Skip to content
BibleKenya

Cua Bible Literal Text

Rô-ma 1

Phao-lô, xapok ku Lôôk Wơơt Dêh Jê-xu, muuyq khơl jah rơơlh jah taayh tawooyh, jah rơơlh đêh ka Hêêl Kaxay ku Kơy Plêêk, laa varơuq đơu Kadraq heq tavek xing adroyq hlê khơl kơy hlit ku Kadraq đom Rahlăp Vah, truh Koot Kadraq — Kơy jah pahleh vlôh xing adrơơk ku Đa-vik tyauq ka phon xăk xamơk, Kơy jah đnooy đinq laa Koot Kơy Plêêk bơyh taay yaak hlê varơuq riirh hlê xing aduq kaxêêt tyauq danưng kooy vah xarêh — nưq laa Lôôk Wơơt Dêh Jê-xu, Lôôk haay, đơu gamưh Kadraq, 'wot heq nhonq xok vanong Plêêk ji chưk khơl jah rơơlh wih truh varơuq tameng tyauq ku xuum tuôq katul dêq hloay khơl tamooy kadrơy vii kơq yal Kadraq, đom sôôq nưq oh ay kung laa khơl adro jah taayh tawooyh thuôk xuq Lôôk Wơơt Dêh Jê-xu. Atăq truh dêq hloay khơl leq đong măn aduq Rô-ma, laa khơl adro xung xiaq ku Kơy Plêêk, laa khơl vah jah taayh tawooyh: Apôôy vanong plêêk truh dii oh ay kung varơuq hrok hrol xing Kơy Plêêk, Vaq haay, ji xing Lôôk, laa Lôôk Wơơt Dêh Jê-xu.

Adroyq dik, gamưh Lôôk Wơơt Dêh Jê-xu, gô kuh kway Kơy Plêêk ku gô truh dêq hloay oh ay, vii xuum tuôq ku oh ay jah pahêêr vlôh loch hloay dêh araak. Vii Kơy Plêêk laa manih xanưk ku gô, Kơy đơu gô hơu varơuq bơơn dêq xuum gô đom Hêêl Kaxay ku Koot Kadraq, nưq laa gô leh padơy e varơuq ahmưk nhăk truh oh ay vlôh đaleq, tuôôy hloay hloay apôôy vôôch đom apok apôôy vôôch ku gô đaneq atoh e hnoq ik, xôq yôôch muut tuôôy neq long tuôôy kadrơy, gô hnoq e đơơt hooy tơơl dal xing iq trôôch ku Kơy Plêêk xôq truh kung oh ay. Vii gô trôôch kajoq jah tavơh oh ay, xôq ka gô hnoq ik ahlook aklah dii oh ay vanong danưng kooy leq nưq, xôq oh ay jah kajưk kalh, đơu varơuq nưq laa xôq gô kung jah ahmưk nhăk dii oh ay, gamưh varơuq măn đom tôôy adro, nưq laa xuum tuôq ku hloay oh ay ji gô. Wơơy oh ay, gô leh trôôch oh ay be lưp xet đaneq 'ngưng yưk gô heq e iq đinq truh kung oh ay (đơu gô heq biq klơl hlê dong truh tuôôy neq), xôq ka gô kung hnoq ik goch weelh raak play leq nưq katul oh ay, kung đaji katul khơl tamooy daak kadrơy. Gô laa adro pơq lôôk dêq manih Hi Lap hloay adro thiuq xa hok, dêq manih khôôt xet hloay adro vlô apoop. Lunưq, đôôyq dii gô, dik laa tôq xuum xôq kung đnooy vlôh Hêêl Kaxay ka oh ay, laa khơl manih aduq Rô-ma.

Vii gô leh kamưưl ier truh Hêêl Kaxay, bơyh nưq laa taay yaak ku Kơy Plêêk xôq varơuq wơơt xok deng ka dêq hloay khơl leq tuôq, nưq laa deng adroyq dik ka manih Jo Thaiq, hloay deng ka manih Hi Lap. Bơyh varơuq hyioh jăk ku Kơy Plêêk jah kahnoq vlôh đom Hêêl Kaxay nưq, xing xuum tuôq truh xuum tuôq, đaji heq jah valơk đaneq: “Bơh adro hyioh jăk hnoq riirh xing xuum tuôq.”

Vii đơơt tôq dayh ku Kơy Plêêk xing plêêk jah kahnoq vlôh tachơơl dii tôôy varơuq leh kuh kul ji leh hyioh jăk ku khơl drơy, laa khơl adro rôp toop varơuq dik đom varơuq leh hyioh jăk, vii varơuq biit xet truh Kơy Plêêk yôôych ro raang măn katul oot, bơyh Kơy Plêêk heq kahnoq varơuq nưq ka oot. Vii xing tuôôy panưk pajêêk dêh araak, kaluh kajoq leh hloq ik ku Kadraq, nưq laa dêq taay yaak hloay yaak xăk đơơy đơơy ku Kadraq, raay jah nhonq xet ro raang, tuôôy jah hlolh xet gamưh kaluh panưk pajêêk ku Kadraq, xôq ka oot leh e kajoq đnooy tagêh ik. Anưq laa vii long nhonq xet Kơy Plêêk, oot heq leh vanê ayuôôt Kadraq laa Kơy Plêêk, kung leh kuh kway Kadraq. Xaloah muut đnư, oot heq vlôh jêêk leh yuôôr đom kaluh xuum biit oot, ji xuum ta'ngơk khưrq ku oot heq biq varơuq kamơng jaluk klum katuh. Tuôôy kadih xưng laa khôôt kheoq, oot heq ăm hloq kadih oot vlô apoop, ji oot heq tađôôy tađnah tađnaak ku Kơy Plêêk leh hư hlơơp bơơn dang tachưng truh long lơuq ku koot manih hư hlơơp, kung đaji ku paroh xêêp, ôô paroh, ji pi ahnoot.

Lunưq, Kơy Plêêk heq pahnăp ka'lăk oot muut kaluh xuum hmưch ku xuum oot wih truh varơuq leh xarêh xaraat, xôq xăk xamơk oot biq dơơp 'moh nhuk katul bing oot, nưq laa khơl adro heq tađôôy varơuq dik ku Kơy Plêêk bơơn varơuq pa ôôh, ji heq vanê ayuôôt kung hơu varơuq paroh pajêêk thay vii Kơy Panưk Pajêêk, laa Kơy đangq jah kacheeu ayuôôt dong truh đơơy đơơy. Amen.

Bơyh kakơq nưq, Kơy Plêêk heq pahnăp ka'lăk oot ka kaluh hmưch trôôch 'moh nhơy, vii khơl kadrê ku oot heq tađôôy kach xa vik tưq nhiên jêêk kach đêh tưq nhiên, kung anưq, bing khơl kanau kung dang anưq, atêq tuôôy kadih ka'lăk kach xa vik tưq nhiên dii khơl kadrê, yôôch chiuq huur vuh đom xuum hmưch ku oot truh mamuuyq, tuôôy khơl kanau dii khơl kanau dơơp varơuq bơyq ba, yôôch nhonq hlê tol kadih oot xadrah dook, ji varơuq taxưngq dii varơuq bơyq ba ku oot.

Kung tyauq kach đơu oot heq leh 'yo hloq pheq e Kơy Plêêk đom nhonq xet oot laa kaxay liep, yôôych Kơy Plêêk heq pahnăp ka'lăk oot ka xuum biit hư hlơơp, xôq dơơp kaluh varơuq be troq jơq, vii heq biq galôp viik tôôy varơuq leh hyioh jăk, xơk aak, hmưch trôôch, xuum xơk; viik ngăk kaluh varơuq ku varơuq geet 'yarơ, păk kaxêêt, takaay tayaat, aluut pa ôôh, xơk xuum; kaluh apok đnooy ramooy, đnooy pahnhiq, 'yarơ geet Kơy Plêêk, lienq xauq, katơơk galơh, pa ưưt khwoak, 'ngưng varơuq dơơp xơk xơuq, leh tameng tyauq miq vaq, nhonq xet axit, leh jư apok tavek, leh tabông, leh e xuum biit angơuq. Nưq laa khơl adro long heq nhonq xet xưh xadrah hyioh jăk ku Kơy Plêêk, đaneq kơyq lôp kaluh varơuq đanưq laa xưngq kaxêêt, bơh oot leh vơ lôp kaluh varơuq nưq, đơu oot măn ưng athêêp ka khơl adro leq gưlh lôp.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.