Skip to content
BibleKenya

Cua Bible Literal Text

2 Phi-e-rơ 3

Oh ay xung xiaq, atêq ka muuyq kawah kawat, neq laa hla thư thưq vaarq gô valơk ka oh ay; đơu đom dêq vaarq hla thư, gô ahluk ahlul xuum biit dong dik ku oh ay bơơn varơuq ahmưk nhăk, xôq văch hlê kaluh apok heq jah padoh đnooy adroyq neq bơyh khơl hlit vah kung dii apok patăk ku Lôôk ji Wơơt Lôôk gamưh khơl jah rơơlh ku oh ay, vii xet adroyq varơuq neq, nưq laa khơl adro đnooy ra ơơh hnoq truh muut katuôôy lôôch dik dii varơuq xagiel ra ơơh, raxôôt tyauq hmưch trôôch ku kadih oot, đơu đnooy: “Apok tavek truh varơuq wiit truh hlê ku Kadraq măn ka'leq? Vii xing tuôôy khơl mo kơy kaxêêt, tôôy thưq kưq măn ja xing hngơy panưk jêêk kapa tep.” Vii tuôôy tangưưr đanưq, varơuq neq jêêk vlôh đơ mot oot, nưq laa bơyh apok ku Kơy Plêêk, plêêk heq e xing hnu hmeq, ji vari jah dơơp vlôh xing daak ji gamưh daak, kung bơyh kaluh varơuq nưq đơu dêh araak tuôôy nưq heq biq kaxêêt hlơơp, vii biq daak ngôp dêq. Bơh juneq, bơyh kung apok nưq, plêêk ji vari jah deng ka ôôlh, jah jư ka hngơy xưh xadrah ji varơuq kaxêêt hlơơp khơl koot manih leh tuôq kul.

Ju anưq, wơơy oh ay xung xiaq, te xôq muuyq varơuq neq jêêk vlôh đơ mot oh ay, đaneq muuyq hngơy đôôyq dii Lôôk dang đaji muuyq ravơu xanưm, ji muuyq ravơu xanưm dang đaji muuyq hngơy. Lôôk be manưưn manưl truh apok tavek ku Kadraq, đaji muuyq sôôq adro biit laa manưưn manưl, tađôôy muut đnư, Kadraq atuq xuum chiuq uunq đôôyq dii oh ay, leh xung adro leq biq kaxêêt hlơơp, bơh xung dêq hloay raay e kawah hooy truh varơuq wiit xuum. Lunư, hngơy ku Lôôk hnoq truh đaji adro atôk, đơu đom hngơy nưq, lawah plêêk hnoq tapol hlơơp đom hnưm ahna garung, ji dêq hloay tuôôy thưq hnoq biq phaq ka'lăk tuôôy biq ôôlh vuh jaq, măn vari ji kaluh varơuq dơơp đom nưq hnoq biq kahnoq vlôh. 1 Vii tôôy thưq nưq hnoq biq kaxêêt hlơơp đanưq, lunưq kơn băt dăt oh ay pheq xa măn đom đơơy riirh hlăng vah ji tuôq kul, takôô ji talăng jăk trôôch takôô hngơy rama truh ku Kơy Plêêk, vii tuôôy nưq kaluh tưng plêêk hnoq biq pa hyaak vii biq ôôlh vuh jaq, măn dêq tôôy thưq hnoq rook hoot vii biq vuh jaq tôq rahưk. Bơh tyauq apok tavek ku Kadraq, haay đong takôô plêêk đơơu ji vari đơơu, đơu đnư aduq nưq varơuq hyioh jăk măn đnư.

Vii anưq, wơơy oh ay xung xiaq, vii kơq takôô kaluh varơuq nưq, dayh dêq paraat xôq jah Kadraq 'yo hloq laa leh e hlêêl tachoot ji leh e aduq đnooy ik, đom varơuq hrok hrol. Ji pheq hlolh xuum chiuq atuq ku Lôôk haay laa vii vanong wơơt xok, kung đaji Phao-lô, manih oh ay thier xung xiaq ku haay, heq valơk ka oh ay, tyauq varơuq khôôt xet heq jah kahniq ka kơy, ji đaji đom kaluh hla thư, tuôôy đnooy đom thư truh kaluh varơuq neq, aduq nưq e muuyq sôôq varơuq koq hlolh đơu khơl adro be hlolh xet ji leh dưk kajưk xok padoh hyaak bơyq, kung đaji dii kaluh talok Rahlăp Vah kadrơy, wih truh varơuq kaxêêt hlơơp ku kadih oot. Jo nưq, wơơy oh ay thier xung xiaq, vii xet adroyq kaluh varơuq nưq, oh ay dayh jư xăk xôq oh ay leh huq dơơp hlơơp varơuq dưk kajưk ku oh ay đơu biq jarooy hooy hyaak hyul bơyh varơuq aluut pa ôôh ku khơl adro xơk tauq. Bơh dayh kôt tok đom vanong plêêk ji varơuq hlolh xet Lôôk ji Wơơt Lôôk haay, laa Lôôk Wơơt Dêh Jê-xu. Apôôy vôôch tađnah tađnaak thuôk truh Kadraq hloay đom juneq ji truh aduq đơơy đơơy. Amen!

Source notes (1)
  1. Footnote Muuyq sôôq rahlăp kadrơy đok: Dêq kaluh kajoq hnoq biq ôôlh vuh jaq, măn vari ji kaluh kông trinh tol nưq yôôych biq vuh vlôh vlo.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.