Cua Bible Literal Text
2 Phi-e-rơ 2
Long anưq, đaji khơl hlit pa ôôh heq măn katul manih karôp, yôôych khơl thơy pato pa ôôh kung hnoq măn katul oh ay, 'ngưq laa khơl adro hnoq leenq xagook muut kaluh apok tagêh phaq phek ji vii chôôyq ka'lăk Manih Kôôch heq wơơt root oh ay, lunưq varoh xok kadih varơuq kaxêêt hlơp thier talăng. 'Ngưng adro hnoq dơơp atôôlh tyauq kaluh varơuq dơơp va ih va oop ku oot, đơu vii khơl adro nưq đơu đaauq ku varơuq dik hnoq biq đnooy ra ơơh. Bơyh xuum hmưch, bơơn kaluh apok pa ôôh lar, oot hnoq parayh xok lơyq oh ay, đơu varơuq hmơt dook deng ka oot adroyq neq koq hmưq hlơơp, ji varơuq kaxêêt hlơơp ku oot be hmưq vik. Vii atoh Kơy Plêêk heq leh tha ka'lăk khơl yaak plêêk lôp kadrôôp, bơh taweek pôôt raluk jaruq đom talơy looy tooy ku aduq kamơng jaluk, Kadraq pahnăp khơl adro biq jư 'yo nưq ka varơuq xưh xadrah; 1 Kadraq kung heq leh tha ka'lăk dêh araak tuôôy hnu, bơh 'yo jư thơơm adro, e Nô-ê, laa manih pato dayq hyioh jăk, tuôôy Kadraq apôôt daak ngôp dêh pôôt dêh araak ku khơl adro xơk tauq; ji tuôôy vuh kaluh theng Sô-đôm ji Gô-mô-rơ vlôh vlo thul, Kadraq heq ăm vlôh varơuq xadrah kaxêêt hlơp, dơơp atoh truh kaluh kajoq hnoq xalih truh ka khơl adro xơk tauq; đơu Kadraq heq wơơt xok Lot hyioh jăk, đong tuôôy chiuq pơl dal vii katik xa măn đom varơuq apuq atrăp ku bing xơk tauq, (bơyh manih hyioh jăk neq tuôôy riirh hngơy hlê hngơy katul bing oot heq biq jiq areh đom phool hiel hyioh jăk ku kơy vii hloq ji tameng kaluh varơuq xơk tauq); yôôych Lôôk xet dơơp đaleq wơơt xok manih tuôq kul klơlh thưh thek ji rôp jư adro leh hyioh jăk xôq biq hmơt dook đom hngơy xưh xadrah, đơu nhưk laa đôôyq dii khơl adro ratuut đom kaluh hmưch trôôch hư hlơơp tyauq xăk xamơk ji 'yo be ra kajoq qwuyen da uh. Bing adro lar tauq găk akoq găk ranong, oot be yôq đnooy ra ơơh khơl kơy tađnah tađnaak; đom tuôôy khơl yaak plêêk e paraat kalh ji taay yaak kôt iaq leh hmưq đnooy vlôh apok xưh xadrah ra ơơh, tachơơl hlê khơl kơy nưq kangưưr Lôôk. Măn bing neq, đaji kaluh koot ôô leh xet biit, tyauq paraat jah pa iir vlôh xôq biq rôp ji păk kaxêêt dêq, đnooy ra ơơh truh kaluh varơuq đơu oot be hlolh xet, bing nưq kung hnoq biq păk kaxêêt dêq đaji varơuq kaxêêt hlơơp ku kaluh koot ôô hơq, tuôôy biq bla hlê tyauq varơuq dơơp ku varơuq leh hyioh jăk, vii 'yo hmưch trôôch đaji varơuq xa agưt katul ka hngơy; bing oot laa kaluh hlêêl a'moh 'mơy ji klơl 'yêq, hlah trôôch đom varơuq pa ôôh lar ku oot tuôôy xa kawaal dii oh ay; 2 e kaluh kalong mot viik varơuq apuq atrăp ji be padơy tabông 'yo muut kadrôôp maroh, adô aluut kaluh danưng kooy leh kajưk dơơp bơyq, ji e xuum klaak jah varơuq atuq katik hmưch tagoa, laa koot xau ku varơuq karoay axaap. Vii ka'lăk ka trôôk hooy hyioh jăk, bing oot biq hyaak hyul tuôôy hooy tyauq ka trôôk ku Ba-la-am, koot kanau Bê-ô, adro hmưch trôôch jêêt kông ku varơuq be hyioh jăk. 3 Bơh ni heq nhonq varơuq toah vii kadrôôp maroh ku ni — muuyq koot lưưa hôp heq klơl hlê varơuq adruôy khưrq ku hnhư hlit tuôôy đnooy bơơn apok manih. Bing neq laa alook leh e daak ji laa xangoom kahliik biq đơơt khiel puh akhua hooy, laa khơl adro đơu aduq kamơng jaluk apul phil heq jah xôq 'miêh. Vii, tuôôy đnooy kaluh apok pa ưưt akhwoak lưp e kajoq, bơyh hmưch trôôch a'moh 'mơy ku xăk xamơk, bing oot adô aluut khơl adro vơơ đơơu xaloot klơlh bing manih đong riirh đom bơyq ba, tavek rayơh rayơơy ka khơl adro nưq, đom tuôôy kadih xăk bing oot laa xapok ku varơuq hư hlơơp. (Vii adro leq biq varơuq kajoq jay iaq, yôôych adro nưq biq dơơp xapok ka varơuq nưq.) Vii atoh heq xaloot klơlh đơơy riirh hư hlơơp ku dêh araak gamưh nhonq xet Lôôk ji Wơơt Lôôk haay, laa Lôôk Wơơt Dêh Jê-xu, bơh biq pang waq măk muut đnư wiit hlê, yôôych khơl adro nưq heq biq be jay, đơu varơuq atêq neq đôôyq dii oot jêêk vlôh ra ơơh iaq adroyq đnoyq. Dik laa varơuq tolh iaq ka oot tuôôy leh xet trôôk hooy hyioh jăk iaq laa heq xet yôôch đơu wih katoor dii ganeen vah heq jah pato ka oot. Apok dong dik ku apok đnooy hnu neq heq xalih vlôh ka oot: “Xo xa hlê tuôông heq hăk” ji “xuur heq hôôp xarêh valien amuaq đom wưk.”
Source notes (3)
- Footnote Muuyq sôôq rahlăp kadrơy đok: xôq biq rôp karuk đom kaluh raluk kamơng jaluk pi 'laarq dong truh tuôôy xưh xadrah.
- Footnote Kaluh rahlăp kadrơy đok: Oot hlah trôôch truh varơuq dơơp ku oot đong tuôôy xa hôôch dii oh ay đom kaluh waal xa xung xiaq.
- Footnote Muuyq xôq rahlăp kadrơy đok: Ba-la-am, koot kanau Bô-xô.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.