp, 18đơu muut tuôôy nưq, oot rôp tavơh gô chiuq pa xarêh 'moh đom hnhư hơu, leh achung dii manih karôp, kung be kung dii varơuq paloanq. 19Bơh taleq dro Jo Thaiq hơq xing A-si, laa khơl adro đangq pheq truh kahnoq vlôh kangưưr kadraq yôôch atok xadrah, atoh oot e paq kê varơuq kajoq tachơơl dii gô. 20Long laa kadih khơl manih măn đnen pheq đnooy vlôh varơuq be troq leq đơu oot heq axek ik tuôôy gô dưk kangưưr Tayuup Karôp ku manih Jo Thaiq, 21e be laa truh muuyq apok đnooy vlôh đaneq đơu gô heq laa kôt tuôôy dưk katul oot, đaneq: ‘Gô đong chiuq xưh xadrah kangưưr khơl oh ay hngơy neng apiq truh varơuq riirh hlê ku dro kaxêêt.’”

22Nưq yôôch Phê-lit, vii xet ro raang kaluh varơuq apiq truh Đaauq, heq xôq hlê varơuq xưh kaluh panưh, tuôôy đnooy: “Tuôôy leq kơy padrok xakaq Li-sia hnoq ik hooy pôôt đnen, gô hnoq đinq hloay kaluh varơuq apiq truh êêp kơy,” 23ji đnooy dăt ka padrok xakaq kuun jư 'yo Phao-lô, katuôôy pheq ăm kơy e varơuq rayơh rayơơy, ji leh klơl khơl manih oh ay ku kơy truh văch xiap kơy.

24Yôôch taleq hngơy atêq nưq, Phê-lit, tuôôy wiit hlê kung dii Đơ-ru-si, kadrê kơy, laa muuyq mư kadrê Jo Thaiq, yôôych heq ăm taayh Phao-lô truh ji tameng kơy padoh taboon truh xuum tuôq aduq Lôôk Wơơt Dêh Jê-xu. 25Bơh tuôôy kơy đong padoh taboon truh varơuq hyioh jăk ji varơuq jư xăk, kung varơuq xưh xadrah hnoq truh, yôôych Phê-lit, vii kadrăch varaal, heq tơơl hlê: “Juneq dayh wiit xuq, bơh tuôôy e kawah, gô hnoq ăm taayh kơy truh.” 26Kung ajơ nưq, kung vii takôô đaneq hnoq e axit jêêt baak jah Phao-lô palo ăm ka xăk, lunưq xing nưq, padrok dêh kưq ragơy athêêk dii kơy tuôôy ăm taayh kơy truh ratơh. 27Bơh tuôôy dalơh dêq vaarq xanưm, Phê-lit e manih dưk thêq laa Bôt-tiu Phê-tu, katuôôy vii xung xok xuum manih Jo Thaiq, lunưq Phê-lit heq xôq Phao-lô biq karuk.